Josué 13
13
Sau balna baisa kawi dunin watna kidika
1Josué uman muih barak palni kalna mani kat, Dawan yaklauwi kalyulna: “Man uman kurihma kana, dawak baisa sau balna kawi dunin mahni palni bangki. 2Filisteo dawak gesureo balna sauni bitik kidika watna 3kidika kuduh Sihor wasni kiwa kaupak Egipto ma kilwa nining kaupak Ecrón sauni lainni kat, tingpal nining yakat, kidika kilwi talnin kat cananeo balna saunina; yakat kuduh filisteo balna tunan singka bangki, kidika kuduh Gaza tunan muihni, Asdod, Ascalón, Gat dawak Ecrón tunan muihni balna. Sihm kaput bik aveos sauni pīsni yak bik baisa watwi, 4wadah nining yakat, cananeo balna sauni bitik yakat sidonio tawannina nunuhni kaupak,#13.4 Tawannina nunuhni kaupak: kaput kapat wirlana ki. Hibru kau laih Mehara. Afec kat, amorreo balna saunina lainni kat. 5Kaput bik baisa giblita balna saunina bik watwi dawak Líbano bitik ma kilwa nining yakat, Baal-gad kaupak, Hermón asangni kaupak Hamat yakat kiwi kawa kata. 6Israel balna tanitna yak ahana dai sidonio balna dawak asang pas kau watwa bang balna bitik kau yak, dawi Líbano kaupak Misrefot-maim kat.#Jue 3:3-4. Adika sauni Israel balna yak sahyakta panina diatah,#Nm 33:54. yang lawik yamnin mayulnayang kaput. 7Adika sauni kidika sahta yakta sulani tiaskauarungka yakat diatah dawak Manasés sulani papusdak yak bik.”
Manasés, Rubén dawak Gad saunina balna
8Rubén dawak Gad dawak bik Manasés sulani papusdak balna kidika Moses yaklauwi saunina Jordán ma kiwa nining kauh diana dai.#Nm 32:33; Dt 3:12. 9Witingna duduna kidika Aroer sauni pīsni kaupak, Arnón wasni kung munah dawak sau langni papus kau tawan nuhni pakkidika dawak Medeba asangni ubulni kat bangkidika bitik Dibón kat, 10pasyakat Sehón tawanni balna bitik, amorreo kingni Hesbón yak, amonita sauni lainni kat. 11Sihm sat kaput bik Galaad dawak gesureo sauni bik witingna niningna yak dawak maacateo balna bik, minit yak baisa Hermón asangni bik, Basán sauni bitik, Salca kat, 12pas yakat Og bik, Basán kingni, witing king kana sak dai Astarot dawak Edrei, kidika refaítas balna kaupak las dai, Moses yaklauwi minit bayakna dawak pāni kaupak apamna. 13Gesur balna dawak Maaca kidika balna yakaupak yakwas dadana, kaput kaunah ban Israel balna karak yalalahna ban warmani kat.
14Leví sulani balna kidika Moses yaklau panina diawas dana, bahang witingna niningna yak laih Dawan dawak Israel balna Papangnina ayangni kau minit dis kalanin dini busnin kidika witingna karang, witing palni kaput yulna dai.#Dt 18:1; Jos 13:33.
15Moses yaklauwi sau balna Rubén sulani yakat diana ampus tawanni duwa yakarak, 16kaput laih sauni pīsni kidika Aroer kat dai, Arnón wasni kung, dawak sau langni papus kau tawan nuhni kidika, dawak Medeba asangni balna tuna kat, 17Hesbón kat, dawak asang kau tawan bangkidika bitik: Dibón, Bamot-baal, Bet-baal-meón, 18Jahaza, Cademot, Mefaat, 19Quiriataim, Sibma, Zaret-sahar, sau langni kau sakkidika, 20Bet-peor, Bet-jesimot dawak Pisga asangni as dauh sak kidika, 21yuldarang kat asang nunuhni bang kau tawanni balna dawak Sehón kingni balna bitik kau, Amorreo kingni Hesbón yak, kidika Moses yaklauwi minit bayakna dai Sehón yak dawak Madián muihni nunuhni balna: Evi, Requem, Zur, Hur dawak Reba yak bik. 22Sihm kaput bik Israel balna yaklauwi, yul baisa kaiwi kalahwas kau amanglawa alni Balaam kidika ihina, Beor walanibis dai kidika, dawak ūk balna bik mahni ihina. 23Rubén sulani sauni kidika sahyakna yakat duyawa dakni yapak duwa yakat, adika tawanni nunuhni dawak pāni binina kidika Jordán wasni kung kat kiuna.
24Sihm kaput bik Gad sulani balna yakat saunina sahwi yakwi diana Moses, witing sulani pasyak dakwi ampus mahni duwa kaput. 25Witingna duduna Jazer dawak Galaad tawanni balna bitik dawak amonita balna saunina papustirh, Aroer tawanni kat kidika Rabá muhnit palni yakat ki. 26Adika sauni pīsni kidika sakki Hesbón, Ramat-mizpa dawak Betonim walsah yakat dawak Mahanaim dawak Debir sauni lainni walsah yakat. 27Sau langni yakat laih witingna duduna Bet-aram, Bet-nimra, Sucot dawak Zafón kidika kuduh dis aslah Sehón kingni watna dai, Hesbón kingni. Kaput bahang witing sauni kidika duna dai Jordán wasni nakas ma kilwa nining kaupak Cineret lakunni wadah nining yaihnit kat. 28Kidika tawanni balna dawak tawanni binina kidika Gad sulani balna yak diana dai, witing sulani pas yak dakni ampus duwa dai yakat.
29Sihm kaput bik Manasés sulani papusdak balna dai yak bik Moses yaklauwi sau diana witing sulani dakni ampus dai yakat sahwi yakwi diana. 30Muhnilau Basán kingni Og, sakdai kidika witingna yak diana, yuldarang kat, Basán bitik Mahanaim kaupak tawan 60 Jair kau dini dai kidika, 31Galaad papusdak dawak Astarot dawak Edrei tawanni balna. Kidika bitik laih Maquir sulani balna duduna dai, Manasés walanbis, sulani balna ampus kat kaput duduna.
32Adika sauni balna kuduh Moses yaklauwi Moab walanbis dinina diayana dai, Jordán wasni makilwa nining Jericó muhnit yakat. 33Kaunah Leví sulani balna laih sau diawasdai, kaunah witingna yak aput diyulna: “Dawan dawi Israel balna Papangnina kidika manna dimana.”#Nm 18:20; Dt 18:2.
Currently Selected:
Josué 13: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
