Jeremías 51
51
Babilon daukalpamna
1Papang yulwi:
“Wing parasni as sihki,
Babilon dawak Caldeo balna#51.1 Caldeo balna: barangni yulnin kat isningna yang nikingkauh dulalauwa kidika, Caldeo balna kaput uhulwa kidika. (Talnam sipki 25:26; 51:41 yakat.) niningna yakat.
2Yamtingkat Babilon witing waihnila balna kidika dutni diyayamna karang;
plawar minik wing yakat ruhmwa kapat;
yamting kat witing sauni kidika muih dis dana karang.
Wah kalanin mani kidika kiwi kawakat,
pa bitik kaupak kalahwi witing nining yakat kalbabauwarang.
3¡Las ruhmyang balna kidika lasnina ridi yayamwang!
¡praknina ayan kidika kakawang!#51.3 ¡Las rumhyang...kakawang!: grik kau laih kaput ulna. Hibru kau laih amangladaski.
¡Babilon wawahnima balna yakat miniknakun tatalwinih;
kalbauyang muihni balna kidika bitik imuktanauh!
4Caldeo balna saunina bitik yakat
muih balna kidika tapas yakat bubukna karang,
5Israel dawak Judá kidika yang niking yakat dutni yayamna
yang Papang paraski bitik dutayang,
Israel Papangni maisihnidis,
yang baisa ruhmtik datasyang.
6“¡Babilon kaupak alahwa iranauh!
¡Witing dutni yamna kidika yulni dadauwinih!
Adika awarni kuduh biritik kalyamnik,
dawak yang lautik kalana awaki witing dunin kidika praisni kat.#Is 48:20; Jr 50:8; 51:45; Rib 18:4.
7Babilon kidika yang tingki yakat gol sunitak as dai,
dawak muih bitik yakat wasak diawadai.
Nisan balna kidika wainni#Rib 17:2-4; 18:3. didiwa dai dawak sinsnina diswadai.
8Kauna sirihni laih Babilon kidika bahwi uhna.#Rib 18:2.
¡witing yulni aidanauh!
Di kalina sinika duaitanauh,
taldarang kalyamwarangpa.”
9Babilon yakat uman sinika ānamayang,
kauna kalyamwas dana.
¡Datanauh! Mahka masauki kat kat mawanang,
kat witing dutni yamna kidika laih makau kisang kat kilwi kawi#Rib 18:5.
dawak mukus yakat bik dulauwi.
10Papang yaklauwi marahmki kidika kalawak minit bayakna.
Aiwanangkat Sayan yakat mawi yuldanang mayang Mapapangki yamna kidika.
11Papang laih Babilon kidika daukalpamnin kulwi,
dawak Media balna kingnina uswi sahmuhna kidika kulnin kau.
Kidika ki Papang biriwi yamwa kidika,
witing uni kau yayamna yulni.
¡Sibang kidika ridi yamtanauh!
¡Dawak namatna daknin kidika bik yamni laihtanauh!
12¡Babilon daklana balna niningyakat kalbaunin kidika sain kalatanauh!
¡Maintalnin kidika baisa parasni yamtanauh!
¡Makau kilwi maintalnin kidika ātanauh!
¡Isning aiwas kat tanipas yakat kalahwi kalbaunin kidika ātanauh!
Kat papang laih ridi kalna dawak yamna,
witing yamnin dini balna yulna dai kidika Babilon muihni balna niningna yakat.
13Man, Babilon was nunuhni#Rib 17:1. kung yakat man kidika,
ritsni nuhni dutaman,
¡kauna māma witni kidika kaiwi kana,
baisa sau akat atnam kidika!
14Papang parasni nuhni bitik duwa kidika witing sangnika kau yakwi yulna:
“¡Man waihmala kidika kalating kat sisin kapat mahni kalna karang,
dawak kidika balna man mamat yakat minit bayakna kidika unbabauwarang!”
Papang yakat ayangni nuhni yamwi unbauna
(Jr 10:12-16)
15Papang parasni kau duwi, sau adika yamna;
sinsni tuhni kau, di balna bitik yamna;
dawak sinsni sirihni kau makau kisang kidika yamna.
