Matyu 18
18
¿Wais kidika kauh baisa tanit nuhnikalkulnayah?
(Mk 9:33-37; Lk 9:46-48)
1Sihm kidika mani disaipil balna kidika Jisas yaihnit yakat uiwi kalyulwi dakakana:
—¿Wais kidika kauh baisa tanit nuhni kalkulnayah Papang king kawa sauni yakat?#Lc 22:24.
2Bahang Jisas yaklau muihbin as yulwak kaiwakat, witingna pasningna yakat awi 3aput yulna:
—Manna yakat barangni manayultayang muihbin kapat kaltas awanama laih, Papang king kawa sauni yakat awas awanama ki.#Mk 10:15; Lc 18:17. 4Papang king kawa sauni yakat witing kauh tanit nuhni kalkulna kidika laih parahkau bukwi muihbin kapat kalwa muihni kidika ki. 5Dawak angdika muihni yang ayangki yakat muihbin as duwa kidika laih, sihm adika apat, kidika laih yang yakat yaduwi.
Dutni yakat buknin yamanidangni kidika
(Mk 9:42-48; Lk 17:1-2)
6“Angdika muihni yaklau yang yakat yakukulwa muihni balna yakat diyayamwa kat dutni yayamwarang laih, baisa yamni karangki kipala as kau dinimak yakat sit dawi kuma tuhni yakat ruhmna atnin. 7¡Ampus dutniyah sau nining yakat dutni yamni dini mahni palni bang-atna atnin! Bang-atnin sip ki, kaunah ¡dutni palni karang ki angdika muihni yaklau ūk balna yakat diyamwa kat dutni yayamwarang kidika laih!
8“Kidika bahang, tingma karangpa kidik awas bik kalma karangpa mayamwa kat dutni yamtaman kat, dakta man kaupak naikau ruhmtah; baisa yamni karang ki sangka atnin pāni yakat tingma nakas dis kidik awas kat kalma nakas dis awana atnam, dawak tingma balna bupak dawak kalma balna bupak ban atnin kuhni yakat awana atnam laih sip awas ki.#Mt 5:30. 9Dawak man mamakpa kidika yaklau mayamwa kat dutni yamtaman kat, yakta man kaupak naikau ruhmtah; baisa yamni karang ki sangka atnin pāni yakat mamakpa nakaslah karak awana atnam, dawak mamakpa bupak karak laih kuh yakat awana atnam sip awas ki.#Mt 5:29.
Sīp disna malni yulni
(Lk 15:3-7)
10“Manna adika dibinina balna akat dutni diyayamwinih. Kat manayultayang kisang yakat witingna inninasal balna kidika laih yang Papangki kisang kau sakkidika kidika muhnina yakat talwabangki.#18.10 Tingkau ulna kidika minitkau lakwi S.d. 11: Kat muih Walanibis al kidika laih disna kidika laihwi yakna kaina.,#Ez 34:16; Lc 19:10.
12“¿Manna laih ampat talamanah? Muih al as sīp 100 duwa kat dawak as pini disna karang kat, ¿ais sīp ūk 99 balna kidika asangpas yakat dabangwi disna kidika walna kiwas karang katpah? 13Dawak yakwarang laih, pini disna kat yakna kidika yulni kauh alasna karang ki ūk balna 99 didiswas kidika balna karak dawakat. 14Kaput bik, manna Papangma kisang kau sakkidika laih manna kaupak as kat bik disnamna kidika dukih kalawas ki.
Muih wirahni yakat amput dutni dawakdisnin kidika
(Lk 17:3)
15“Man wirahma kidika yaklau dutni mayamwarang kat, witing karak mahn yulbauta witing dutni kidika isningpaktah. Yulma dakawarang kat, man wirahma kidika laih man dunaman.#Lc 17:3. 16Man yulma dakawas laih, kidika minit yakat muih as kidik awas kat muih bu yultah, yulni yakma mani kat muih bu kidik awas kat muih bas witnis kana atninna.#Dt 19:15. 17Witingna yakat bik yulnina dakawas laih, kalduhna muihni balna yakat diyultah; dawak kaluduhna muihni balna kidika bik yulni dakakawas laih, Papang yakat kulwas muihni as kalkulna atnam sip ki kidik awas bik Roma dini tunan minit dadakwa muihni balna kapatnah kalkulna atnam sip ki.
