Jeremías 52
52
Sedequías king kana
(2 Re 24:18-20; 2 Cr 36:11-16)
1Sedequías kidika witing kurih muihasluih minit kau as duwa kat witing king kanadai, dawak Jerusalén yakat manah kurih salap minitkau as king kana. Witing nanangni ayangni laih Hamutal, Jeremías walanibis yal, bahang witing laih Libna kaupak dai. 2Kauna witing warkni balna kidika Papang niningyakat dutni manah dai, sihm Joacim yamna kapat. 3Kidika bahang Papang kulnin daukalna dai Jerusalén dawak Judá nining yakat bik, kaput laih witing kaupak kangwi yakna dai.
Jerusalén bukna
(2 Re 24:20-25:7; Jr 39:1-7)
Usnit kat Sedequías kidika Babilon kingni niningyakat yaklauna dai. 4Sedequías king kana kaupak kurih tiaskauarungka laihwi bayakwak, waiku salap laihwak ma salap kawa yakat, king Nebokatnesar witing kalbauyang ahalni balna duwa kidika balna karak witingna Jerusalén niningyakat uiwi awaihdadakna.#Ez 24:2. Muhni tani yakat uiwi wawatna dawak, mahka laih sau uhwi duwi iluiwa dai daklana yakat, mahka kalbauna atnin yulni. 5Tawan nuhni kidika awaihwi dakna sakdai, Sedequías king kana kurih salap minitkau as laihna kat. 6Kidika kurihni laihwak kaupak waiku arungka laihwi kai'bayakwi ma tiaskauarungka laihwa yakat, baisa yul kidika parasni lakna dai, dawak muih balna kidika di kasnin dini diskakalna dai. 7Kaput laih tawan nuhni daklana yakat sulihni as yayamna dai,#Ez 33:21. dawak Caldeo balna kidika awaihdadakna bik, king#52.7 King: 39:4 yakat kaput yulwi. Hibru kau laih kaput yulwas ki. dawak kalbauyang muihni balna kidika bitik kalahwi kikirana dai pukta yakat. Daklana walsah kau dūrni kidika munah kalalahna dai, king dinipulu dahna pāni munah kalahwi Jordán niningkauh kiwa tani yakat duwi uina dai. 8Kauna Caldeo muihni balna Sedequías yakat uiwi uina, dawak Jericó langni yakat uiwi kukuihna. Witing kalbauyang muihni balna duwalik dai kidika bitik laih kaldapamwi kalruruhna. 9Caldeo muihni balna dai kidika king yakat laihwi Babilon kingni yakat duwi uina, bahang witing laih Ribla yakat sakdai, Hamat sauni yakat. Kidika yakat Nebokatnesar yaklauwi lani yamna dai Sedequías niningyakat, 10witing muhni yakat walanibis balna kidika dininamak dakna dawak Judá kau tunan muihni balna dai kidika bik ina dai. 11Dawak Sedequías yakat laih pakwak minikpa yayakna dai, usnitkat tingni sitwi duwi kiuna atnin Babilon yakat,#Ez 12:8-13; 17:18-20. bahang yakat sakkauna dauna.
Makatyulnin uni daukalpamna
(2 Re 25:8-21; 2 Cr 36:17-21; Jr 39:8-10)
12Babilon kingni, Nebokatnesar, king kana kurih salap minitkau tiaskauarungka laihwi bayakwak, waiku singka laihwak kaupak ma salap yakat, kalbauyang balna taninatuna nuhni palni Nabuzaradán, witing Jerusalén yakat kiwi 13makat yulni ūni kidika busna,#1 Re 9:8. dawak king uni bik, dawak ū balna kidika bitik busna, kauna tanit kidika laih muih nunuhni balna ūnina dai kidika busna, 14Caldeo muihni kalbauyang balna dai kidika Jerusalén daklana balna dai kidika tukwi lalakna. 15Usnitkat Nabuzaradán yaklauwi muih balna wawatna bangdai kidika bitik laihwi duwi kiuna Babilon yakat, kaput bik tingkau diyamyang balna dai kidika bitik duwi kiuna dai. 16Muih miniknakunni balna manah damukna dai, witingna kidika wain dahwi, yamak warkni bik yamnin yulni.#Ez 12:14-16; 17:21.
