Matyu 19
19
Jisas yaklau marid kaldakwi kalahninlani malni yulni sumalna kidika
(Mk 10:1-12; Lk 16:18)
1Jisas laih adika dini balna yulwa dawi Galilea kaupak kalahwi Jordán wasni kaupak ma kilwa niningkauh Judea sauni yakat kiuna dai. 2Muih mahni palni usnit uhuina dai, dawak kidika pāni yakat siknis muihni balna yakat sikninanis kaupak yamni diyamna dai.
3Parisi muihni balna buas laih Jisas yakat dutni kalyamna atnin yulni witing yaihnit yakat uiwi kalyulwi dakakana:
—¿Muih as kidika marid lani kaupak dakwi kalahna atnin sipyah di as yulni?
4Jisas yaklau nangnitnalana:
—¿Manna baisa yulta talas manah Ulna wauhnitaya yakat tatuna kau yamna muihni balna kidika, ‘muih al dawak muih yal yamna kidika’?#Gn 1:27; 5:2. 5Dawak aput yulna: ‘Kidika bahang, muih al kidika laih papangni dawak nanangni dawarang ki witing yalni karak kalduna atnin yulni, dawak witingna laih sihm muih aslah kapat karang ki.’#Gn 2:24. 6Kaput bahang waralaih muih bu awas ki, kaunah muih aslah ki. Kaput bahang Papang yaklau libitna kidika laih muih al yaklau sip dakwi yakwas karang ki.
7Witingna yaklau kalyulwi dakakana:
—¿Bahang ais yulni, Moses yaklau yamnin yulnayah muih yalni yakat dakwi kalahna wauhnitaya as kalawi sihpamna atnin?#Dt 24:1-4; Mt 5:31.
8Jisas yaklau diyulna:
—Manna laih kulnamna dadasni bahang, Moses yaklau manayulna yalmana balna kaupak dakta alahwana atnamna; kaunah tatuna kau laih kaput awasdai. 9Yang lawik manayultayang angdika muihni kat witing yalni karak dakwi kalahwi yal ūk duwarang kat, yal kidika al ūk karak la munah kalduduwas lani yamwas bik, marid lani bahwi.#19.9 Tingkau ulna kidika minitkau lakwi: dapamna yalni kidika duwarang kat witing bik la bahwi.,#Mt 5:32; 1 Kor 7:10-11.
10Disainipil balna yaklau kalyuyulna:
—Adika lani adika muih al yalni karak kaput atnin laih, sip muih al kidika yal ūk duwas karang ki dawak yal kidika bik al ūk duwas karang ki.
11Jisas yaklau nangnitnalana:
—Muih bitik laih adika yulni adika amanglalawas ki, kaunah Papang yaklau amanglana atnin muihni balna diana kidika manah amanglalawi. 12Tanka sat sat bangkidika yaklau diyamwa kat muih ahal balna kidika laih yal duduwi: as as balna kidika laih uman kaput batahn dadana marid lani yakat sip awas atnin, ūk balna kidika laih muih ahal balna kidika yaklau sip awas diyayamwi, dawak ūk balna kidika laih sip awas kapat yalalahwi Papang king kawa sauni kidika yulni.
Jisas yaklau muihbinina yakatblis diyamwi
(Mk 10:13-16; Lk 18:15-17)
13Jisas yakat walabis buas duwi uina witingna minitna yakat tingni dulauwi minit yulna atnin yulni; kaunah disaipil balna kidika laih duwi uiwa muihni balna yakat dibibilna dai. 14Bahang Jisas yaklau yulna:
—Datanang kat walabis balna kidika yang yakat aiwang, dawak nawatwi sisihwinih, kat Papang king kawa sauni kidika laih sihm witingna balna kapat kidika dinina.
15Walabis balna kidika minitna yakat tingni kidika dulauna dawak kidika pāni kaupak kalahwi kiuna dai.
