Proverbios 17
17
1Tanit yamni ki di dadasni kaswi isning aslah atnin
dawak alasna manas dunin kaunah kalbilnin manah atnin kat.
2Dini yamyang di sip kidika,
walanibis dutni kidika daniwan kalwi,
dawak witing laih, kidika wirahni balna
dinina sahyakwi duduwa pasyakat ki.
3Gol dawak lalah kidika laih kuhpau lāih yakwi;#Pro 27:21.
dawak muih kulnin laih Dawan talwi.
4Muih dutni alas muihni kidika
tu dutni yuyulwa balna yulni dakawi.
5Muih minikunni yakat sarahni kalyulwa kidika
laih Papang yakat uswi;
dutni yakat bukwak alasna duwa kidika laih
wah duwas bayakwas karang.
6Muihbararak balna kraunni kidika laih mani balna;
papang witing manah kapat kaldakawa kidika laih
walanibis balna kidika ki.
7Mutu kidika bik yamni kaldakawas ki, yaksihn yulbauwi,
dawak rispik alni kidika bik alas yulnin yamni dakawas ki.
8Witing yaklauwi muih tani duwak di yamwa kidika
witing parasni duwa kaldakawi,
di yamni laihwi, yamwa balna bitik yakat.
9Uswak bik dakawas kapat dawak bayakwa kidika
laih dalani talnin lani kidika yamwi;
kaunah wat wat yamwa kidika laih, wanaihki kidika naikau yakwi.
10Amanglawa muihni yakat bilwa kidika dalani dakawi
tapdadas yakat andat wah wiswa karak dawak.
11Kulnin dutni kidika laih kalbaunin manah walwi,
kaunah yul dutni as kalsisihwarang.
12Dangkatakalbas anna karak kalpaknin
kauh tanit yamni ki
tapdadas di as yamnin kulwa kidika karak dawakat.
13Dutni kidika ūni kaupak kalahwas karang
yamni kalyamwak biriwi dutni yamwa kidika.
14Was pauna kidika laih kalbaunin tunan bahwi;
tanit yamni ki dawi kiunin dawak pasyakat watnin kat.
15Dutni yamna dutni dawak disnin, dawak
dutni yamwas yakat pāt yakat ānin
kidika di bu kidik Dawan dutni palni talwi.#Ex 23:7.
16¿Tapdadas kidika ais yamwi tingni yakat lalah duaiwih,
sins tuni bakannin, di amanglawas kat?
17Kaltalyang yamni as kidika laih yamni ki,
kaidinin mani yakat laih wirah as kapat ki.
18Isningpuk awas kidika laih wanaihni tunan minit kawi
di balna kidika witing tingni yakat duwi.
19Muih uskih kalawa kidika laih, kalbaukih ki;
witingmanah kapat yulwa kidika alas dutni yakat kiwi.
20Kulnin dutni kidika sip di yamni kalpakwaski;
tuni alas yulwa kidika dutni yakat bukwarang.
21Tapdadas papangni atnin laih dalani manah duaiwi;
mutu papangni atnin laih alasna as bik diski.
22Sika yamni ki isning alasna kidika,
kaunah kulnin bukna kidika laih parasni bik dis kalwi.
23Muih dutni kidika malni kau tani duwak yamni dakawi,
la kat yamnin dai kidika dutni yamnin yulni.#Ex 23:8; Dt 16:19.
24Sins tuhni kidika laihnin yamwi sins sirihni duwa kidika;
kaunah tapdadas laih kulnin yak di diski.
25Walanibis tapdadas kidika laih papangni balna
kulninna daukalnin dawak tapahlni bik.
26Dutni yamwas muihni yakat lalahni daknin yamni awaski
dawak muih di yamni manah yamwa yakat wisnin bik.
27Sins duyang balna yul bulah yuyulwi,
dawak sins sirihni duwa kidika laih kus ki.
28Tapdadas bik sins duyang kapat ki
ap sakkat.
Biblia Sumo
Texto © Sociedad Bíblica de Nicaragua 1998