Proverbios 24
24
- 19 -
1Tumwinih muih dudutni balna yakat
dukih manin awaski di yayamwa pasyak atnin,
2kat kalbaunin yakat manah kukulwa bahang
di dutni yamnin kidika manah yulbabauwi.
- 20 -
3Sins tuhni karak ūnina yayamwi,
sins sirihni karak rahni balna uhukwi;
4di amanglanin karang payahnin pāni kidika buhngki
di minit nunuhni yayamni balna kidika.
- 21 -
5Ahal sins duyang balna kidika tanit
yamni ki pararasni karak dawakat;
amanglanin kidika tanit ki, parasni karak dawakat,
6kat war kalbaunin kidika yamni ridi kalwi kalbauwi
dawak minit bayaknin kidika laih
la manas sumalwa kidika munah ki.#Pro 11:14.
- 22 -
7Tapdadas kidika amanglawaski
la ūni yakat ais yulwarang kidika,
kat sins tuhni kidika sip laihwas bahang.
- 23 -
8Wais kat daukalnin manah kulwa laih,
dutni yamnin manah kulwi kalatwi.
9Tapdadas yamnin kulwa kidika laih, dutni;
¡muih as bik sip wauhwas ki tapdadas kidika!
- 24 -
10Pāt malaihwak kulnam bukwak,
parasma kidika nuhni dutasman.
- 25 -
11Daunin yakat wirlana balna kidika laihta yaktah;
daunin manah bangkidika yamadangni kaupak laihta yaktah.
12Amanglatayang tima bik,
la yamwa muihni kidika amanglawarang;
yamni amanglawarang matalwasak muihni kidika,
lauwi diawi ais yayamna kat
minit praisni kat, bitik kau.#Job 34:11; Sal 62:11-12; Jr 17:10; Ez 18:30; 33:20; Mt 16:27; Rom 2:6.
- 26 -
13Walakibis, ditah, amak wasni damni kidika;
dita dakah ampat auhni kidika.
14Kidika damni kapat dakama
sins tuhni dawak di amanglanin kidika bik;
kalpakma kat, witni kat yamni awama
dawak tahanin dutaman kidika bahwi uhwas karang.#Pro 23:18.
- 27 -
15Muih dudutni balna ridi kakalwinih
muih al yamni manah yamwa niningyakat,
witing ūni yakat daukakalwinih,
16wat tiaskaubu bukwarang bik,
sihm kaput yaklauwarang;
- 28 -
17Alasna kalahwinih dawak alasna bik yamwinih
waihmala bukna kidika yulni,
18kat Dawan laih kidika talkih kalawas bahang,
kulnin daukalna kidika yakpamwarang witing kaupak.
- 29 -
19Kulnam daukalwinih muih dudutni balna yulnina
dawak bik tumwinih.#Sal 37:1.
20kat muih dutni laih witni yakat yamni awas karang bahang:
¡muih dutni kidika laih awas kapat piwarang!
- 30 -
21Walakibis, rispik kalatah Papang yakat dawak king yakat;
waihla balna karak kalpakwinih,#24.21 Waihla balna kalpakwinih: tiksni kidika yamni kapat ki: satuk wirlanin sipki: yaihnitna yakat awaihwinih. Hibru kau laih amangladaski.
22kat di daukalnin kidika minit as
witingna yakat kiwarang bahang
muih as bik amanglawaski wah diawarang kidika
Papang dawak king bik yaklauwi kalawarang kidika.#24.22 Wah diawarang kidika...kalawarang kidika: wirlana yamni kapat ki. Sipki satuk wirlanin: yaihnitku awawaihwa balna wah duduwa kidika (kidika awasbik waihla balna). Hibru kau laih amangladaski.
Sins duyang balna yulnina ūk
23Adika balna bik sins duyang balna yulnina:
Yamni awaski la ūni yakat
muih as kau bik dauh kalkulnin awaski.
24Pāt dis muihni yakat pāt duyang kalkulwa kidika,
tawan yaklauwi dutni diyuyulwi
dawak nisan balna dauh dikukulwi;
25kaunah wais yakat wah kalawa kidika laih yamni kalahwi
dawak muih balna bik yamni dikukulwi.
26Yamni nangnitlawa kidika laih
kungnimak yakat umwa kapat ki.
27Tapas yakat yamnam balna kidika barangni alahwah
dawak yamak yakat warkma kidika yamtah,
dawak usnit kat sip awama ūma yamnam.
28Yaihmat kau muihni yulni pini yulwinih
dawak bik alas yulwinih.
29Kulwinih biri kalyamnam,
witing mayamna kapat biri kalyamnam.
30Baskiwah yanimak munah bayaknayang
dawak tunanba dis wainni pasmunah bik bayaknayang:
31dawak talnayang dai sau as ukung manah ukusna kat,
kipala kau itikna kidika bik sau yakat bubukna.
32Kidika talik, kulnik yakat atik dunayang;
kidika talik lan alahwanayang:
33man laih amangkat,
dawak yamni kalwakaihta amaman,
34minikunni atnin kidika kaiwi dahn mayamwarang
bakus kalbaunin dini duwa kapat.#Pro 6:10-11.
Biblia Sumo
Texto © Sociedad Bíblica de Nicaragua 1998