Matyu 17
17
Jisas muihni nuhni satuk kalna
(Mk 9:2-13; Lk 9:28-36)
1Ma tiaskauas bayakwak usnit kat, Jisas yaklau Pita, Jims dawak wirahni al Jan kauna duwi asang as maluihni yakat diduwi kilkiuna dai. 2Kidika pāni yakat witingna muhnitna yakat, Jisas muihni kidika satuk kalna dai. Muhni kidika laih sihm ma kapat dahlwadai, dawak prakni kidika laih pihni yaringni kalna dai. 3Kidika minitni yakat Moses dawak Elías kauna Jisas karak yulbauwarau kat tatalna dai. 4Pita yaklau Jisas yakat kalyulna:
—Dawan, ¡yamni ki mayang adika pāni akat bang-atnin! Man dukih man kat, yang ū labanni bas yamki: man as, Moses as dawak Elías as dini.
5Pita yulbauwasak kat, mukus yaringni as witingna minitna yakat bukna dai, dawak kidika mukusni kaupak yul as aput yulna: “Adika ki yang walakibis dalani yang lawik waltik yaknayang kidika:#Gn 22:2; Sal 2:7; Is 42:1; Mt 3:17; 12:18; Mk 1:11; Lc 3:22. witing yakat kaldakanauh.”#Dt 18:15. ,#2 Pi 1:17-18.
6Kidika dakakana mani kat, disaipil balna kidika laih yamaduwi muhnina kidika sau yakat abubukna dai. 7Jisas laih witingna yaihnitna yakat kiwi disukwi diyulna:
—Lawanauh; yamaduduwinih.
8Dawak tatalna mani kat, muih as kat bik tatalwasdai, kaunah Jisas manah alas sakkat tatalna dai.
9Asang kaupak yaklakwi aiwak, Jisas yaklau yamnin diyulna:
—Adika dini sahmuhni amana kau kapat talnamana kidika, muih as kau bik yulnamna awas ki, muih Walanibis al kidika watwi yaklauwarang mani kat laih takat.
10Bahang disaipil balna kidika yaklau Jisas yakat kalyulwi dakakana:
—¿Ais yulni lā sumalyang balna kidika yaklau yuyulwih Elías kauh tatuna kainin kidika?#Mal 4:5.
11Dawak Jisas yaklau nangnitnalana:
—Rahm ki Elías kauh tatuna kaiwi, dawak witing yaklau di balna bitik kidika barangni yamwarang ki. 12Kaunah yang lawik manayultayang Elías laih uman kaina,#Mt 11:14. dawak witingna laih amanglawas dawi amput yamnin kukulna kidika kaput yayamna. Sihm kaput bik, muih Walanibis al kidika laih witingna tingnina yakat dalani wauhwarang ki.
13Bahang disaipil balna kidika witingna amanglalana dai Jisas laih Jan muih wassiyang yulni yulwa kidika.
Jisas yaklau muih al wahmabin asspirit dutni duwa kidika kaupakyamni kalyamna
(Mk 9:14-29; Lk 9:37-43)
14Witingna muih bangkidika yakat ui'kakana mani kat, Jisas yaihnit yakat muih al as kaiwi witing muhnit yakat limbabahwi aput kalyulna:
15—Dawan, yang walakibis yakat minikun talah, kat dutni kalawa kat dalani dutni wauhwi; ma mahni kuh yakat kidik awas kat was yakat bukwi. 16Man disaimapil balna akat duainayang kaunah witingna sip yamni kalyamwas dadana.
17Jisas yaklau nangnitnalana:
—¡Rahm kulnin lani dis dawak sins dis muihni balna! ¿Mampat mani kat yang manna karak awakiyah? ¿Mampat mani kat manna tikimana kidika trukkiyah? Muih al wahmabin kidika akat duaitanauh.
18Bahang Jisas yaklau spirit dutni yakat bilwa kat muih al wahmabin kidika kaupak kalahna dai, kidika mani kaupak muih al wahmabin kidika yamni kalahna dai.
19Usnit kat disaipil balna kidika Jisas karak manah yulbauwi kalyulwi dakakana:
—¿Amput dawakat yangna sip kang'yaktasyangna daih spirit dutni yakat?
20Jisas yaklau diyulna:
—Kat manna laih rahm kulnin lani kidika uba dibindauh palni dutamana bahang. Barangni mana yultayang manna rahm kulnin lani kidika dutamana kat laih mustat minik us karang bik, adika asangni akat kalyultanama: ‘Adika pāni kaupak lawa pa ūk kau yawah’, dawak asang kidika laih pa ūk kau yaklawarang ki.#Mt 21:21; Mk 11:23; 1 Kor 13:2. Di as bik sip awas laih awas awanama ki.#17.20 Tingkau ulna kidika minitkau lakwi S.d. 21: Kaunah adika spirit dutni laih di kasdas mamikityuldak manah kalahwi.
Jisas laih wat bu yakat yulwiwiting daunin yulni kidika
(Mk 9:30-32; Lk 9:43-45)
22Galilea sauni yakat witingna karak kalpakna bangkat Jisas yaklau diyulna:
—Muih Walanibis al kidika muih balna tingnina yakat ana karang ki, 23dawak ihiwarang ki; kaunah ma bas yakat watwi yaklauwarang ki.
Kidika yulni dakakana kat uba palni bik kulninna bukna dai.
Makat yulnin ūni minittunan minit dadakwa kidika
24Jisas witing disainipil balna karak Capernaum yakat ui'kakana mani kat, makat yulnin ūni lalahni tunan minit#Ex 30:13; 38:26. dadakwa muihni balna kidika Pita yakat uiwi kaltatalna, dawak aput kalyulwi dakakana:
—¿Sumalmayang kidika laih makat yulnin ūni kidika lalahni tunan minit lauwasyah?
25Pita yaklau nangnitlana:
—Agha, lauwi.
Usnit kat Pita witing ū yakat kawa kat, Jisas yaklau tatuna aput kalyulna:
—¿Saiman man laih ais kultamahn? ¿Adika kingni balna laih wais balna yakat tunan minit dadakwih: witingna walaninabis balna yakat kidik awas kat sau ūk muihni balna yakat?
26Pita yaklau nangnitlana:
—Sau ūk muihni balna yakat.
Jisas yaklau minit lakwi yulna:
—Kaput bahang, witingna walaninabis balna laih di as bik lalauwas karang ki. 27Kaunah, muih as bik kalni laknin awas yulni laih, lakun yakat yawa kuyuhl kidika ruhmtah dawak waspa dini tatuna tuswarang kidika iltah. Kidika tinipas yakat lalah dadasni as yakma ki, kidika karak laih yang dawak man tunama minit launin kidika minit bayak karang ki; duta yawa minit lautah.
Currently Selected:
Matyu 17: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
