Lamentaciones 4
4
Kaidana arungka
1¡Amput gol kidika pukni kalnayah!
¡Gol tanit yamni kidika ampatyaringni disna yah!
¡Pa bangni balna bitik yakatruhwi kiuna
holi pāni kinipala balna dai kidika!
2Sayan muihni balna kidika, dalani ditatalwadai,
witingna golnina minit duwadai kidika,
waradika laih tatalwi sau suba as kapat
sau kau di yamyang muihni as yamna kapat.
3Sul yayal wail kidika bik tani sūnin diawi
dawak walanibis dibinina kidika ta bayahwi,
kaunah yang tawanki, tawan tatuna nuhni kidikalaih kulnin dutni ki,
sihm dutni ki, uhu nuhni kauhmak wanilang kaukapat ki.
4Muih binina ta suyang balna kidikadinitna buhlawi
tunina kidika duranina yakat birwi.
Muihbinina kidika di kasnin yuyulwi,
kaunah muih as bik diski kalanin.
5Muhnilau di manas kakaswadai kidika,
waradika laih ta pasyakat yuh dadauwi.#2 Re 25:3; Jr 52:6.
Di yayamni yaksisihni pasyakat bararakna kidika,
waradika laih yalalahwi bubuh pāni yakat.
6Yang tawanki tawanni nuhni dutni kidika
kidika laih tanit nuhni ki
Sodoma dutni yamna kidika karak dawakat,
kidika laih minit as kat dispamna
muih as bik niningyakat kalahwikalbauwas kaunah.#Gn 19:24.
7Ahal walwi yakna balna kidika,
mukus karak dawak tanit pipihni dai
tāwas karak tanit pipihni dai;
witing muihni nuhni kidika
coral karak tanit pauni dai;
dawak muihni kidika laih tanit nuhni yaksihn dai,
kipala sangni karak dawakat.
8Kaunah waralaih tanit pukni ki,pukta karak dawakat;
ta pas yakat muih as bik amangnilawas karang.
Unitak kidika wakalni balna yakat birki,
¡buhni ki sihm kuh panan kapat!
9Kalbauwi dadauna balna kidikakauh tanit yamni ki
yuh wauhwi dadauna balnakidika karak dawakat,
kat kidika balna laih tani tanidadauna bahang
sau di minik yakwa balna kidikadis dawakat.
10Witingna silp tingnina kau,
yayal kulninna yamni balna dai kidikawalaninabis lalahna;
witingna silp walaninabis kidikakasninna yayamna
yang tawanki tawanni nuhni kidikadaukalpamna mani kat.#Dt 28:56-57; Lm 2:20; Ez 5:10.
11Dawan kulnin daukalna kidika dahn kalna,
kulnin daukalna kidika uluhwi dapamna;
dawak Sayan yakat kuh kau pakwi dahlna
dawak rahni taihwa sau paskau kidikabitik laih busna.
12Sau kingni balna, di kaput kalahwarang kidikakukulwasdai,
sau akat king kawa balna bitik kidika
waihla kidika,
Jerusalén dūrni munah kawarang kidika.
13¡Pranipit balna dutni yayamna kidika yulni,
sumalniyang balna dutni yayamna kidika yulni,
kidika sihm tawanni nuhni pasyakat
muih dutni yayamwas balna ānina ututuhna!
14Lapapakwi pini, sihm miniknapa dis balna kapat,
tawan nuhni tanipas balna yakat;
maisihni ā manah bangki
praknina kidika muih as bik laihwas ki.#Nm 19:11-16.
15Sarahwi diyuyulwi: “¡Islawanauh, islawanauh;
kidika laih muih maisihni balna ki, lalaihwinih!”
“Kidika laih pini watyang balna, kalahwi kikirana
—kaput yuyulwi Dawan dis muihni balna kidika—,
sip-awaski, ban akat yalahnin.”
16Dawan muhni tani kaupak, pini kalruruhna,
dawak watwi bik wiryaklawi ditalwas dana.
Sumalyang balna risninapik bik dis dana
dawak muihbararak balna yakat bikminiknakun talnin dis dana.
17Miniknapa disuh dana kaunah, yakat ban tatalna,
di dauh kaunah ban tahadi.
Kaiwarang kidika yulni tahadi
tawan as witing sip laihwi yaknin duwaskarang kidika.#Jr 37:5-10.
18Angkat lapaktik yawayangna kidika yakatmanah tatalwi;
sip-awaski ta pas yakat alahwinikna kidika.
Daunin kidika ulis dana, awarni kidika kaiwi kana;
¡madaunik kidika kaiwi kana!
19Tanit parasni kikiri kisang kauyakalnuh balna kidika karak dawakat
kidika balna laih yanauhuiwi;
asang balna munah yanauiwi aiwi,
¡kauhmak wanilang yakat yanalaihnin dinimalni yakat ahawi!
20Kaunah, Dawan yaklauwi walwi yaknamuihni dai kidika bukna ki,#2 Re 25:4-6; Jr 39:4-6.
sangkinaka yakat wingkinatayanawadai kidika,
kidika kingni yultayangna dai kidika:
“Witing dinit sanni yakat yalahtanaki,
tawan balna pasyakat.”
21¡Arah, alasna awah, Edom ninisan;
man laih Uz sauni yakat king āwaman kidika!
¡Man yakat bik sihm dinin tapahlni kidika kiwarang,
dawak wasakdauta, wahdis bik dama!
22Sayan tawanni nuhni,
man wah dutaman kidika dahn kalna ki;#Is 40:2.
Dawan yaklauwi watwi pama kaupakmayakwas karang.
Kaunah dutni yamnaman kidika laihwah mawarang, Edom ninisan,
dawak dutni yamnaman balna kidikabitik lāih yakwarang.#Abd 1-12.
Currently Selected:
Lamentaciones 4: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
