Proverbios 4
4
Ta yamni yakat kiunin yulni kulnin dulauwa yulni balna
1Walakibis balna, papangma yul sumalwa kidika dakah;
yamni dakah, kaput laih la kat atnin kidika duma.
2Yang lawik yamni sumalnayang,
kaput bahang sumalnayang balna kidika pini dadawinih.
3Kat yang bik walanibis yang dai:
nanangki dalani yatalwadai
4dawak papangki laih kaput yul yasumalwadai:
“Yulki balna kidika kulnam yakat āta dutah;
yamnin mapaktayang kidika yamtah, sangka awama.
5Sins tuhni dawak la kat atnin kidika dutah;
yulki balna kidika datang damatkahnin awaski.
6Sins tuhni kidika dalani talah, ruhmwi dawinih
kidika yaklauwi namatdakwarang.
7Di balna bitik pasyakat tanit ki,
sins tuhni dawak la kat atnin kidika dutah.
8Dalani talah, madulauna karang;
wakaihtah, risnipik mawarang;
9¡paknin tanit yamni kidika prisant mana karang
dawak kidika kau kraun mapakna karang!”
10Yulki balna dakah, walakibis,
dima dutah, sangmaka naini mawarang.
11Yang madutik yawaki, sins tuhni tani munah:
matingkat ta yamni munah lik-awama,
12tamapas yakat makapahwas karang,
kalma bauta buktas awama, irama bik.
13Sumalna yakat laihtah, pini dawinih;
warkni yamtah, kidika laih man sangmaka.
14Muih dudutni balna dangnitna yakat kiwinih,
dudutni yayamwa kidika usnitna uiwinih.
15Witingna tanina munah bayakwinih,
witingna kaupak naikau lāwah, tamat yakat yawah,
16dutni yayamwas kat isningna aslah awaski;
miniknakauhwas ki, muih as kau dutni yayamwak bukwas kat.
17¡Kidika laih witingna kasninna dawak dininna
kidika laih dutni dawak kalbaunin lani!
18Lā kat balna tanina kidika laih, ma payahlawak
yaringni kaiwa kapat ki:
baisa kilwi kiwi yaringni kidika bitik duwa kapat.
19Kaunah dutni balna tanina kidika laih puksani ki;
¡ais yakat kalnina babauwa pa amanglalawas ki!#Sal 1:6.
20Yulki balna dakah, walakibis;
yamni tapayuta dakah.
21Mamakpa kaupak dawinih,
¡kulnam yakat āta dutah!
22Kidika yaklauwi sangka dawak muihni yamni bik
yayakwa muihni balna bitik kidika.
23Kulnam yamni maintalah, sau akat dini balna karak dawakat,
kat kidika laih sangka atnin rikni bahang.
24Alas yulnin kidika datah;
alas yulnin kidika kaupak naikau lawah.
25Tamat yakat manah talah,
muhmat yakat manah talah.
26Angkat kalma ataktaman kidika yamni talah,
kaput laih sau dadasni yamni yakat atakma.
27Tama kidika kaupak data kalahwinih;
dutni yakat lapakta yawanam kidika datah.
Biblia Sumo
Texto © Sociedad Bíblica de Nicaragua 1998