Proverbios 16
16
1Wark yamnin kulnin yakat duwa kidika laih muih al dini;
kaunah witni yulni kidika Dawan duwi.#Pro 16:9; 19:21; Ec 9:1.
2Muih al yamwa kidika laih bitik yamni kapat talwi,
kaunah Dawan kuduh kidika lani balna yamwa kidika.#Pro 21:2.
3Warkma balna kidika Dawan tingni yakat atah,#Sal 37:5.
dawak warkma balna kidika yamni kalahna karang.
4Dawan witing di as kulwi di balna kidika yamna:
muih dutni kidika bik, wah kalawarang mani yakat.
5Dawan dukih kalawaski
witingna manah kapat kaldakakawa balna kidika;
waradika kidika awas naikau karang bik wah duwarang.
6Dalani talnin dawak rahm kidika karak dutni dawak diswi;
Dawan risnipik kalanin kidika laih dutni kaupak naikau kalahwi.
7Muih al as di yamwa balna kidika Dawan dukih kalawak
kidika alni waihnila balna bitik kulnin aslah kalawi.
8Bubin duna karang bik dutni lani munah awas kat
kidika laih tanit yamni ki;
la awas munah di mani duna karak dawakat.
9Muih al kidika wark balna yamnin ridi kalahwi,
kaunah Dawan yakluwi tunan kawi.#Pro 16:1; 19:21; Ec 9:1.
10King laih yulbauwi Papang munah
muih lanina yamwas ki, la awas kidika karak.
11Paun āwa balna kidika Dawan lani yakat kiwi;#16.11 Paun āwa balna kidika Dawan lani yakat kiwi: tiksni kidika yamni kapat ki. Hibru kau laih yulwi: paun āwi tikini balna Dawan la yamwa kidika kat.
paun balna bitik witing yamna.
12King balna yaklauwi wark dutni balna laihwawatwi,
kat trunni kidika laih la kat munah bahang.
13King balna dalani tatalwi dawak yamni tatalwi
yulni balna alas dis yamni yulwa kidika.
14King kulnin daukalna kidika laih daunin yulnin,
sins duyang laih sanni yamnin kidika walwi.
15King alasna kidika laih sangka atnin pranimis,
dawak kulnin yamni kidika laih mukus was duaiwa kapat ki.
16Sins tuhni dunin kauh tanit yamni ki
gol dunin karak dawakat;
di amanglanin kauh tanit yamni ki, lalah karak dawak.
17La kat balna lanina kidika laih dutni kaupak yaklanin;
ais yamwa balna kidika maintalnin kat
kidika laih witing alas mainkaltalwi.
18Witing manah kapat kaldakanin dangnit yakat
kaiwa kidika laih bukkiunin.
19Tanit yamni ki miniknakunni balna karak buknin
dawak witingna manah kapat kaldakakawa balna karak duyang kalnin.
20Di balna yamni maintalwi muhwa kidika,#16.20 Di balna yamni maintalwi muhwa kidika: satuk wirlanin sipki: la yakat tapa yuwi dakawa kidika. witing yamni;
¡alasna yamni ki wais Dawan yakat kulnin āwi duwa kidika!
21Sins karak kulwi talwa kidika laih kalyuyulwi
witing laih sinsni sirihni ki;
dalani talwa yulni balna yulwa kidika laih kulnin laihwi.
22La kat dunin kidika laih sangka atnin kidika duwi;
tapdadas balna sumalnin bik tapdadas as ki.
23Sins karak kulwi talwa kidika sins lani yulbauwi,
dawak yulni balna kidika yamni kulnin laihwi.
24Yul damni balna kidika laih amak kapat ki,
kulnin damni āwak baisa parasni wisam kalawi.
25Ta as yamni kapat ki,
kaunah witni kat daunin sakki.#Pro 14:12.
26Di kaskih kalawak wark yamwa kidika
laih baisa kalyamwak wark yamwi;
yuh kalawa yulni baisa wark yamwi.
27Muih dutni kidika laih plawar busnin pāni kapat ki,#16.27 Plawar busnin pāni kapat ki: tiksni kidika yamni kapat ki. Hibru kau laih yulwi kurwi kudugni yamwi dutni kidika.
¡yulwa balna kidika laih kuh daihni kapat ki!#Jm 3:6.
28Muih dutni kidika kalbaunin yamwi;
yul muryang kidika laih waihla kalahnin yamwi.
29Al daihni kidika laih wanaihni yak alas yulwi
dawak ta dutni yakat duwi kiwi.
30Minikpa suyungwi dutni yamnin kulwa kidika;
kungnimak parasni uman dutni yamna kidika.
31Basni pihna kidika laih kraun yamni as ki,
yamni yamwa munah duna.
32Tanit yamni ki kulnin laihwatnin
dawak kulnin dadasni dunin karak dawak;
silp mamuihki yakat minit bayaknin kidika tanit yamni ki
tawan nuhni kalbauwi dakyaknin karak dawakat.
33Muih al laih suerte kidika lakwi,
kaunah Dawan yaklauwi di bitik kidika yamwi.
Biblia Sumo
Texto © Sociedad Bíblica de Nicaragua 1998