Proverbios 5
5
Yal īsi kidika laih muih al disnin
1Sinski tuhni kidika dakah, walakibis;
sinski sirihni kidika yamni dakah
2Kaput laih di bitik barangni manah yamma
sip awama yulbaunam sins lani karak.
3Muih yalni kidika yulni damni ki
dinitsuru yulwa kidika yudutni ki sihm disala kapat;
4Kaunah tapahlni kalahwi witni kat
dibasta tapalhni kapat
dawak tanit baini ki,
isparah anan nabupak duwa karak dawakat.
5Kidika yal karak atnin laih daunin yakat dukiwi;
lapakwi kiwa kidika laih sau-ū yakat barangni kiwi.
6Kidika yal laih isning kulwaski sangka tani kidika
witing talwaski kiwa tani kidika dutni bik.#5.6 Kidika yal...tani kidika dutni bik: tiksni kidik yamni kapat ki. Hibru kau laih amangladaski.
7Kaput bahang, walakibis, yadakah,
sumaltayang kidika kaupak dawi yaklawinih.
8Muih yalni kidika kaupak naikau alahwah;
witing ūni dūrni yaihnit yakat bik kiwinih,
9kaput laih kurih mahni ritsni balna kidika disnam awas
muih dudutni, talasman balna tingnina yakat;
10kaput laih muih talasman kidika kalbuhng danin awaski
man wark alahwanaman balna minik kidika kaupak.
11Kaput awas karang kat, aidama
man muihma nuhni kidika tani tani witwi kiwakat.
12Dawak yulma: “¡Amput dawak dauh kulnayang daih
barangni yahawak!
¡Ampadawak yabilwa kidika dutni dakanayang daih!
13¡Dakakih yāwasdai maestro yakat,
yasumamalwa yakat dakasyang dai,
14baisa binilah dai dutni yakat yawinik
tawan bitik muhni yakat!”
15Was damat buhwa kidika ditah
man silp pama kuhrnaman kidika kaupak.
16Wasma buhrwi kalahwa kidika kaupak utuhwinih;
pini dauh utuhwinih tapas yakat.
17Pakudungni dawak was kidika laih man dima,
muih ūk dini awaski;
¡muih pini talasman balna kidika yakat diawinih!
18¡Blisyamna kawang wasmatuna kidika!
¡Wahma man yalma kidika karak alasna dutah
19yudutni dawak dalani talwa sananibin kapat!
¡Laihta umtaman ban kidika!
¡Witing dalani talwa kidika kau mawadatwa kidika!
20¿Ais yamta dutni alahwamayah, walakibis, muih yalni karak?
¿Ais yamta yal as talasman kidika tingni yakat bukmayah?
21Dawan laih talwasakki, muih al di yamwa balna kidika karak;
angkat lapakwi kiwa balna kidika bitik talwi.
22Muih dutni kidika sihm dutni yamwa kidika kallaihwi;
witing dutni yamwa kidika yaklauwi kalsitwi wah kapat.
23Yamni yamwas kidika yaklauwi daunin yakat kalduwi kiwi;
tapani dadasni kidika yaklauwi disnin yakat duwi kiwi.#Pro 7:6-27; 23:27.
Biblia Sumo
Texto © Sociedad Bíblica de Nicaragua 1998