Salmos 44
44
Minit yulwi Papang yakat ilp yulna
Coro sumalniyang kaupak. Coré walanibis balna yulnina damni.
1Papang,
yangna tapakina kau dakanayangna,
dawak papangkina balna yaklauwi yanayuyulna
man yamnaman balna dai kidika witingna manina balna dai yakat
kidika mani balna bayakwi kaina yakat:
2man tingma kau,
laihta yakmukta man yakat makukulwas muihni balna kidika,
dawak wah dianaman muih balna yakat
dawak kidika yakat yangna papangkina balna panina dianaman dai.
3Witingna tingnina dawak isninaparah kidika yaklauwi laih
minit bayaknin kidika diawasdai;
kidika sauni witingna kalbauwi minit bayakwi laihwi duduwasdai.
¡Man parasma kidika yaklauwi kaput yamna dai!#Dt 8:17-18; Jos 24:12; Jue 7:2.
¡Man parasma yaringni kidika yaklauwi yamna,
kat man lawa dalani diataman dai bahang!
4¡Yang kingki! ¡Yang Papangki!
Man lawa tawanma yakat minit bayaknin kidika kalanaman dai;
5man lawa mayatangkat waihkinala balna yakat minit bayaknayangna;
¡man ayangma kau taihtik laknayangna, nikingna kauh yaklalauwa balna dai kidika!#Sal 60:12.
6Kat yang laih sip laski yakat kulnik ātik dutas awaki;
dawak iskiparah bik yaklauwi minit bayaknin kidika yāwas karang ki;
7man lawa mayatang kat waihkinala balna minitna yaknayangna,
man lawa asalnina yaknaman yangna kau dutni yanakukulwa balna dai yakat.
8¡Man yakat yangna manah kapat kaldakanaki, Papang,
man ayangma nuhni yamtayangna kidika ban karang!
9Kauna yanadutas danaman;
dawak asalkina manah kalahna.
Yangna kalbaunin muihni balna dutayangna kidika karak kalpakta alahwasman.#Sal 60:10; 108:11.
10Yanayamtang kat waihkinala balna niningna yakat dangbahnayangna;
dutni yanakukulwa balna kidika yaklauwi dikina mamalwi,
dawak ais duwi uinin kukulwa kidika duwi uiwi.
11Tingnina yakat yana-ānamana
sihm sīp balna īnin pāni yakat duwi uiwa kapat;
man kau makukulwas muihni balna pasningna yakat yanaruhmna man;
12tawanma kidika wauhta bakannaman minit dibin palni,
wauhta bakanpamna man kidika kaupak di as bik minit yakat lata dutasman.
13Yana-usnit dini as kapat yakat yanawirlana man;
yangna yaihkitna kau muihni balna kidika yana-uhuswi dawak sarahni yanatalwi nikingna kakari.
14Yamtangkat man kau makukulwas balna kidika yaklauwi sarahni yanayuyulna yangna akat;
yanatalwi, tunanina kidika lababahnwi sarahni yanatalwi.
15Minit as bik diski yangna sau yakat buktas atnikna kidika;
muhki kidika sau yakat bukna asalni manah
16waihkila yaklauwi biri yayamnin kulwa kidika yulni
yausna ki dawak dutni yayamna ki.
17Adika dini yanakalahwada kidika laih
man kidika dikitnakahna tanka laih awaski.
¡Man pramamis yakat yamtasyangna laih awaski!
18Yangna kultasyangna dai maruhmtik danikna
dawak tama bik datasyangna.
19Kaput kauna, man lawa yanataihta sikitna man
di dis pāni yakat.#44.19 Di dis pāni yakat: grik kau laih kaput yulwi. Hibru kau laih yulwi walang sunilu balna panina.
¡Puksani yamadangni yanamuklakna man!
20Man kidika dikitnakahna katlaih, Papang,
man pama yakat dawan dauh yakat ayangni nuhni yamnayangna katlaih,
21man amanglatitimdai,
kat man laih di tanit malnikau kidika bik talaman bahang.
22Kauna man yulma ban aput yangna,
daunikna manah;
yangna adika yanayayamwi sihm sīp balna inin yayakna kau diyayamwa kapat.#Rom 8:36.
23¿Aisyamta amamahn Dawan?
¡Sahmuta, sahmuta!
¡Yanaruhmwi ban kaput atnin yakat!
24¿Ais yamta maldamanh?
¿Ais yamta yangna adika datang damatkahwih,
yangna uba wauhtayangna adika?
25Yangna sip-awas kalnayangna dawak sau yakat buknayangna,
yangna muihkina adika sau yakat murtayangna.
26¡Lawah
dawak aiwa ilp yanatah
dawak yanalaihta yaktah dalani lani nuhni dutaman kidika kau!
Currently Selected:
Salmos 44: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
