Salmos 3
3
Papang yakat minit yulwi ilp yulna
Devid salnimo, witing walanibis Absalón yakat yamaniduwi kirana kidika.#2 Sam 15:13-17:22.
1Dawan,
dutni yakukulwa balna kidika mahni palni ki,
mahniki yang nikingkauh yaklalauna kidika,
2¡Muih manas laih yulki yuyulwi:
“Papang yaklauwi laihwi yakwas karang atwi”!#3.2 Hibru kau ulna kidika laih minit yakat lakna, adika yulni, Selah kauna kidika tanka laih, lāih awaski. Kidika laih lawana as kapatki, dawak bik sipki yulwi kiwi laihwatwa balna satni, watwat yulwa balna, kidika awaskat dinit satuk wirlawa balna kidika. Salmo yakat kapatnah balna kalahwi, kaunah adika yulni tanka laih awas kidika yulni laih āwas dana.
3Kaunah, Dawan man laih,
takit dakyang man,
alaskina man,
dawak man kuduh watta kulnik dulautaman kidika.
4Sarahtik Dawan yakat ilp yultayang,
dawakat witing asangni maisihnidis kidika kaupak nangkitlawi.
5Alangwik amayang, dawak wattik sahmutayang,
kat Dawan yaklauwi ilp yawa bahang.#Sal 4:8; Pro 3:24.
6Kalbauyang muihni balna mahni kidika bilkilalauwas ki
ya-awaihdak sakkidika nikingkauh yakalbaunin manah.
7¡Lawah, Dawan!
¡Yalaihta yakta, Papangki!
Man lawa dutni yakukulwa balna muhnina yakat tisma;
¡muih dudutni balna ananina kidika bahma!
8Man kuduh Dawan, laihta yakyang man kidika;
¡man, tawanma yakat blisin kalatah!
Currently Selected:
Salmos 3: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998