Proverbios 8
8
Sins tuhni tanka yulwa kidika
1Sins tuhni kidika parasni sarahwi yulwi;
dawak sins sirihni kidika laih dinitsuru yulwak dakawi.
2Asang ububulni tuna yakat yaklauwi,
ta bayakwa balna yakat yaklauwi,
3dūrkung balna yakat yuwak dakawi,
tawan nuhni kiwi kāwa balna yakat bik:#Pro 1:20-21.
4“Ahal mana kidika
yakat kiwi yulki balna adika.
5Wawahma di amanglatas, tapadadas balna,
¡lan alahwanauh ismangnapuk atnin
dawak bik amanglatanauh!
6Dakanauh, manayulki kidika
di tanit yamni,#8.6 Di tanit yamni: tiksni kidika yamni kapat ki: Hibru kau laih yulwi tunan balna. dawak bik mailaihwatwas kidika.
7Yulbauki kidika laih rahm ki;
dukih yāwaski alas yulnin kidika.
8Yulki balna bitik laih lā kat ki;
kidika yakat dauh as bik diski.
9Sinsni sirihni dawak di amanglawa muihni kidika yakat,
yang yulki balna laih lāih ki dawak sip kallaihwatwas ki.
10Lalah dawak gol tanit yamni kidika karak bik,
tanit dukih diawi disumalnin dawak
di amanglanin balna kidika.”
11Sins tuhni kidika kauh minit nuhni kulna ki,
kipala dahlwa karak dawakat
¡di tanit dukih diawa kidika
karak bik sip libitwas ki!
12“Sins tuhniyang, sins sirihni kidika karak
aslah yalahtayangna,
amanglatayang yaknik yul tanit yamni sumalwa kidika.
13Dawan risnipik kalanin kidika laih,
dutni yakat maisihni talnin.
Yang waihla talayang witing manah kapat
kaldakanin kidika,
ta dutni dawak alas yulnin kidika bik.
14Yang yakat ki, warkni balna
dawak yamnin kidika bik,
yang kuduh la kat yang kidika
dawak parasni kidika.
15Tingkih kidika yangkaupak ki,
king balna king kakawa kidika
dawak kabamint balna kidika muih rahmni kidik ahawi.
16Yang munah tingkih,
kabamint balna kidika laihwi duduwi
dawak la muihni balna kidika muih lanina yayamwi.
17Yang dalani ditalayang,
dalani yatatalwa balna yakat,
yawawalwa kidika yāyayakwi.
18Ritsni kidika yang lawik yutayang
dawak risnipik bik,
risnipik nuhni dawak baraknin bik.
19Yang yutayang kidika laih tanit yamni ki,
gol karak dawakat;
kaput bik lalah karak bik awaski, tanit yamni ki.
20Yang laih ta barangni munah yawayang,
la kat tani munah.
21Dalani yatatalwa kidika,
witingna duninna kidika diatayang:
ūnina kidika di minit nuhni manah buhngdaki.
22“Dawan yaklauwi yayamna,
tatuna wark yamna kaupak,#Rib 3:14.
baisa di balna bitik yamwas tanitkauh.
23Mani balna tatuna kaupak yayamna,
sau yamwas tanitkauh.
24Kuma wasni nunuhni balna kidika
dis tanitkauh yayakna,
was tuna balna kidika buhrwi kalalahwas tanitkauh.
25Asang balna dawak asangpas
balna kidika yamwas tanitkauh
Dawan uman yayakna dai;
26witing sau adika baisa yamwas dai,
sau yahamni kau sau yamna kidika bik disdai.
27Makau kisang kidika yamna kidika
kuma wasni minit kau,#8.27 Talah Gn 1:6-8.
yang yakat sakyang dai.
28Makau kisang yakat mukus balna āna kidika
dawak kuma tuhni kau buhrwi kalahwa balna yamna,
29kuma yakat aput atnin pakna
kiwi watwa kidika kaupak bayaknin awaski,
sau rahni balna āna kidika,#Job 38:8-11; Sal 104:6-9; Jr 5:22.
30yakat sakyang dai, yaihnit yakat.
Minit balna bayakwa bitik yakat alasninayang dai,
dawak witing muhni yakat isdayang dai,
awar balna bitik yakat;
31sau yamna kidika yakat yakisdadai,
¡isinglak dakanayang muih kidika yulni!#Job 28:23-27.
32“Dawak waradika laih walakibis balna dakanauh,
yang amput yamnayang kaput yamtanauh,
ismangnalak awanama.
33Sumalwa yakat dakanauh;
sins tuhni kidika ruhmwi dadawinih.
34Isninglak ki, kidika muihni yadakawa kidika,
ma bitik yakat tahahawi,
yang ūki dūrni balna yakat.
35Kat yang adika yāyaknin laih,
sangka atnin kidika yakna kapat ki
dawak Dawan kulnin yamni kidika duna atnin;
36kaunah yang kaupak yaklawa kidika laih
sangnika yamadangni yakat āwi;
maisihni ya tatalwa balna kidika laih
daunin yak dalani tatalwi.”
Sins tuhni dawak tapadadas
karak biri biri niningkauh kidika
Biblia Sumo
Texto © Sociedad Bíblica de Nicaragua 1998