Proverbios 19
19
1Tanit yamni ki minikunni dawak dutni yamwas atnin kidik,
dawak tapdadas, muih alasni yulnin karak dawakat.#Pro 28:6.
2Yamni awaski dukih palni kidika kulwi talwas atnin;
di sirihni yamwa kidika dutni manas kalahwi.
3Muih al tapdadas kidika yulni ta diswi,
dawak usnit kat muih al kidika yaklau Dawan yakat pāt ilwi.
4Ritsni kidika yaklauwi kaltalyang manas aiwi,
kaunah minikunni kidika laih kaltalyang yamni bik diswi.
5Witnis alas kidika wah duwas bayakwas ki;
alas muihni kidika yamni kallaihwi yakwas karang ki.#Pro 19:9.
6Kulnin yamni dawak sat ūk kaldakawas kidika,
muih bitik kalwawalwi kaltalyang yamni kalalahwi.
7Minikunni kidika wirahni balna bik dauh kaltatalwi,
kidika bahang kaltalyang yamni balna bik
witing kaupak kalahwi uiwi.#19.7 Hibru kau laih yul arungka minit kau lakwi, tanka amangladaski.
8Lan kalna kidika kaput warkni yamwa kidika,
witing silp dalani kaltalwi dawak barakwi.
9Witnis alas yulwa kidika wah duwas bayakwas karang;
alas muihni laih daunin kidika tani tahawi.#Pro 19:5.
10Tapdadas dini palni awaski,
di yaksasihn balna dauh kapat yamnin kidika,
dawak bik kuihwas palni ki, muih dini yamyang
kidika dawan nunuhni balna minitna yakat kabamint kanin.
11Isningpuk atnin kidika laih kulnin daukalwa kidika laihwatnin,
dawak rispik kidika laih, uswak bik dakawas kapat kidika.
12King kulnin daukalna kidika laih layan ihwa kapat ki,
kaunah kulnin yamni kidika laih diwas kapat ki
dibasta minit yakat.
13Walanbis tapdadas kidika yamwak Papangni wauhwi.
Was tahwa laihwatwas kapat ki yal kalbauyang kidika.#Pro 27:15.
14Papangni balna kaupak ū dawak ritsni kidika duwi;
dawak Dawan kaupak duwi witing yalni sinsni sirihni kidik.
15Baski kalyamwak kasak kami,
dawak baskiwah laih yul wauhwarang.
16La yulwa kaput yamwa kidika sangnika nanitdakwi,
Dawan sumalwak dauh kulwa kidika laih dauwi.
17Minikunni yakat wayaki kalataman kidika laih
Dawan yakat wayaki kalataman,
bahang Dawan yaklauwi lauwarang trasni kidika.
18Walamabis barangni atah, baisa barangni ānin sip yakat,
kaunah iwinih, wah kalataman kidika yulni.
19Uba kulnin daukalwa kidika, minit duwi;
wah kaupak dakyaknin laih baisa daukalwi.#19.19 Uba kulnin...baisa daukalwi: wirlana kidika yamni kapat ki. Hibru kau laih amangladaski.
20Yulni sumalwa kidika dakah dawak dutah;
kaput laih sins duyang kalma.
21Muih al laih wark manas yamnin ridi kalahwi,
kaunah dawan kulnin lani manah yamwi.#Pro 16:1,9; Ec 9:1.
22Muih al kaupak dukih kalawa kidika barangni atnin;
minikunni atnin kauh yamni ki, dimalyang atnin karak dawak.
23Dawan yakat rispik kalanin kidika laih
sangka atnin yakat dukiwi;
isninglak yalahwi, dutni bik wauhwas.
24Baskiwah kidika di kasnin lakna yakat bakatwi;
kaunah sip awaski tinpas yakat duwi kiunin kidika.#Pro 26:15.
25Tapdadas yakat wah kalawa kidika
isningpuk awas kidika di lan kalwi;
sins duyang kidika wat as kalyulwa kamanah lan kalwi.#Pro 21:11.
26Papangni balna kidika dutni diyamwi
ūni kaupak kang'yaknin laih
asalni ki, dawak kidika laih walanibis as dutni ki.
27Walakibis mabilwa kidika dakas awama kat
yul yamni sumalwa kaupak naikau alahwama.
28Witnis alas muihni kidika sarahni yamwi la kat yamnin kidik;
muih dutni kidika tinpas kaupak dutni yulwi.#Pro 15:28.
29Pan kidika ridi ki tapdadas balna dinina
dawak wah kidika laih tapdadas balna dangnina dini.
Biblia Sumo
Texto © Sociedad Bíblica de Nicaragua 1998