Job 9
9
Job
1-2Yang amanglatayang adika laih kaput ki,
bahang Papang niningyakat laih sip yuldaski di as bik dutni yamdas ki.
3Muih as Papang karak kalbilnin kulwarang kat,
kulnin lani tausin yakwarang yakaupak as bik laihwas karangki.
4Papang laih parasni nuhni duwi dawak bik sinsni lani bik,
¿wais sipyah witing niningyakat yaklauwi yamni minit bayakna atnin?
5Papang, kulnin daukalna kidika kau asang nunuhni balna bik itikwi,
dawak tuklakwi, kauna muih as bik amanglawas ki.
6Witing yaklauwi kalawak sau adika dulauwi isihwi,
dawak rahni balna āna kidika bik isihwi.
7Witing yaklauwi pakwak ma kidika kalahwas ki,
dawak yala balna bik ingni yayakwas ki.
8Muih as bik tingnisut laihwas ki kauna makau kisang kidika yamna,
dawak kuma paskau di anyang dutni kidika bik taihwi sikitna.
9Witing yaklauwi yala balna kidika yamna:
Osa mayor, Orión dawak Pléyades,#Job 38:31; Am 5:8.
dawak wadah niningkauh yala uduhna as balna kidika bik.
10¡Witing di manas taldas dini balna nunuhni kidika yamwi,
dini balna kidika muih as bik amanglawas ki!#Job 5:9.
11Papang kidika yaihkit munah kaiwi bayakwarang bik sip talas awaki;
bayakwak bik amanglatas awaki.
12Witing di as laihwi duwarang kat, ¿wais sipkarangyah laihwinih kalatnin?
¿Witing di balna yamwa kidika wais yaklauwi kalyulwarang yah?
13Papang kulnin daukalwakat, sip īsi lungwaski;
witing kalni dinit yakat Rahab#9.13 Rahab: di dutni anyang nuhni as dai, sara muihni balna kukulwadai, kidika laih parasni nuhni as duwadai Papang waihnila as. (26:12 yakat talah.),#Job 26:12; Is 51:9. karak aslah kalpapakna balna dai kidika bubukna ki.
14¿Amput yul as yaktik
Papang nining yakat yulkiyah?
15Yang di as bik dutni yamtas awaki bik, sip-awasyang nangnitlana atnik,
witing laih wihta, bahang mikun yatalnin manah laih sipyang yulna atnik.
16Yang lawik la ūni yakat yulki karangkat, witing kiwarang yakat,
dawak bik kultayang yulki balna kidika, witing kulwas karang.
17Kalawakat mikit yakat wingnuh as kaiwarang,
dawak dauh kauh laih pilauki balna kidika manas kalahna karang;
18kalawak tapalhni balna kidika yabang-ilna karang,
dawak wingkita dunik bik sip-awas awaki.
19¿Yang paraski kau yamnik karangkat?
Witingkauh tanit parasni ki.
¿Lā yakat kaltiki karangkat?
¿Wais laihwi dukiwarang yah?
20Yang, barangni, di as bik dutni yamtas awaki karang bik,
Witing#9.20 Witing: kaput ulna kidika yamni kapatki. Hibru kau laih yulwi yang. Wirlana ūk balna yakat yulwi: yang silp tikpas kau yukna awaki yang laih dutni yamnayang. yaklauwi dutni yamna yakulwarang ki.
21Yang dutni yamtasyang,
kauna kidika laih dauh di diski;
yang sangkayang adika yasuhdana.
22Di bitik laih sihm kapapat manah ki. Bahang kidika kaput kultayang yang:
dawak witing yaklauwi iwi dis yamwi,
dutni yamna muihni yakat dawak dutni yamwas muihni yakat bik.
23Daunin dini kaiwa kidika yakat muih dutni yamwas bik dauwi,
dawak Papang laih kari, kulninna ababahlwa muihni balna yakat.
24Sau adika muih dutni balna tingnina yakat āwi dawi,
dawak wihta balna kidika miniknapa sitwi.
Bahang Papang yaklauwi yamwas kat ¿wais yamwarangyah?
25Yang maki balna kidika parasni palni kirana ki,
kulnik alasna kidika talasyang kat.
26Kuma kuring parasni kikira kapat kiwi,
dawak sihm yakal di laihkuhti parasni uiwi kiwa kapatki sirihni kiwi.
27Dalawa balna kidika dakas datik alasna kapat alahwakuhting bik,
28dalawa balna kidika bitik watwi kaiwi bilkilauwi,
bahang Papang laih muih as bik yakat dutni yamwaski laih kaltaski.
29Dawak witing yaklauwi dutni yamnayang yakulwākat,
yang sip di as bik yamtasyang.
30Yang tingki kidika sup#9.30 Sup: satuk wirlana kidika: mukus wasni. kau suhki karangbik,
dawak sup wasni balna kapatnah kau kahki bik,
31Papang yaklauwi wasmak yakat yataihawarang,
dawak yang silp prakki balna kidika bik tiking dulihwarang.
32Papang muhni yakat sip lawasyang, muih al as kau yamnin kapat,
dawak bik kalyulnin witing karak lā ūni yakat yawinikna.
33¡Yamnikitdai, yaihkitna yakat wihta as sakkat laih,
yangna mikitna yakat parasni duwakatlaih,
34Papang wah yawa kidika laihwatna atnin,
dawak uba bilkilauwa kidika bik!
35Kaput kat laih yang yamadutas yulki,
kat yang kulnik yakat diski witing muhni yakat dutni yamnayang kidika.#9.35 Kat yang kulnik...kidika: grik kau ulna kidika laih kaput yulwi. Hibru kau laih yulwi kat yang laih kaput awasyang yang muihki yakat.
Currently Selected:
Job 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