16Dinit alwana kapat yulwak, was kidika parasni yulwi, makau kisang yakat,
sau sutni kaupak kalawak mukus kidika kilwi,
yamwak alwana kidika yaringni lapwi, waslauwa pasyak
dawak wing kalawak kalahwi apakna sakkidika kaupak.#Sal 135:7.
17Muih kidika laih tapani dadasni, dawak di amanglawaski.
Dawan dauh alas diyuyulwi, yamyang muihni balna yakat:
kidika balna laih wayani manah ki, dawak bik alasmanah ki.
18Kidika dini balna laih minit diski, karinin dini manahki,
Dawan la yamwarang yakat bahwi disyamwarang ki.
19¡Jacob Papangni kidika ais satukyah,
di balna bitik yamyang kidika!
Israel kidika witing dini yakwi duna.
Papang parasni nuhni bitik duwi, bahang kidika laih witing ayangni.
Babilon kidika laih Papang yaklauwi wah kalanin dini as kapat duwi
20“¡Babilon, man laih yang amarki man,#Jr 50:23.
yang war kalbautayang dini!
Man yakau nisan balna kidika itayang,
dawak king panina balna bik daukaltayang.
21Man yakau aras dawak, aras kilyang muihni balna bik itayang,
dawak kārnina balna bik daukaltayang.
22Man yakau muih ahal dawak yayal bik itayang,
muih bararak, wawahma, dawak sirarau bik itayang.
23Man yakau sīp maintalyang muihni balna dawak sīp balna bik itayang,
kaput bik laih di dahnin pāni tutukwa balna dawak wark tuniruh ahalmuk bik itayang,
dawak kabamint muihni balna bik.
Babilon wah duwarang kidika
24“Kauna manna mamaknapa yakat,
Babilon dawak Caldeo muihni balna kidika bik lautik diaki,
Sayan kau dutni yayamna kidika yulni.
Yang Papangyang kat yultayang.
25Yang manna namangnakauh yang,
asang balna daukalyang,
dawak sau bitik daukalwa kidika.
Yang Papangyang kat yultayang.
Yang tingki dulautik wah diaki,
yamtingkat kipala walsah munah piramma,
dawak asang busna kapat mayamki.
26Madaukalna kinipala balna kidika as bik sip-awas karang ū yamna atnin.
Kauhmak wanilang as awama ban kaput atnin.
Yang Papangyang kat yultayang.
27“¡Kidika pāni minityakat sain kalatanauh mahka kalbaunin!
¡Trumpit puhtanauh dawak nisan balna kidika ridi yamtanauh Babilon niningyakat kalbaunin!
¡Ararat, Mini dawak Askenaz kingni balna niningyakat yaklauna!
¡Kalbauyang balna taninatuna nuhni as atanauh war adika tatuna duna atnin!
¡Aras kau kilna muihni balna kidika kalatanangkat kawi kiwang sihm sisin ahanna kapat!
28Nisan balna kidika ridi yamtanauh mahka kalbauna atnin;
Media kingni balna, kabamintni dawak tunan muihni ūk balna kidika ridi yamtanauh,
dawak sau muihni balna bitik parasnina duduwa balna kidika bik.”
29Sau kidika yukwi dawak kal-isihwi,
kat Papang warkni balna kidika yamwa bahang Babilon kidika kauhmak wanilang yamna atnin.
30Babilon muihni kalbauyang balna kidika kalbauwas dadana dawak ūnina parasni yakat wawatna;
parasnina bik dis dana yayal kapat.
Tawannina nunuhni yakat kawi duduna dawak ūnina balna kidika bik bubusna.
31Yul muryang balna kidika uiwa sakki Babilon kingni yakat kalyulna atnin,
witing tawanni nuhni kidika uman kawi duduna bitik.
32Waihla balna kidika was murwi bayakwa yakat kawi duduna,
tanitna dadakwa pāni#51.32 Tanitna dadakwa pāni: kaput kidika yamni wirlana. Hibru kau laih wasmak balani. balna yakat bik bubusna dawak kalbauyang balna kidika yamaduduna.
