Proverbios 2
2
Sins tuhni yamni duaiwa kidika
1Walakibis, yulki balna kidika dima dutah;
yang lāki balna kidika kulnam yakat dutah.
2Sins tuhni kidika tapayuta dakah;
kulnam kidika sins sirihni yakat atah.
3Man parasma bitik karak yultah
sins sirihni dawak la kat atnin kidika;
4muihma bitik palni āta waltah,
lalah kidika awaskat di minit nuhni malna sakkat waltaman kapat.
5Kaput laih amanglama Dawan risnipik lanin kidika;
¡Papang amangnilanin kidika walta yakma!
6Dawan kuduh yaklauwi sins tuhni yuwa kidika;
sins lani dawak amanglanin kidika, witing kungnimak kaupak kalahwi.
7Dawan laih ilp yuwi dawak nanitdaknin bik
barangni palni yalalahwa balna kidika;
8La kat uiwa balna kidika maintalwi,
witing niningyakat barangni balna kidika nanitdakwi.
9Dawak bik amanglama barangni dawak la kat kidika,
dawak di yamni balna kidika yakat tapayuma,
10kulnam kidika sins tuhni duwarang
di amanglanin damni kidika dakaman.
11Barangni lakat dawak sins sirihni
kidika minit bitik yakat namatdakwarang;
12kidika yaklauwi ta dutni kaupak malaihwi yakwarang
dawak muih ahal dudutni kaupak,
13ta yamni dadawa balna kidika
laih ta puksani yakat uiwi,
14di daukakalwa kidika alasnina
dawak alalaswi di dutni yayamwa kidika,
15ta wirni yakat uiwi
ta barangni kidika kaupak dawi kalalahna.
16Muih yalni kaupak bik malaihwi yakwarang
kulnin laihnin yulni#Pro 7:5. balna kaupak bik
17witing sirau dai kidika yakat alni dai kidik dāwi
dawak Papang karak pramis dai kidika bik dinitkahwi.
18Witing yakat kiunin tani kidika dunin laih
daunin tani yakat dudi mawa kapat ki;
19ūni yakat uiwi kakawa kidika laih nawatwi aiwaski,
sangka atnin tani yakat watwi nawatwi aiwas ki.
20Kaput bahang ta yamni yakut yawah,
la kat balna yayamwa kidika yamtah.
21Kat barangni yakat yalalahwa balna kidika laih
sau kat ban sangka karang;
22kaunah muih dudutni balna kidika laih
dutwi yakwi ruhmmukna karang sau kaupak.#Sal 37:9.
Biblia Sumo
Texto © Sociedad Bíblica de Nicaragua 1998