Proverbios 9
9
1Sins tuhni kidika laih ūni yamwi,
rahni tiaskaubu yaksisihni karak yamna;
2tinglau balna ina alasnina yamnin,
wain tanit yamni kidika yamna,
dawak tibil yakat lakna
3dawak muhna muihni yakat sihna sarahna atnin
tawan nuhni kidika tuna kaupak:
4“¡Akat aiwah, wawahma di amanglatasmana kidika!”
Sihwak diyuyulna isningnapuk awas balna yakat:
5“Aiwa kastanauh kasnik kidika kaupak
dawak ditanauh wain ridi yamnayang kidika.
6Ismangnapuk awasmana kidika datanauh,
kaput laih sangka awanama;
muih sinsnina siririhni kapat awanauh.”
7Tapdadas dawak muih dutni kidika
barangni atah,
dutni mayulnin dawak
mausnin kidika manah laih yakma.
8Tapadadas yakat biltah, waihla kalaih yakma;
sins duyang kidika barangni atah,
yamnin matalnin kidika yakma.
9Sins duyang yakat kalatah,
dawak baisa sins duyang kalahwarang;
muih al yamni yakat sumaltah,
baisa di amanglawarang.
10Sins tuhni kidika laih
Dawan yakat risnipik kalanin;#Job 28:28; Sal 111:10; Pro 1:7.
Holi muihni yakat amangnilanin laih
sins sirihni dunin.
11Sins tuhni tingnikih kaupak,
ma mahni sangka awama
sangmaka kidika kurih mahni duma.
12Sins duyangman kat,
di dunin kidika laih man dima karang;
kaunah tapadadas man laih, man silp talma.
13Tapdadas kidika laih yal as yul trukyang kapat ki,
mutu di amanglawas kapat ki.
14Witing dūrni yakat, sini as kau duwi yalahwi,
tawan nuhni paskau tanit maluihni yakat,
15dawak muih bayakwi uiwa balna yakat diyulwi
ta yamni kau uiwa balna yakat:
16“¡Akat aiwanauh,
wawahma di amanglatasmana kidika!”
Isningnapuk awas balna yakat diyulwi:
17“Malna wasni kidika laih tanit auhni ki;
yakmaldi plawar busna kasnin laih tanit yamni ki.”
18Kaunah witingna amanglalawas ki
yulwak uina muihni balna kidika
daunin pāni yakat wayanina manah kidika.
Biblia Sumo
Texto © Sociedad Bíblica de Nicaragua 1998