Proverbios 3
3
Amput sins tuhni laihnin kidika
1Walakibis, yul masumaltayang kidika damatkahwinih;
kulnam yakat āta dutah lāki balna kidika,
2kaput laih sangmaka naini duma
dawak ismanglak kidika mabuhng karang.
3Dalani lani dawak di rahm kidika ruhmwi dawinih;
man karak yawah sihm alah kapat;
kulnam yakat āta dutah,
4duma ilp dawak yamni matalnin kidika
Papang kaupak dawak muih kaupak bik.#Lc 2:52.
5Kulnam bitik āta dutah Dawan yakat
kaunah man alas sinsma sirihni yakat laih awaski.#Rom 12:16.
6Di balna yamtaman bitik kidika, Dawan kidik dutah,
witing ta barangni munah maduwi kiwarang.
7Sins duyang kapat laih kaldakawinih;
Dawan yakat rispik kalatah dawak dutni kaupak lawah:
8¡kidika laih sika tanit yamni ki
muihma nuhni parasni atnam!
9Dawan risnipik kalatah ritsma balna kau
di minik tatuna yaktaman balna kidika kau;
10kaput laih tutna karang bahngwi
dima minik balna putaman dawak wain putaman kidika bik.
11Walakibis, ruhmwi dawinih, Dawan barangni yamwa kidika,
mabilwak kulnam daukalwinih;#Job 5:17; Hib 12:5-6.
12kat Dawan yaklauwi barangni āwi wais yakat dalani talwa kidika,#Rib 3:19.
papang as yaklauwi walanibis dalani talwa yakat barangni āwa kapat.#Dt 8:5; 2 Sam 7:14; Hib 12:5-6.
13Isninglak ki wais kat sins tuhni yakwa kidika,
dawak sins sirihni duwada kidika;
14kat tanit yamni bahang lalah karak dawakat
kaput bik laih tanit ilp mayawi gol karak dawak.
15Sins tuhni kidik laih tanit minit nuhni ki
kipala minit nunuhni karak dawak;
¡di dukih mayawa balna kidika karak bik sip libitdaski!
16Tingpal niningkauh kidika, sangnika naini kalawi,
dawak wadahni kau laih ritsni dawak risnipik kalawi.
17Uiwi kiunin kidika laih di yamni ki;
kidika tani munah kiunin laih kulnin aslah lani.
18Sins tuhni kidika laih sangka atnin, wais duwa kidika;
¡laihwatwi dunin sip balna kidika laih isningnalak ki!
19Sins tuhni dawak sins sirihni karak,
Dawan yaklauwi makau kisang dawak sau kidika yamna;
20sins tuhni karak yamna, kuma sahwi yakna kidika
dawak mukus kaupak was buina atnin.
21La kat atnin kidika ban dutah walakibis,
di barangni manah yamni kidika mamakpa kaupak kalahnin awaski,
22kidika laih man namangyakat sangka atnin karang
alah yaksihn as kapat karang.
23Ismang yamni ta yakat lik-awama
dawak watas bik kalma bauta buktas awama.
24Wingmata puhtaman yakat, yamadutas awama;
alangwama kat, ismanglak amama.#Sal 3:5; 4:8.
25Sirihni yamadangni kalahwa kidika yamadutas awama
muih dudutni balna minitna yakat dutni kaiwarang kidika bik,
26kat Dawan yaklauwi kulnam yakat āta dunam mawarang bahang
madawak laihnin dini malni kau ahana yakat bukta awama.
27Damawan balna ilp yuyulwak diatas atnam awaski,#Mt 5:42.
man yamnin sipman kat.
28Dawinih yahan mani kau
warmani ilp kalanam kidika.
29Wark dutni yamnin kidika ridi kalahwinih
man yakat kulnin āwi duwa muihni niningyakat.
30Muih as karak bik kalbaunin walwinih,
muih as bik dutni mayamwas kat.
31Tumwinih muih dutni kidika
witing yamwa kaput bik yamwinih;
32kat Dawan laih muih dudutni balna kidika dutni talwa bahang,
kaunah muih yayamni balna yakat laih isning āwi duwi.
33Dawan yaklau la tuhwi, muih dutni ūni yakat,
kaunah muih la kat ūni yakat laih blisin kalawi.
34Sarahni yulyang balna yakat Dawan sarahni diyamwi,
kaunah limahni balna kidika laih miniknakun ditalwi.#Jm 4:6; 1 Pi 5:5.
35Rispik kidika laih, sins duyang balna prisantnina,
kaunah tapdadas balna kidika laih rispik dis kidika yayamwi.
Biblia Sumo
Texto © Sociedad Bíblica de Nicaragua 1998