18“Barangni manayultayang manna sau akat sittanama kidika laih, kisang yakat bik sitna karang ki, dawak manna sau akat uluhtanama kidika laih, kisang yakat bik uluhna karang ki.#Mt 16:19; Jn 20:23.
19“Adika manayultayang: Manna kaupak muih bu kalahwi sau akat yulbauwi talwi minitna yulwi di yuyulwarang kat, yang Papangki kisang kau sakkidika laih witingna yakat diawarang ki. 20Kat angdika pāni yakat muih bu kidik awas kat muih bas yang ayangki yakat kalududuhwarang kidika laih witingna pasningna yakat sakyang.
21Bahang Pita laih Jisas yakat kiwi kalyulwi dakana:
—Dawan, ¿yang wirahki yaklau dutni yayamwarang kat, witing dutni kidika wat yapak palni datingkat diswarangyah? ¿Wat tiaskaubu?
22Jisas yaklau nangnitlana:
—Mayultasyang wat tiaskaubu, kaunah wat tiaskaubu manah 70.#Lc 17:3-4.
King dini yamyang yaklau muih dutnidawak diswas dana kidika malni yulni
23“Kidika bahang, Papang king kawa sauni kidika laih sihm king as yaklau witing dini yamyang balna karak di kulwi talkuh atna dai kidika kapat ki. 24Waralaih takat kulwi talwa sak kat witing muhni yakat dini yamyang as laihwi duwi uina dai kidika muihni laih lalah nuhni palni kalanin duwadai. 25Kidika dini yamyang laih lauwi kalanin lalah disdai kidika bahang, king yaklau yamnin diyulna dai, witing kidika sihm muih dini yamyang as kapat bakanpamna atninna witing yalni, walanibis balna dawak dini balna duwa kidika karak libitwi, kaput karak tras duwa kidika lauwi lana atnin yulni. 26King dini yamyang kidika laih king muhni yakat limbabahwi kalni dinit bukwi kalyulna: ‘Man yang yakat kulnam laihwattah dawak yang lawik bitik lautik maki ki.’ 27Dawak king kidika laih witing yakat minikun kaltalna dai; kaput laih witing trasni kidika dawak disna dai dawak pri kaldana dai.
28“Kaunah kalahna mani kat, witing karak kaltalyang yamni as lalah dibindauh as lauwi kalanin dai, kidika muihni karak kalpakna dai. Dinimak yakat laihwi tiriswi kalyulna: ‘¡Lauta yanam dutaman kidika lauta yatah!’ 29Witing karak kaltalyang yamni kidika laih witing muhni yakat limbabahwi kalni dinit bukwi kalyulna: ‘Yang yakat kulnam laihwattah dawak yang lawik bitik lautik maki ki.’ 30Kaunah ūk kidika laih yulwas dawi silak yakat āna dai trasni kidika lauwi kalana atnin yulni. 31King dini yamyang ūk balna di kalahwa kat talwi king yakat uiwi kalyuyulna kidika balna laih uba palni dalani dakakana dai. 32Bahang king yaklau kalyulwa kat kiwak kalyulna: ‘¡Dutni muihni! Yang lawik dating kat disna tras dutaman dai kidika kat man lawa kalki dinit buknaman dai kidika yulni. 33Bahang man bik kaltalyang yamni dutaman yakat sihm kaput minikun kaltalnam dai, yang lawik man yakat mamakun matalnayang dai kaput.’ 34Dawak king laih uba palni kulnin daukalna dai, wah kalanin pakna dai tras ampus duwadai kat bitik launa atnin.”
35Jisas yaklau baisa minit lakwi yulna:
—Yang Papangki kisang kau sakkidika laih sihm kaput yamwarang ki manna yakat, manna lawa wirahmana balna dutnina kidika ismangna yamni karuk datanang kat diswas karang kat.
Currently Selected:
Matyu 18: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