Di duyang wahnima as yaklauJisas karak yulbauna
(Mk 10:17-31; Lk 18:18-30)
16Muih al wahma as Jisas yakat kiwi kaltalna dawak kalyulwi dakana:
—Sumalyang,#19.16 Tingkau ulna kidika laih minitkau lakwi: yamni. ¿ais dini yamni as yamtik ban kaput sangka atnin lani kidika dukiyah?
17Jisas yaklau nangnitlana:
—¿Ais yulni di as yamni kidika yulni yayulta dakamahn? Di as yamni kidika laih aslah ki.#19.17 ¿Ais yulni...Di as yamni kidika laih aslah ki: tingkau ulna yakat yulwi: ¿Ais yamta yayultamana “yamni”? Yamni as bik diski, Papang manah laih. Kaunah sangka atnin lani yakat awanam kultaman kat, la balna kidika yakat daka yamtah.
18Muih al wahma kidika yaklau yulwi dakana:
—¿Angdika balna?
Dawak Jisas yaklau kalyulna:
—‘Man muih iwinih,#Ex 20:13; Dt 5:17. marid lani bahwinih,#Ex 20:14; Dt 5:18. di malwinih,#Ex 20:15; Dt 5:19. alas yulta muih as kau bik dutni yamwinih,#Ex 20:16; Dt 5:20. 19papangma dawak nanangma yakat risnipik nuhni yamtah,#Ex 20:12; Dt 5:16. dawak man wanaihma kidika yakat dalani talah sihm man muihni kapat.’#Lv 19:18.
20Muih al wahma kidika yaklau yulna:
—Kidika dini balna bitik yamnayang. ¿Ais kidika baisa yamtasyahn?
21Jisas yaklau nangnitlana:
—Man barangni atnin kultaman kat, yawa di dutaman balna kidika bitik bakanmukta muih balna minikunni yakat diatah. Kaput laih man kisang yakat dima balna kidika duma. Usnit kat aiwa yang uskit uitah.
22Muih al wahma kidika witing adika yulni dakawi kulnin bukwi kiuna dai, kat witing laih uba palni di duyang dai kidika yulni.
23Bahang Jisas yaklau disainipil balna yakat diyulna:
—Barangni manayultayang muih as di duyang kidika laih dadasni palni karangki Papang king kawa lani kidika yakat kana atnin.#Pro 11:28. 24Wattik manayultayang kiamil as nining yakat laih baisa isi ki silip minikpa munah bayakna atnin dawak di duyang muihni as Papang king kawa lani yakat kana atnin karak dawakat.
25Disainipil balna kidika laih kidika yulni dakawi amanglawas dawi aput yuyulna:
—Bahang, ¿wais kidika laih laihwi yaknin lani kidika duna atnin sip karangyah?
26Jisas yaklau ditalwi nangnitnalana:
—Adika dini muih balna niningna yakat laih sip awaski, kaunah Papang niningyakat laih di bitik kidika sip ki.
27Bahang Pita yaklau kalyulna:
—Yangna laih di balna dutayangna dai kidika bitik damuktik man usmat uinayangna. ¿Bahang ais dutanakiyah?
28Jisas yaklau nangnitnalana:
—Barangni manayultayang di balna kidika bitik wisamni manah kalwarang mani kat, muih Walanibis al tronni alasnina yaksihni kidika yakat yalahwarang mani kat,#Mt 25:31. manna yang uskit aiwanamana kidika bik trun 12 yakat yalahta Israel sulani balna 12 kidika yakat lanina yamtanama ki.#Lc 22:30. 29Dawak angdika muihni balna yang yulki ūnina, wirahnina ahal balna kidik awas kat wirahnina yayal balna, papangnina, nanangnina, walaninabis balna, saunina dadana balna kidika laih kidika minit yakat wat 100 duduwarang ki, dawak ban sangka atnin lani kidika bik duduwarang ki. 30Kaunah waradika muih mahni balna tatuna yakat kidika laih, witni yakat yaklalawarang ki; dawak waradika muih mahni balna witni yakat kidika laih, tatuna yakat yaklalawarang ki.#Mt 20:16; Lc 13:30.
Currently Selected:
Matyu 19: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
