Salmos 25
25
Papang kau minityulwi, ta kidika niningkana atnin
Devid kaupak.
1Dawan, yang man yakat mikityultayang;
2yang Papangki, man yakat kultayang:
yadatangkat asalni yakat āwik yawinik-awaski.
¡Dawak yang waihkila balna kidika nikingkarinin-awaski!
3¡Dawak wat-as bik yakasaldinin awaski man yakat kukulwa balna kidika!
¡Asalnina kalahna karang
pini kaupak nikingkauh yaklalauwa balna niningna yakat!
4Dawan,
tama balna kidika manikingkatah;
dawak tama balna munah yaduyawah;
5takituna āwa yaduyawah, man rahmma yakat,
kat man laih yang Papangkiman dawak yalaihwi yakyang man.
¡Man yakat makultayang awar balna bitik yakat!
6Dawan,
ismangkatta, dalani lani dutaman dawak minikun talnin lani dutaman kidika bik
bahang kidika nining mani nikingkataman kidika,
7kaunah yang dutki balna kidika laih kulnam yakat kulwinih
kaput bik yang wahma yang dai mani yakat dutni balna yamnayang dai kidika bik.
Dawan, yang adika ismangkatta,
man dalani lani nuhni dutaman dawak minikun talnin lani dutaman kidika kau.
8Dawan laih yamniki dawak bik la kat yamwi;
muih dutni yamyang balna kulninna bik witing yaklauwi barangni āwi
9dawak tāni munah duwi kiwi muih kulninna limamahni balna kidika;
¡dawak lakat kidika disumalwi!
10Witing laih ninihng dalani lani kau dawak di rahm kidika karak yamwi,
witing pranimis kat yayamwa balna yakat,
dawak lāni balna yakat yayamwa balna yakat bik.
11Dawan, yang dutki balna kidika laih nuhni palni ki;
bahang datang diswang, kaput laih man rismapik kidika nuhni palni karang.
12Angdika alni, Dawan yakat ayangni nuhni yamwa kidika,
witing yaklauwi angdika tāni munah kiunin kidika niningkawi;
13di yamni manah kal-awaihdak kalduwi
dawak sulani balna kau bik kidika sauni yakat panina diawi.#Dt 11:8-9; Sal 37:9,11,29; Mt 5:5.
14Dawan yaklauwi witing kaltalyang yamni yakwi,
angdika muihni balna witing yakat ayangni nuhni yayamwa balna yakat,
dawak pranimis yamna balna kidika bik niningnakawi
15Nining mikpa kidika Dawan yakat talayang,
kat witing laih di yamadangni balna bitik yang kaupak naikau lawa bahang.
16Dawan yang akat yatalah, dawak mikun yatalah,
kat yang laih alasyang bahang kulnik kidika sau yakat bukna.
17Kulnik kidika baisa sau yakat bukwi;
yang aidayang balna kidika kaupak yalaihta yaktah.
18Kulnik bukna balna kidika dawak warkki balna kidika talah,
dawak dutki balna kidika datang diswang,
19talah yang waihkila balna kidika ampus dutayang
yang niking yakat kulninna dutni daunin kat kukulwi.
20¡Main yatalah, dawak yalaihta yaktah!
¡Datangkat asalni yakat yataih-ānin-awaski,
kat man yakat nakitdaknin kidika waltayang bahang!
21Yang kulnik barangniyang kidika
dawak yang dutni yamtasyang kidika yaklauwi nakitdakwang,
kat man yakat kulnik kidika ātik dunayang bahang.
22¡Yang Papangki,
Israel kidika laihta yakta witing kulnin kaida balna bitik kidika kaupak!
Currently Selected:
Salmos 25: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
