Salmos 35
35
Minityulwi ilp yulna Dawan yakat
Devid kaupak.
1Dawan, niningnakauh lawa, yang nikingkauh yaklalauwa balna yakat;
yababauwa balna niningna yakat dibauta.
2Namatdaknin dini kidika duta aiwa ilpki awah;
3man langmasa kidika duta aiwa muhnitna yakat lawah,
ya-uiwi aiwa balna niningna yakat;
¡yayultah man laih yang yalaihwi yakyang man!
4Yakasaldi kikirang
yaīnin kukulwa muihni balna kidika;
asalnina kalahna karang
dutni yāyamnin kukulwa muihni balna kidika;
5¡dibasta kusulana kat wing duwi kiwa kapat karang,
Dawan innisal yaklauwi ruhm'lakwakat!
6¡Tāni kidika puksani manah dawak datalni karang
dawak Dawan innisal kidika yaklauwi diuiwi kiuna karang!
7Yul as dis kaupak yalaihnin dini takipas yakat yalaihnin dini kidika ahana dai;
dawak yul dis kaupak pa as kukuhrna dai
kidika yakat yang bukna atnik.
8¡Di dutni kidika witingna isningna aiwas kat dilaihna karang!
¡Witingna alas dinina kidika wiryaklawi dilaihna karang!
¡Di dutni yakat bubukwahng!
9Kaput laih yang alasna duki Dawan yakat
kat witing yaklauwi yalaihwi yakna karang bahang.
10Yang kulnik bitik yulki:
“¿Wais kidika man kapatyah Dawan?
Muih miniknakunni dawak dukih diawa muihni balna yakat dilaihta yaktaman bahang,
kat kidika balna laih tanit pararasni bahang,
dawakat bik dinina mamalwi.”
11Muih dudutni balna kidika witnis kakawi
dawak yang akat yayulwi dakakawi, amanglatasyang dini kidika.
12Yamni kidika dutni kau minitlauwi yayana,
kidika yulni uba kulnik sau yakat bukwi;
13kat witingna siknis kalalahwak
yang kulnik kidika sau yakat bukwadai,
askina utuhni kat āwik di kastasyang dai,
dawak kulnik pasyakat mikityultayang kidika datasyang dai.
14Yang liktayang dai kulnik bukwak,
yang nanangki yulni kulnik bukwak askina sani āwanayang kapat,
kidika-awasbik kaltalyang yamni as dawak yang wirahki palni bik kapat.
15Kauna yang buknayang mani kat
witingna kalpakwi nikingkakarana;
yang adika yatalwas muihni asyang kapat,#35.15 Yang adika yatalwas muihni asyang kapat: kaput wirlana kidika yamni kapat ki. Hibru kau laih yulwi babauwi (?) kaunah yang dakasyangdai (amanglatasyang dai).
dalani yayana dai laihwatwas ban.
16Dalani yayana, yangkau sarahni yatatalna,#35.16 Dalani yayana, yangkau sarahni yatatalna: grik kau ulna kidika kaput ku. Hibru kau laih yulwi plawar kuruhwi busna askau tanit sarahni yulyang muihni balna.
witingna muhnina kidika dipulihna yatatalna.#35.16 Witingna muhnina kidika dipulihna yatatalna: barangni yulnin kat anani kakarsna yang nikingkauh.
17Dawan, ¿ma yapak adika kaput tala awamayah?
¡Sangkika aslah adika laihta yakta,
adika layanni ihiwa balna kidika kaupak!
18Man tawanma muih mahni muhnina yakat tingkih maki;
¡muih mahni muhnina yakat ayangma nuhni yamki!
19Yang waihkila balna kidika alasna dunin-awaski;
pini kaupak dutni yatatalwa balna kidika miniknapa suyungnin awaski.#Sal 69:4; Jn 15:25.
20Witingna laih kulnin aslah kidika wawalwaski,
kauna nawatkauh laih malnikau dutni yamnin kidika ridi kalalahwi
adika sauni muihni kulninna yamni balna niningna yakat;
21witingna tininapas nuhwi wakahwi nikingkauh yuyulwi:
“¡Talnauh yangna talinikda kidika!”
22¡Adika laih man yakat ki Dawan!
¡Ap dawinih!
¡Yang kaupak naikau kalahwinih!
23Lawah, Dawan, yang Papangki, ¡sahmuta!
La kat kidika yamtah, yang karak awah.
24Laki yamtah, Dawan yang Papangki
man lāma barang kidika karak.
¡Yang nikingkarinin-awaski!
25Yulbaunin-awaski dawak bik kulnin-awaski:
“¡Adika kuduh dukih mayawadai kidika!
¡Bitik laih daukalpamna mayang!”
26Asalnina manah kalahna karang
yang dutniyang kat talwi alasna duduwa balna kidika;
witingna kidika asalnina manah minitna yakat muklakna karang
witingna kidika tanit muih nuhni kaldakakawa kidika yang karak dawakat.
27kaunah alasna duduwang, sarahwi alasna duduwang
yang minit bayakting talnin kukulwa muihni balna kidika;
witingna ma bitik yakat yuyulwa kawang:
“¡Dawan laih nuhni ki,
dawak witing dini yamyang kidika yamni kat talkih kalawi!”
28Yang tuki kau yulki la kat yamtaman kidika;
¡mapiris kaupak masan kat ayangma nuhni yamki!
Currently Selected:
Salmos 35: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
