Proverbios 20
20
1Wain yaklauwi muih al tapdadas yamwi;
dinin parasni kidika kalyamwak kiriyaklauwi;
kidika kalyamwak sins duwa kapat di yamwas ki.
2King kulnin daukalna kidika laih layan ihwa kapat ki;
wais uswa laih, sangnika yamadangni yakat āwi.
3Rispik as ki muih al as kalbilnin walwas kidika,
kaunah tapdadas laih sipki yamnin.
4Sau tuknin mani kat, baskiwah laih tukwaski;
kaunah minik yaknin mani yakat walwarang kaunah yakwas karang.
5Malnikau yamnin kulwa kidika laih was tuhni kapat ki;
kaunah sins sirihni duwa kidika laih lāih yakwi.
6Muih manas laih barangni kapat kaldakakawi;
kaunah muih as kau bik kulnin āwi duwas ki.
7¡Isninglak ki walanibis balna dawa kidika
witing barangni yalahna muihni kidika!
8King kidika muih lani yamnin ūni yakat kiwi yalahwak,
minikpa talwi lawa kamanah sipki dutni balna uswi yaknin.
9Muih as bik yulwaski: “Ising yamni ki,
dutni as bik dis klin yang.”#Sal 51:3-5; 1 Jn 1:8.
10Paun dutni āwi dawak kulwa kidika bik dutni
di bu kidika Dawan dutni talwi.#Lv 19:35-36; Dt 25:13-16; Pro 11:1; Am 8:5.
11Di yamwa yakat lāih ki
wahma as barangni kidika.
12Tapani kidika laih dakanin, dawak minikpa laih talnin
kidika laih Dawan yamna.
13Kaminih, mamakunni alahwama;
sahmuhtah, kaput laih di kasnin manas duma.
14“¡Dini adika laih dutni ki!”,
bakanwi duwa kidika kaput yulwi,
kaunah bakanwa usnit kat, witing alasna kalahwi.
15Sins tuhni karak yulbauwa kidika tanit yamni ki,
sau akat gol dini balna bitik karak.
16Talwas muihni di yakwak ilpni kāwa kidika,
asnina kidika dakyaktah trasni lauwi kat duwarang.#Pro 6:1-5; 27:13.
17Muih al laih alas manah kaskihni kalawi,
ban kiwakat tingpas yakat sau kapat kalwarang bahang.
18Wark yamnin kulwa kidika yul yamni sumalwarang kat yamwarang;
War kalbaunin kat yamni kulwi talwi dawi kalbauwi.
19Yul trukyang kidika sip yul malwi duwaski,
kaput bahang yul trukyang karak kalpakwinih.
20Papangni balna yakat dutni diyulwa kidika,
tanit puksani pasyakat dauwarang.#Ex 21:17; Pro 19:26.
21Tatuna kau īsi duna kidika,
witni yakat alasna awas ki.
22Biriwi kalyamnin kidika yulwinih;
Dawan yakat kultah, minitbayaknin mawarang.#Rom 12:19.
23Dawan dutni talwi paun dutni kidika;
paun dutni kidika laih yulni yakwi.
24Dawan laih muih angkut kiwa kidika talwi;#Sal 37:23; Pro 16:9.
muih as bik amanglawas ki tanit yakat amput karang kidika.#Jr 10:23.
25Yamadangni ki muih al kidika Papang yakat pramis yamwarang kat
usnit kat yulwarang pranimis kidika sip awaski.
26King sins duwa kidika muih dudutni balna
diawak silp alahuiwi
dawak minitna yakat di piramwi bayakwi sikitwi.
27Papang spiritni kidika muih al yakat kalana
kidika kuduh yaringni as kulnin paskau dahlwa kidika.
28King laih trunni yakat yamni sakki
dalani lani dawak di rahm manah yamwak.
29Wawahma witingna manah kapat kaldakakawa kidika laih parasnina;
dawak muih bararak risninapik kidika laih basnina pihna kidika.
30Dutni kidika laih yamni kalwi bauwi dawak dakwa kidika karak;
bauwa kidika laih kulnin dutni kalahkiwi.
Biblia Sumo
Texto © Sociedad Bíblica de Nicaragua 1998