Salmos 34
34
Papang minikun talnin lani duwa kidika yakat nuhni yamna
Devid kaupak. Abimelec muhni kaupak kalahwi kirana manikat, witing yakat iswa kapat yamwadai kidika.#1 Sam 21:13-15.
1Dawan yakat ayangni nuhni yamtah awar bitik yakat;
yang kungkimak balna kidika ban witing ayangni nuhni yamna karang.
2Yang laih, yangmanah kapat kaldakayang Dawan kaupak;
¡dakanauh dawak alasna dutanauh,
muih ahal kulnamna minikunni dutamana kidika!
3Kalpakdi ayangni nuhni yamdanang madikit aslah
Dawan ayangni nuhni kidika.
4Dawan yakat waltik yawanayang, dawak nangkitlana,
dawak yamadutayang balna bitik kidika yalaihwi yakna
5Dawan yakat tatalwa muihni balna kidika
witingna alasna yaringni duduwi
dawak watas bik alas diyulwas karang.
6Adika minikunni sarahna dai, dawak Dawan kaldakana
dawak witing kulnin kaida balna kidika bitik kaupak kal-laihwi yakna dai.
7Dawan innisal kidika yaklauwi laihwi yakwi dawak tanitdakwi
Dawan yakat ayangni nuhni yayamwa balna yakat.
8Manna laihta talnauh, Dawan laih yamni palni ki.#1 Pi 2:3.
¡Isninglak ki, angdika alni, witing yakat kalkulwa kidika!
9Dawan ayangni nuhni yamtanauh, witing dinimana kidika,
kat witingna niningna yakat di dis atnin lani kidika diskarang witing yakat ayangni nuhni yayamwa kidika.
10Di duyang balna#34.10 Di duyang balna: grik kau ulna kidika laih kaput yulwi. Hibru kau laih yulwi layan balna. miniknakunni kakalwi, dawak yuh wawauhwi,
kaunah Dawan yakat wawalwa balna kidika laih
witingna niningna yakat di yamni kidika dis-awas karang.
11Walakibis balna aiwa yadakanauh:
Dawan yakat ayangni nuhni yamnin kidika manasumalki.
12¿Ma mahni sangka awakih mawih?
¿Sangmaka kidika alasna dukih mawih?
13Kaput kat tuma kidika laihwatta dutni yultaman kidika
dawak watas bik alas yulwinih.
14Dutni kidika kaupak naikau alahwa dawak di yamni kidika yamtah;
kulnin aslah lani kidika waltah dawak usnit uita yawah.
15Dawan yaklauwi muih ahal kulninna yamni balna kidika maintalwi
dawak yuyulwa kidika yakat dakawi.
16Dawan laih muih dudutni balna niningnakauh ki,#1 Pi 3:10-12.
sau akat witingna kulninna balna kidika bitik disyamna atnin.
17Dawan laih muih al kulnin yamni yulwa kidika yakat dakawi,
dawak laihwi yakwi kulnin kaida balna bitik kidika kaupak.
18Dawan laih yaihnit yakat sakki,
witingna kulninna bukna balna kidika laihwi yakna atnin
dawak tahawi talnin dis kalna balna yakat.
19Muih al kulnin yamni balna kidika di dutni manas karak kalpakwi bayakwi,
kaunah Dawan yaklauwi kidika balna bitik kaupak laihwi yakwi.
20Witing yaklauwi wakalni balna bitik kidika tanitdakwi;
wakalni balna as bik bahwas karang.#Jn 19:36.
21Muih dudutni balna kidika witingna silp dutnina kidika yaklauwi di iwi;
muih al kulnin yamni yakat dutni kalkukulwa balna kidika muihni balna laih wah diana karang.
22kaunah Dawan laih witing dini yamyang balna sangninaka kidika laihwi yakwi;
¡witing yakat kalkukulwa balna kidika laih wah duduwas karangki!
Currently Selected:
Salmos 34: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