33Kat Papang parasni nuhni bitik duwa kidika,
Israel Papangni, yulwi:
“¡Babilon kidika laih atatakna ki di dahnin pāni as kat,
di minik balna unitak yakwi atatakwa kapat,
dawak sirihni kat di minik balna bahnin mani kiwi kawarang!”
34-35Sayan tawanni Jerusalén yulwi:
“Nebokatnesar Babilon kingni,
yaiswi biswi dawi yakasna;
di lakwi kasnin pāni manah kapat yayamna.
Kuma paskau di anyang dutni kapat yadalna;
dukih kalawa dai kidika kalbungdana dawak sutni kidika ruhmmukna.#51.34-35 Sutni kidika ruhmmukna: kaput kidika yamni wirlana. Hibru kau laih amangladas ki.
¡Babilon minitlauwang yangkau yayamna kidika yulni!
¡Caldeo balna minitlalauwang wanaihki balna ihina kidika yulni!”
Israel pranimis
36Papang yulwi:
“Man lama kat yamki, waihmala balna yakat biritik diyamki.
Babilon wasni balna kidika buhni manh yamki,
37di daukalwak uduhna as karang,
kauhmak wanilang sunilu pāni kalna karang,
muih as bik yalahnin sip-awas karang muih bitik laih di bilninalauna karang.
38Witingna bitik laih layan kapat ihihwarang
dawak bik layan walanibis balna kapat.
39Ma daihwakat, yang was diating didiwarang
bahang kidika laih wasak dilaihwakat sinsnina diswarang.#51.39 Sinsnina diswarang: ulna uk uk balna yakat kaput yulwi. Hibru kau laih alasna duduwang.
Kaput laih makauh as dilaihwak bubukwarang, sahmuhwas kaput atnin.
Yang Papangyang kat yultayang.
40Usnit dawak inin pāni yakat duwi kiuna karang,
sihm sīp, kuts dawak turuh dukiwa kapat.”
Babilon bukna
41¡Babilon,#51.41 Talah 25:26 dawak 51:1 yakat. tawan nuhni ayangni nuhni sau bitik yakat,
bukna dawak kawi laihwi duduna!
¡Nisan balna kidika ampat yamaduduwih talwi!
42Kuma kidika bang-ilna Babilon yakat,
lalamwa nunuhni kidika minityakat utuhwi lakna.
43Tawanni nunuhni balna kidika kauhmak wanilang yamna,
sau buhni didis, bang kidika yak laih muih as bik yalahwas ki,
dawak yakut bik muih bayayakwas ki.
44“Dawan dauh Bel kidika yakat wah kalaki ki,
kalyamtingkat dalna balna kidika tining yakwarang,
nisan balna kidika watwi witing yakat uiwas karang.
¡Babilon daklana balna kidika uman bubukna!
45¡Yang tawanki kidika kaupak alahwah,
manna sangmanaka laihta yaktanauh,
yang kulnik daukalna daihni kidika kaupak!#Is 48:20; Jr 50:8.
46Muihsak dadauwinih, dawak bik yamaduduwinih,
yul balna kalahwa kidika adika sauni pas akat.
Kurih kaiwa bitik yakat yul balna kidika satuk kalahwarang ki,
kalbaunin yulni kalahwarang ki,
dawak kabamint balna biri biri kalbabauwa kidika bik.
47Kaput bahang, mani balna kaiwi,
Babilon daniwan dau balna yakat wah dianik mani.
Muih balna kidika bitik laih sau yakat bubukna karang,
dawak muih dauna muihni manah kalna karang.
48Makau kisang, sau dawak di balna bangkidika bitik
alasna duduna karang Babilon#Rib 18:20. kidika bukwak,
aiwarang muihni kidika tingpal niningkaupak kaiwarang mani kat.
Yang Papangyang kat yultayang.
49Agha, Babilon laih buknin ki Israel muihni balna ina kidika yulni,
dawak kaput bik sau bitik yakat muih ina kidika yulni bik.”#Rib 18:24.