17Caldeo muihni balna yaklauwi makatyulnin uni kau bras kau di dunin dini yayamna bangdai kidika bitik babahna: ū rahni nunuhni balna dawak was laihnin dini nuhni sakdai kidika bik, dawak bras balna dai kidika bitik Babilon yakat duwi uina. 18Wan punin dini balna, subil balna, awas pinin dini balna, sutak nunuhni balna, panyamna nunuhni balna, prias yakat di duduwa balna dini bitik duwi uina dai. 19Kaput bik laih, kalbauyang balna taninatuna yaklauwi gol dini balna dai kidika bitik duwi kiuna dawak lalah bik; sutak balna, kuh tuturni punin dini balna, sutak nunuhni balna, wan punin dini balna, panyamna nunuhni balna, dawak wain utuhwa sunitak balna bik duwi kiuna dai. 20U rahni nunuhni bu dai kidika, was laihnin dini nuhni dai kidika dinit yakat rahni kapat turuh ahalmuk wayani salap minitkau bu yamna dai kidika, kaput bik Salomón yaklauwi pakwak ū rahni nuhni as yayamna dai kidika laih sip awasdai tikini duwa kidika kulwi talna atnin. 21Rahni balna kidika laih maluihni metro tiaskaubās duduwa dai, dawak pirihta nuhni kidika laih metro singka minitkau papusbah duwa dai; paskau kidika laih sulihni dai, dawak minitkau bras duwa kidika laih tubakni centímetro tiaskaubu duwadai. 22Rahni balna kidika tuna pasyakat kraun kapat yamna dai bras kau maluihni metro bu dawak di minik granada bik alahna dai. Bahang rahni balna bupak kapapat dai. 23Rahni balna tuna kau daklana kidika yakat di minik tuyuyulni kapat andat bangdai, kidika balna muihasluih arungka minitkau salap minitkau tiaskauas kidika laih lāih bangdai.#1 Re 7:15-47.
Ju balna pa ūk yakat laihwi duwi uina dai kidika
24Kalbauyang balna taninatuna yaklauwi laihna dai sumalyang nuhni Seraías, dawak, kidika kaupak usnit Sofonías, kaput bik laih dūr maintalyang bās dai kidika bik, witingna makatyulnin ūni kau bangdai kidika. 25Tawan muihni balna yakat laih laihna dai, kalbauyang balna taninatuna, dawak king yaihnit yakat kalbauyang tiaskaubu duwa balna dai kidika bik, kaput bik kalbauyang tanituna as war yakat sihnin muih laihyang dai kidika bik, kaput bik laih muih nunuhni muihas luih bās minit kau salap tawan yakat bangdai kidika balna bik laihna dai. 26-27Nabuzaradán yaklauwi adika muihni balna bitik king muhni yakat duwi kiuna dai, witing Ribla yakat sakdai yakat, Hamat sauni yakat. Kaput laih kidika yakat pakwak imumukna dai.
Kaput laih, Judá muihni balna kidika sau ūk yakat laihwi duwi uina. 28Nebokatnesar muih aput laihwi duwi kiuna dai: king kana kurih tiaskaubu yakat laihna dai muih tausin bās minitkau muihasluih minitkau bās Judá kaupak manah; 29dawak kurih salap minitkau tiaskaubās yakat laih laihna dai Jerusalén kaupak andat tiaskaubās minitkau muihasluih minitkau salap minitkau bu; 30kurih muihasluih minit kau bās yakat, Nabuzaradán yaklauwi laihna dai Judá kaupak, andat tiaskaubu minitkau muihasluih bu minitkau singka, bitik libitwak tausin arungka minitkau andat tiaskauas.
Joaquín kidika laihwi yakna dai, dawak Babilon kaupak parasni risnipik bik kalana dai
(2 Re 25:27-30)
31Judá kingni Joaquín laihwi duwi uina; kurih muihasluih minitkau salap minitkau tiaskaubu yakat, king kanadai Babilon yakat Evil-merodac, kaput laih witing Joaquín yakat minikun talna dawak silak kaupak yakna, 32yamni kalyamna king ūk balna silak yakat duwasak kidika balna karak. 33Kaput laih Joaquín kidika sipdai silak uni yakat prakni kawa dai kidika yakwi dawi king karak di kasna atnin, sangnika sutni bitik yakat. 34Baisa minit yak, sangnika bitik yakat, dawak dauna kat, Babilon kingni kaupak Joaquín witing ilp duwadai, ma bitik yakat king kaupak.
Currently Selected:
Jeremías 52: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
