Salmos 22
22
Kulnin kaidak sarahwi, dawak ayangni nuhni yamwi unbaunin
Coro balna sumalniyang kaupak, payahlawarah sanani yal tiunni kapat. Devid salnimo.
1Papangki, Papangki,
¿ais yamta yaruhmta danaman?#Mt 27:46; Mk 15:34.
¿Ais yamta aiwa yalaihta yaktasman?
¿Aidayang kidika amput dawak yadakasmahn?
2Papangki,
pukta madah mayultayang, kauna nangkitlatasman;
¡yang laih sip urupdasyang!
3Kauna man laih maisihni disman;
man king āwaman, bahang Israel ayangma nuhni yamwi.
4Yangna papangkina balna kidika man yakat kulninna awi duduna,
kidika bahang man lawa dilaihta yaknaman;
5man yakat ilp yuyulwak, dilaihta yaknaman dai;
man yakat makukulna bahang alas diyultasman dai.
6Kauna yang laih muih al awasyang, makis as yang;
¡yang laih muih balna nikingkarayang as yang!
7Yatatalwak mahka sarahni yayuyulwi,
wayaki yamwi tunanina#Mt 27:39; Mk 15:29; Lc 23:35. lababahnwi
8dawak yuyulwi:
“Adika muihni Dawan yakat rahm kulwadai;
kaput bahang Dawan yaklauwi laihwi yakwang.
Witing yakat dalani kaltalwa bahang kal-laihwi yakwang.
Kat uba dalani kaltalwa bahang laihwi yakwang.”#Mt 27:43.
9Bahang kaput ki:
man yayamtangkat nanangki bānipas kaupak batahn danayang;
yatangkat witing pasni yakat urupdanayang.
10Yang batahntasyang tanitkauh,
man mainyatalnaman;
yang nanangki bānipas kaupak,
yang Papangki kidika laih man.
11Yang akaupak yadawi kalahwinih,
kat kulnik kaidinin manah bahang,
yang muih ūk disyang ilp yanin.
12Yang waihkila balna kidika turuh ahalmuk kapat ya-awaih dadakna,
sihm Basán tuniruh ahalmuk anyang balna kapat;
13layan anyang balna kapat mamahwi,
tininapas wakahwi yang niking yakat awi aiwi.
14Yang laih sihm was bang'ilwi utuhwa kapatyang;
wakalki kalrikwa balna bitik laihwas dana.
Yang putki minik kidika laih sihm bal as kapat arwi muihki pasyakat.
15Tikpas#22.15 Tikpas: kaput ulna kidika yamni kapat ki. Hibru kau laih yulwi yang paraski. laih buhlana sihm ubasta kapat;
tuki laih iskiparah yakat birna ki.
¡Sau yahamni daunin pāni yakat yataih-ānaman!
16Yang adika sul kapat, muih dudutni balna kidika ya-awaihdadakna,
tingki balna babahna#22.16 Babahna: sara kau ulna kidika laih kaput ulna. Hibru kau laih yulwi layan kapat. dawak kalki balna bitik.
17¡Wakalki balna kidika kultik talnik sipki!
Waihkila balna miniknapa kidika yang kaupak lalawaski;
18yang askina balna kidika sahyakwi duduna,
dawak kidika minit yakat suerte ruhmwi tatalna.#Mt 27:35; Mk 15:24; Lc 23:34; Jn 19:24.
19Kaunah, Dawan man laih yang paraski man,
¡yang kaupak naikau kalahwinih!,
¡sirihni aiwa ilpki awah!
20Isparah kau daunik kidika kaupak yalaihta yakta,
yadatangkat sunilu balna kidika ya-īnin awaski,
21yalaihta yakta, kidika layanni balna tininapas kaupak,
¡kidika tuniruh tamni balna kaupak nakit dakta!
22Man yulma kidika yulna awaki wirahki balna yakat,
dawak aslah alahwayang yakat ayangma nuhni yamna awaki.#Hib 2:12.
23Manna, Dawan kau risnipik kalatamana kidika,
¡ayangni nuhni yamtanauh!
¡Jacob sulani balna manna bitik ayangni nuhni yamtanauh!
¡Israel sulani balna mana bitik ayangni nuhni yamtanauh!
24Kat witing laih dauh kulwas ki, kaput bik dawak bayakwas ki,
muih minikunni wauhwa kidika,
kidika balna niningnayakat witing yakmaldas ki.
¡Witing dakawi ilp kalyuyulwak!
25Tawanma muih mahni muhnitna yakat
barangni man kidika nuhni yamki;
man yakat nuhni mayayamwa muihni balna muhnina yakat
prakimis balna kidika yamna awaki.
26Kastanauh, manna manatataihwa muihni balnamana kidika,
kasta ismangnalak datanauh;
Dawan ayangni nuhni yamtanauh,
manna witing yakat kalwaltamana kidika,
bahang kaput laih sangmanaka naini kawang.
27Nisan balna, dawak sau muih balna bitik,
kaput bik sau bangni kau balnamana bitik yakat:
Dawan kidika ismangna katwang, dawak witing yakat aiwanauh;
¡witing muhni tani yakat limbabahtanauh!
28Kat Dawan kidika laih king bahang,
kat witing kidika laih muih balna taninatuna nuhni bahang.
29Abukta witing yakat manah kulnamna bitik kultanauh,
di manas duyang balna mana bitik,
watta, bitik sau yakat yawanama kidika,
kat manna alasmana laih sangmanaka diski.
30Yang sulaki balna laih kulninna bitik nuhni kukulwi Dawan yakat,
dawak witing yulni kidika sangninaka bitik yakat yuyulna karang;
31usnit dawak batanh dadana kidika laih, witingna yakat diyuyulna karang
la kat yamwa balna kidika, dawak warkni balna bik.#22.31 Hibru kau ulna balna S.d. 29-31 kat kidika laih amangladas ki.
Currently Selected:
Salmos 22: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
