Job 10
10
1¡Yasuhdana sangkayang adika!
Kulnik kaida kidika barangni yultik yakpamki,
tapalhni dutayang kidika laihwattas dating kalahwi kiwarang.
2¡Papangki, dutni yamna yakulwinih!
¡Yayulta ais dutni yamnayang kat!
3Kaput laih man lawa yayamnaman muihki adika,
¿yamni kapat talaman yang akat yawista dutni yayamtaman kidika,
dawakat muih dudutni balna warknina kidika yamni talamanh?
4¿Kaput bahang, sau muihni balna di tatalwa kapat man bik talamanh?
5¿Man sangmaka kidika parahni katpah,
muih dauyang balna sangninaka kapat?
6Kaput kat, ¿ais yamta dutki balna kidika waltaman,
7man amanglataman, yang dutni yamtasyang,
dawak man parasma kaupak sip muih as bik yalaihwi yakwas kidika?
8Man tingma kau yalaihta yayamnaman,
¡dawak waralaih yadispamnin kultaman!
9Ismang aitah sau kau yayamnaman kidika:
¿dawakat waralaih watta sau yahamni yakat yawirlakuh timan?
10Yang muihki adika yamnaman,
tāwas yaklakwak dadasni kalwa kapat;
11dawak muihki kiwiski bik yanaman,
dawak kaput bik ukitak yanaman,
wakalki balna yanaman sinikiwah balna bitik;
12sangkika bik yanaman, kaput bik dalani yatalnaman,
mainyatalnaman kidika yulni sangkayang.
13Kauna waradika ismang yakat talayang
di as malna dutaman:
14yatalasakman dai, yang dutni yamki pa,
dawakat kaput laih dutni yamnayang yulni laih daunin yakat yaruhmna atnam.
15Yang dutni yamnayang kat, uman disnayang;
dawak dutni yamtasyang kat, dibin manah alasna duki,
kat man lawa sauyakat yalakpamnaman yulni kulnik bukna.
16Kulnik parasni duki kat nawah kapat yauita aiwaman,
dawak di taldas dini balna kidika yamtaman yadispamna atnam yulni.
17Man namang yakat yulki trukyang balna dis awaski,
kulnam daukalnin lani balna kidika baisa nuhni kalwi;
¡kalbauyang balna mahni kapat yang mikit yakat aiwaman laihwattas!
18¿Ais yamta yadatang batahndanayang?
Daunik dai baisa muih as bik yatalwasdai yakau.
19Nanangki bānipas kaupak sau ū kat bayaknik dai barangni,
kaput laih sau akat disyang kapat kitdai.
20Sangkika adika parahni bahang, ¡kulnik aslah yadata!
Yadatang alasna apis dukuh
21watwi nawatwi kaiwas atnin pāni yakat yawasyang tanitkauh,#Sal 39:13.
puksani pāni yakat,
22puksani pāni dawak sip di amangladas pāni yakat,
kidika yakat laih yaringni kidika sihm puksani kapat ki.
Currently Selected:
Job 10: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
