Proverbios 18
18
1Witing manah dunin kulwa kidika laih walwi dini kidika,
yul yamni sumalwa bitik kidika niningkauh manahki.
2Tapdadas laih di lan kalahnin kidika dukih kalawas ki;
witing di amanglawa kidika manah kapat kulwi.
3Dutni lani kidika munah asalni kidika kaiwi;
dawak witing manah kapat kaldakawa kidika, risnipik dis.
4Muih al yulni balna kidika laih was tuhni kapat ki;
was kira kidika laih sins tuhni pāni.
5Yamni awaski pāt duwa muihni kidika
wihta yaklauwi ilpni yamwarang kat
dawak dutni yamwas rahmni kalalawa dawarang kat.
6Tapdadas kidika witing silp kungnimak
munah kalbaunin yakat kawi;
yulni balna kidika kau wah walwi.
7Tapdadas yulni balna kidika yaklauwi dutni yakat kaldukiwi;
kungnimak karak dinimak wah awi.
8Dangnit yulnin kidika laih damni dakawi
kaunah pasyakat ahlwi bayakwi.#Pro 26:22.
9Baskiwah dawak di daukalyang balna laih
¡kalwirah kapat kalalahwi!
10Dawan ayangni laih makau kilwi talnin pāni parasni kapat ki
la kat muihni balna ilp walwi uiwa kidika.
11Di duyang kidika kulwi ritsni balna
kidika laih tawan nuhni daklana kapat kulwi.
12Witing manah kapat kaldakawa usnit yakat daukalnin kaiwi;
limahni kidika usnit yakat laih, baraknin lani.
13Tapdadas dawak asalni as ki
dakawas tanit kauh nangnitlanin.
14Siknis muih kulnin yaklauwi,
kaunah kulnin yaklawa kidika bukna kat ¿wais dulauwarangyah?
15Sins duyang dawak sinsnina sirihni balna
baisa di amanglanin wawalwa kidika yayakwi.
16Prisant dini as yaklauwi dūr bitik apahwi
dawak muih nunuhni balna bik uiwi kakawi.
17Tatuna kaupak nanitdaknin kidika yamni kapat ki,
niningkauh muihni kidika kaiwi yul ūk yulnin awas yulni.
18Dawan la yamwa kidika laih kalbaunin kidika bitik disyamwi
kalbibilwa kidika laihwi dakyakwi.
19Wirahni usna kidika laih putwi
tawan nuhni daklana kapat tanit.
Kalbaunin kidika yaklauwi dakyakwi
king ūni winnidar kau ayan āna kapat.#18.19 Wirahni usna...āna kapat: tiksni kidika yamni kapat ki. Hibru kau laih amangladaski.
20Witingna kakaswarang disuhwak kat
witingna yulnina minik kidika.#Pro 12:14; 13:2.
21Daunin dawak sangka atnin kidika laih muih tuni kidika ki,
yul mahni yuyulwa kidika minit laih wawauhwarang ki.
22Yal dunin kidika laih di yamni as kalpaknin:
kidika laih Papang mailpki yamwi.
23Muih minikunni kidika laih kalni dinit yak bukwi yulwi;
kaunah di duyang laih yulni parasni yulwi.
24Muih as karak yamni kidika īsi dakwi kalalahwi,
kaunah kaltalyang as kat barangni ki kalwirah karak dawak.
Biblia Sumo
Texto © Sociedad Bíblica de Nicaragua 1998