Proverbios 7
7
Yal la bahyang kidika dutni manas amanglawi
1Walakibis, yulki balna daka yamtah;
yang laki balna kidika kulnam yakat āta dutah.
2Laki balna dawak sumaltayang balna kidika daka yamtah;
muih yal bin mamakpa sumani talaman kapat apaktah,
kaput laih sangka awama.
3Tingma bikis balna yakat sittah,
dawak kulnam yakat āta dutah.
4Sins tuhni kidika wirahma yal yamtah,
sins sirihni kidika kaltalyang yamni alahwah.
5Kidika balna yaklauwi yal la bahyang kidika kaupak
malaihwi yayakwarang
yul kau kulnin laihwa yalni as talasman kidika.#Pro 2:16.
6Ma as kat yang talasakyang kat
winkidar yakat
7Wawahma di amanglalawas balna kidika yakat,
dawak talnayang kidika balna pasyakat
tanit isning aiwas kidika.
8Sipintang yakat kiwi tabadakna
kidika yalni ūni niningyakat.
9Uman masan dai,
mahka puksani kalwadai.
10Yal kidika sirihni niningkauh kalahwi kiuna,
ahal manas karak kalangwa yalni
amput yamwa kidika bitik yamna,
11yal as sirihni, ting di yamwa kidika
witing ūni yakat sip sak-awas kidika
12tapas yakat, muih kalududuhwa pāni yakat bik likkidika
tahawi angdika tatuna bayakwak laihna atnin.
13Yal kidika wahma yakat laihwi umna,
dawak asalni dis kalyulna:
14“Pramis yamnayang dai warmani,
watwi wanaihni karak yamni kalahnin sakripais kidika yamnin,
bahang warmani prakimis kat yamnayang.#7.14 Papang karak watwi yamni kalahnin yulni sakripais buswa kidika, dimuihni apis duwi (Lv 7:16). Kaput bahang yal kidika yulwi witing ūni yakat di kasnin duwi.
15Kidika bahang namangkauh alah'aiwayang;
¡matalkih yana dai, bahang kalpakdi!
16Paki minit yakat rinayang
linin asnina Egipto yakat yamna kidika nuhni kat,
17di walapni kau kahnayang
mirra, áloe dawak canela.
18Aiwah, dalani talnin sūnitak pasyakat mahawang;
dalani talnin alasnina dudang payahlawak kat,
19Yang alki laih ū yakat diski:
kalahwi pa naikau kiuna;
20lalah mahni duwi kiuna
waraput laih kaiwas ki, waiku diknipih
mani kat kaiwarang ki.”
21Witing yulni damni wat wat yulna
bahang wahma kidika kulnin laihna,
22yal kidika usnit yakat kiuna:
turuh almuk as inin pāni yakat duwi kiwa kapat,
sihm sana as laihnin dini malnikau āna yakat bukwa kapat
23tihndawak sibang as witing putni minik pawi sahwi;
sihm uhubin as daklana lilingni yakat kiwi bauwa kapat
amanglawas ki, witing sangnika diswarang kidika.
24Kaput bahang, walakibis dakah;
yang yulki balna kidika dakah.
25Man kulnam, kidika yalni yakat datang kiunin awaski;
kidika yal dangnit yakat kiwi pini diswinih,
26kat manas palni laih daunin yakat diduwi kiuna;
¡ina balna kidika laih mahni ki!
27Witing ūni yakat kiunin tani kidika dunin laih
daunin tani yakat laihda kapat ki.
Biblia Sumo
Texto © Sociedad Bíblica de Nicaragua 1998