Job 36
36
Eliú yulbauna wat arungka kidika
1-2Kulnam apis laihwattah, yang lawik masumalki,
kat Papang ilpni yulnik kidika baisa yul mahni dutayang.
3Di amanglatayang kidika bitik yusyamki
kaput laih lāih yakna atnik, yayamna muihni kidika rahmni duwi.
4Yang rahm mayultayang, alas as bik yultas awaki;
tamat yakat sins nuhni bitik duyang kidika dutaman.
5Papang laih parasni nuhni bitik duwi, dawak sins nuhni palni duwi,
di dutni yamwas muihni kidika#36.5 di dutni yamwas muihni kidika: grik kau kaput ulna. Hibru kau laih adika yulni kalahwaski. yakat dauh kapat kalkulwas ki.
6Dutni dawak diswaski, muih dutni yamyang sangnika yakat,
kaunah muih miniknakunni kidika niningna yakat lā kat yamwi;
7nining muih ahal bararangni balna yakat tanitna dakwi;
king balna kidika trunnina yakat ilwi dawi,
dawak maluih yakat diduwi.
8Kaunah sīn kau disitna ki
dawak dalani kidika wawauhna ki,
9Papang yaklauwi niningnakawi dutni yayamna kidika
amput dadawak witingna manah kapat kaldakanin yakat diduwi kiuna kidika.
10Yuldibauwi barangni diyamnin yulni
dawak diyulwak dutnina kidika danin.
11Yulni dakawi yulwa yakat bubukwakat,
alasna isningnalak kidika duduwi
sangninaka sutni bitik yakat.
12Kaunah yulni dakakawas laih,
dauwi, dawak sau ū yakat uiwi
witingna baisa isningna aiwas tanitkauh.
13Muih dudutni balna kidika kulninna daukakalwi,
silak ūni yakat karangbik ilp yuyulwas ki.
14Wahma yakauna dadauwi;
sangninaka kidika dahnkalwi asalni.
15Dalani wauhnin munah, Papang yaklauwi laihwi yakwi wauhwa muihni yakat;
dalani wauhnin munah diawak amanglalawi.
16Man bik, yamadangni kaupak malaihwi yakna,
dawak pri lani kidika manas palni mana;
man timabil yakat kasnin dini auhni kidika buhngdana.
17Muih dutni lani yamnin kidika laih man yakat ki,
lama yamwi daunin yakat mawirlanin kidika kaupak sip satuk wirlatasman.
18Amungtalah, datangkat muih ūk yaklauwi mayulnin awaski ais yamnam kidika,
datangkat lalah kidika kulnam laihnin awaski.
19Kaidinin yakat ilp as diskarang
parasma bitik kau sarahma bik.
20Iripnam awaski pukta kaiwabahang,
tawan balna kidika pini didiswak.#36.20 Muih dutnii lani... pini didiswak: wirlana yamni kapat kidika. Hibru kau ulna kidika S.d. 17-20 kidika laih amangladaski.
21Amungtalah, watwi dutni yakat kiunin awas,
man kidika dalani wauhnin munah mahawi talna bahang.
22Papang parasni nuhni bitik duwa yakat talah.
Sumalyang as bik witing kapat awaski;
23muih as bik kalyulnin awaski, witing ais yamnin kidika,
muhni yakat lāih yaknin awaski dutni yamna kidika
24Sau muihni balna bitik warkni yamna balna kidika nuhni dulauwi yuyulwi;
ismang aitah, man bik ayangni nuhni yamnam.
25Muih ahal bitik sipki talnin,
naikau karang bik.
26Papang laih nuhni ki, sip amangladaski;
witing kurihni bik sip kuldaski.
27Was tahwa balna kidika witing di kau utuhwi duwi,
usnitkat kalawak waslauwi.
28Waslauwa wasni kidika mukus kaupak tiliwi kalahwi
dawak muih balna minitna yakat was parasni lauwi.
29¿Wais amanglawih, amput dawak mukus balna kidika uiwi,
amput dawak kisang yakat alwana kidika yulwih?
30Papang yaklauwi kalawak alwana kidika lapwi kuma muhni yakat,
kuma yakat kalawak yakmaldi.#Sal 18:13-15.
31Kaput bayahwi#36.31 Bayahwi: kaput ulna kidika yamni kapat ki. Hibru kau laih lani laihwi yamwi. tawan balna yakat
dawak kasnin dini kidika mahni diawi.
32Alwana lapwa kidika tingni yakat laihwi duwi,
dawak witing angkat laknin kulwa kidika yakat lakwi.
33Alwana kidika laih Papang yakat yulwi,
wing bauwa kidika kulnin daukalna kidika yulwi.#36.33 Alwana... kulnin daukalna kidika yulni: kaput wirlana kidika yamni kapat ki. Hibru kau laih amangladaski.
Currently Selected:
Job 36: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
