Proverbios 6
6
Muih di tras yakwak ilpni kanin yulni
1Walakibis, kaltalyang yamniman kidika muihni
di as yakwak ilpni āwaman kat
kidika awaskat talasman muihni kidika tunan minit āwaman kat,
2man alas laihnin dini malnikau āna yakat buktaman:
man silp yulbautaman kidika karak bukma.
3Kidika kaupak pri alahwanam kat, walakibis,
muih ūk tingni yakatman,
adika yamtah:
man manah kapat kaldakaman kidika dalpamdata,
dawak kaltalyang yamni mana yakat minit kalyultah.
4Kaminih,
minit as bik wingmata puhwinih.
5Sana as di iyang muihni yakat talwi kira kapat irah;
dawak uhu as laihnin dini malni kau āna kat
talwi kira kapat irah.
Baskiwah balna yakat kulninna dulauwi
6Yawa talah kidika yakat, baskiwah muihni;
di yamwa yakat talah, dawak lan alahwah:
7muih as bik diski witing yakat wark paknin
dawak muih diski kalyulnin adika yamtah,
8kurih yakat witing kasnin balna kidika puwi duwi,
di minik bahnin mani yakat puwi duwi.
9¡Baskiwah, amaman kidika datah!
¡baisa kalangnin awaski!
10Man mamakauhwak arahntaman,
dawak kalwakaihtaman, tanit yamni kaminin yulni,
11minikunni atnin kidika kaiwi mabauwarang
Bakus as kalbaunin dini duwa kapat.#Pro 24:33-34.
Muih dutni kulnin balna
12Muih dutni kidika laih
alas manah yulwi likki;
13minikpa suyungwi,
kalni kau bik wayani yamwi,
dawak tingni bikisni kau bik sain yamwi;
14Witing kulnin kidika laih dutni ki,
di dutni yamnin kidika manah kulwi
muih kalbaunin kamanah yamwi.
15Kidika bahang minit as yakat, dutni kidika kaiwarang ki;
mamakpa sipikta sahmuhtang kat
di as yamnam bik sip-awas karang.
Dawan dutni talwa kidika
16Di tiaskauas ki, tiaskaubu kat bik ki,
Dawan, bitik palni dutni talwi:
17Miniknapa dadasni tatalwa kidika,
tuni alasmanah yulwa kidika,
tingnina kau muih dutni yayamwas balna yakat ihiwa kidika,
18kulninna yakat di dutni yamnin kukulwa kidika,
kalnina kau kikira kidika di dutni yamkih diawak,
19witnis dauh alas muihni kidika,
witing yamwak kalwirah karak kalbabauwa kidika.
Marid lani bahwak ais kaiwa kidika
20Walakibis, kulnam yakat ban āta dutah
papangma lani balna dawak sumalna kidika bik.
21Ismang yakat ban kaput yaduyawah,
damamak yakat sitta dutah.#Pro 1:8-9.
22Angkat alahwa yawaman kidika tāmatuna kawi kiwarang,
namatdakwarang, amangkat,
dawak sahmuhtang kat man karak yulbauwarang.
23Rahm kidika laih la balna dawak sumalna balna kidika
laih awas dahlna as ki;
barangni kalyakwa kidika dawak yul sumalwa kidika
kidika laih sangka atnin tani.#Sal 119:105.
24Yal dutni kidika kaupak namatdakwarang,
muih yalni yulni balna damni kidika.
25Datang kat muhni yaksihn kidika yaklauwi,
dukih mawa kidika malaihwarang;
¡minikpa matalwa kidika datang malaihnin awaski!
26Yal as ahal manas karak kalangwa kidika laih
kasnin dini walwi kiwi,
kaunah marid lani bahyang kidika laih
muih al yakat walwi kiwi.
27Wais kat pasni yakat kuhpau uhwa kidika laih,
prakni bik buswarang ki.
28Kuh tuturni minityakat lapakwa kidika laih,
kalni buswi.
29Muih yalnina karak kalbalakwa kidika laih,
wah duwas laih bayakwas karangki.
30Muih as bik dauh kalkulwas awaski dimalyang yakat
witing yuhdauwa kidika yulni di malwa kidika;#6.30 Muih as bik...malwa kidika: satuk wirlanin sipki: Di malyang kidik dauh kalkukulwi, yuh dauwa yulni di malwa karang bik.
31di malwak lalaihwarang bik,
di malna kidika wat tiaskaubu minit yakat lakwi kalawarang,
di duwa kidika bitik bik kalawarang.
32¡Ais isningpuk awasyah witing
muih yalni karak likkidika!
¡Wais kaput yamwa kidika silp kaldaukalwi!
33Baunin dawak dutni kalyulnin balna
niningyakat yaklauwarang,
risnipik dis kalwa kidika ban kaput karang, diswas.
34Kat al, yal minit-anyang kidika laih kuhpau kapat ki,
biri kalyamnin awarni kaiwak dawak bayakwas ki;
35uswas danin kidika dukih kalawas ki,
di prisant balna kidika bik kulnin yamni kalwas ki.
Biblia Sumo
Texto © Sociedad Bíblica de Nicaragua 1998