Yul sihna Babilon kau Ju balna bangkidika yakat
50Manna, muih dauwasak kidika kaupak ira lawamana kidika,
iranauh wattas ki,
dawak naikau yawanamana karang bik Papang yakat kultanauh,
dawak Jerusalén bik ismangna kattanauh.
51Manna yultamana: “Asalni dakadi dutni kalyulwak dakadi.
Risnipik dis kidika mamuhki yakat mukna ki,
kat sau ūk muihni balna kidika
makat yulni ūnipas kau pa maisihnidis kidika yakat kakana bahang.”
52Kauna Papang yulwi:
“Mani balna kaiwi,
Babilon daniwan dauh balna yakat wah diana atnin,
dawak witing sauni bitik yakat muihnina dakna balna kidika kakaidarang.
53Babilon kidika makau kisang yakat kilkiwarang
witing parasni kidika baisa parasni yamna atnin,
kauna kidika yakat bik waihnila balna kidika sihki ina atnin.
Yang, Papangyang kat yultayang.”
Babilon daukalpamna
54Babilon kaupak dalawak sararahwa kidika lāih dakanaki,
Caldeo balna panina kaupak di parasni yulwa kidika bik lāih dakana ki.
55Papang yaklauwi, Babilon kidika daukalpamwi,
dawak tapani dadasni kidika yakat dahn kalwi.
Waihnila balna kidika,
kuma lalamwak parasni yulwa kapat
parasni witingna minitna yakat bukna karang.
56Babilon yakat daukalpamna aina;
kalbauyang muihni balna kidika uman laihwi lasnina balna dai kidika bitik babahna.
Kat Papang laih Papang bahang witing yaklauwi muih balna bitik yakat minitna diawi.
57King, Papang parasni nuhni bitik duwa kidika yulwi:
“Babilon tanituna balna kidika wasak diaki,
sins nuhni duyang balna dawak kabamintni balna yakat bik,
dawak kalbauyang muihni balna yakat bik,
dawak miniknakauhwak bukwi kamamarang,
kauna kidika kaupak watwi sahmumuhwas karang ban kaput atnin.
58Yang, Papang paraski nuhni dutayang kidika yultayang:
Babilon daklana tubakni kidika bahna karang bitik ki,
dawak dūrni nunuhni balna kidika kuh kau busna karang.
Nisan balna kidika dauh palni wark kalalahna,
kat parasnina yayakna dai kidika kuh yakat busna karang bahang.”
Jeremías yulni kidika Babilon yakat duwi uiwi
59Judá kingni Sedequías, witing king kawak kurih arungka laihna yakat, prapit Jeremías yaklauwi di yamnin as kalana Maasías mani, Nerías walanibis Seraías yakat. Seraías kidika laih witing king Sedequías kidika Babilon yakat kiwak witing bik kiuna dai, king payahwa pāni kidika ridi yamwi dangni bik rina atnin. 60Jeremías wauhtaya as ulna dai, bahang kidika yakat ulna kidika laih Babilon yakat wah sihwarang yulni balna ulna dai, yuldarang kat wah balna bitik kiwarang kidika Babilon yakat, 61dawak Seraías yakat kalyulna: “Babilon yakat yawama kat, amungtala yulta talma adika yulni balna bitik. 62Usnit dawak yulma: ‘Papang man yulnaman adika sauni daukalpamnam, yuldarang laih muih as bik kaiwi yalahnin sip-awas, dawak didauh balna bik, kat man lawa walang kauhnimak yampamma bahang ban kaput atnin.’ 63Dawak yulta talma usnit kat wauhnitaya adika kipala as sit data Éufrates wasni yakat ruhm'apamma, 64dawak yulma: ‘Babilon kidika kaput kawi kiwarang ki, bahang watwi sip yaklauwas#Rib 18:21. karang ki wah nuhni Papang sihwarang kaupak.’ ”#51.64 Hibru kau laih minityakat lakwi yulwi: dawak disuhna karang.
Jeremías yulni balna kidika akat dahnkalwi.
Currently Selected:
Jeremías 51: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
