Proverbios 23
23
- 6 -
1Muih nuhni as di kasnin maduwi kiwak,
yamni kulta talah wais muhnit yakat sakmahn.
2Yuh daunaman karang bik,
ismang aitah;
3kasnin auhni kidika tumwinih,
sipki alas mayulnin.
- 7 -
4Uba parasni yamwinih rits alahwakuhti;
kulta kalbautaman kidika datah.
5Yamni talma kat, ritsni kidika diski;
sirihni yaklauwi kiwi yakalnuh kapat,
lawanina kalahna kapat.
- 8 -
6Dutni dukih kalawa muihni karak kalpakwinih,
kasnin dini auhni duwa kidika tumwinih,
7kidika laih bas as dinitsuru yakat kapat ki:#23.7 Bas as dinitsuru yakat kapat ki: grik kau kaput ulna. Hibru kau laih amangladaski.
witing mayulwi madukiwi kasnin dawak dinin,
kaunah di rahm laih yulwas ki;
8usnit kat tamangyakma kasnaman kidika
yulma yudutni yulnaman kidika dauh manah karang.
- 9 -
9Tapdadas tapani yakat yulbauwinih,
sins lani yultaman kidika sarahni yulwarang.
- 10 -
10Lain umani balna kidika pa ūk lawinih,
dawak warau saunina yakat kawinih,
11kat witingna dilaihwi yaknin parasni as duduwi,
nanitna dakwi, man namang yakat kalahwarang.
- 11 -
12Kulnam dawak tapama balna dakah
masumalwa kidika dawak di amanglanin kidika bik.
- 12 -
13Wahma yakat barangni ātaman kidika dawinih,
wah as as kidika yaklauwi sip iwas karang;
14nawatkauh laih, barangni āma kat,
daunin kaupak laihta yakma.
- 13 -
15Walakibis, sins tuhni kidika duma kat,
muih ūk alasna dis karang yang apat;
16alasna palni dakaki
amput yulbaunin kaput yultang dakaki kat.
- 14 -
17Dutni yamyang balna yakat tumwinih;#Sal 37:1-4.
kaunah Dawan yakat ban risnipik kalatah;
18kaput laih witni kat yamni yawama#23.18 Witni kat yamni yawama: grik kau kaput yulwi. Hibru kau laih yulwi witni as yamni duma.
tahanin dutaman kidika bahwi uhwas karang.#Pro 24:14.
- 15 -
19Walakibis, yami dakah dawak lan alahwah;
ta yamni munah yawah.
20Wasak muihni balna karak kalpakwinih
dawak di mahni kasyang balna karak bik,
21kat wasak muihni dawak di mahni kasyang balna
kidika laih muih miniknakunni kakalwi,
dawak baskiwah balna laih asna utuhni kakawi.
- 16 -
22Kaldakah, papangma mayakna kidika yakat;
nanangma muihbarak kalwak dauh kaltalwinih.
23Di rahm kidika dawak sins tuhni kidika bakantah,
sumalwa balna dawak amanglanin kidika laih wauhwi bakanwinih.
24Dawak papang walanibis yamni sins duyang kidika
rahmni duwi isninglak dawak witing manah kapat kaldakanin;
25¡Yamtah, papangma, nanangma
isningnalak, dawak witingna manah kapat kaldakakawang!
- 17 -
26Yang akat yamni yadakah walakibis,
samkipla balna kidika yamni palni talah;
27kat amangladas yalni, ahal manas karak kalangwa kidika,
kidika laih pa kuhrna pāni binibin tuhni kapat ki;
28yakmaldi tahawi dimalyang kapat,
dawak yamwi muih manas disnin yulni.
- 18 -
29¿Wais wauhwih? ¿Wais dalawak yulwih?
¿Wais kalbilwi dawak kaidih?
¿Wais kaldaknayah pini kaupak?
¿Wais talwak pukni duwih?
30Wain dawas muihni kidika
dawak dinin dini wisamni sat sat yamwa kidika.
31Wain yakat talwinih.
¡Ampat pauni kalwih dawak yaringni bik kalwi sutak yakat!
¡Ampat yudutni kawikiwih!
32Kaunah witni yak laih sihm bil kapat ki
kaswak dalawa kidika.
33Taldas dini mating talma,
kulnin dawak yulnin di pini manah;
34mayamtingkat kuma pasyakat kapat kaldakama,
panan nuhni tuna sutni kau alangwanaman kapat.
35dawak yulma:
“Yababauna, kaunah kaldakasyang dai;
yawiwisna kaunah amanglatasyang dai;
kaunah sahmuhki kat
baisa wain waltik yawaki.”
Biblia Sumo
Texto © Sociedad Bíblica de Nicaragua 1998