Josué 14
14
Josué Canaán sauni sahwi yakna
1Adika kuduh Canaán sauni Israel balna kawi panina duduna kidika, sihm sat sumalyang Eleazar kau kalana dai kapat, Josué dawak Israel sulani dakni muihni balna karak. 2Kidika sauni kidika kau yayakwa dai sulani tiaskauarungka minit kau papusdak yakat, sihm sat Dawan yaklauwi Moses yak yamna atnin sihna dai kapat.#Nm 26:52-56; 34:13. 3Uman tatuna kau Moses yaklauwi Jordán wasni nakas yak sau diana Rubén, Gad dawak Manasés sulani papuswayah balna yakat bik;#Nm 32:33; 34:14-15; Dt 3:12-17. kaunah libait balna yakat laih sau diawas dai. 4Josué sulani balna kidika sahwi kalahna bu yayamna, Manasés dawak Efraín sulani ana bik, kaunah libait balna laih sau apis bik duduwasdai, kaunah tawan nunuhni muih yalalahwa balna kamanah laih, dawak turuh, tinglau sahni pani balna karak duwa kidika manah laih. 5Israel balna sau dai kidika sahwi yayakna Dawan yaklauwi amput Moses yak adar kalana dai kapat.
Caleb sauni
6Judá sulani balna Gilgal yak uina Josué karak yulbauna atnin, dawak Caleb cenezeo, Jefone walanbis yaklauwi Josué yak kalyulna: “Kulta talah Dawan dini yamyang Moses yak kalyulna Cades-barnea yakat, man yakat dawak yang yakat bik.#Nm 14:30. 7Yang kurih 40 dutayang kat Moses yaklauwi Cades-barnea kaupak yasihna sauni pīsni awaihwi talna atnin, dawak nawat aiwanayang laih barangni yulbaunayang dai witing karak.#Nm 13:1-30. 8Yang karak uina balna kidika muih balna yamaduna atnin yayamna kaunah yang laih Papangki Dawan yulni yakat yamnayang. 9Bahang Moses yaklauwi yang kau pramis yayamna: ‘Man angdika sauni kalma taihnaman kidika man dima dawak sulama balna bik dinina ban kaput karang, kat yang Papangma Dawan yakat barangniman dai bahang.’#Nm 14:24. 10Uman kurih 45 bayakna, adika Dawan yaklauwi Moses kalyulna kaupak, kidika mani balna yak Israel balna baisa walang kauhnimak yak bang dai, dawak kidika pranimis yayamna kaupak sangkika kaina. Uman kurih 85 dutayang, 11kaunah baisa parasni dutayang sihm sat Moses sau pīsni talnin yasihna dai kapat, dawak sipyang kalitiknik, kalbaunik bik. 12Kidika bahang man kau mayultayang asang pas pīsni sak kidika yatah Dawan yaklauwi pramis yayamna dai kapat. Man amanglataman Anac sulani nunuhni balna dai kidika yakat bangki dawak tawan nunuhni yamni duduwi. Kaunah yang tahatayang Dawan yang karak atnin dawak ilp yayamwak yakaupak yakmukna atnik, witing yulna dai kapat.”
13Bahang Josué yaklauwi Caleb yak minit kal yulna dawak Hebrón yak kalana, witing duna atnin, dawak sulani balna bik. 14Kaput laih Hebrón kidika Caleb dini kulwa dai dawak sulani balna bitik warmani kat, ampadawak, kat Caleb laih Dawan Israel balna Papangnina yulni dakawi yamna kidika yulni. 15Tanit mani kau Hebrón ayangni kidika kuduh Quiriat-arba, duwa dai; bahang Arba kidika Anac sulani paskaupak muih nuhni as dai.
Kidika usnit yak adika sauni pas yak pri lani kalahwadai.
Currently Selected:
Josué 14: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
