Jeremías 50
50
Babilon bukna
1Babilon tannika yul sihna kidika,#Is 13:1—14:23; 47:1-15. Caldeo balna saunina, Papang yaklauwi yul sihna dai kidika prapit Jeremías munah:
2“Adika isningna paktanauh, nisan balna bitik yakat.
Isningpakna sainni kidika dulautanauh; yul as bik mamalwinih.
Yultanauh: ‘¡Babilon yakat uman kawi duna!
¡Dawan dauh Bel kidika yakat niningkarana ki,
dawak dawan dauh Marduc kidika laih muihsak dauna!
¡Daniwan dauh balna kidika yakat niningna karana,
dawak muihsak bik dadauna!’#Is 46:1.
3Kat tingpal niningkaupak kaiwi nisan as witing nining yakat,
witing sauni kidika kauhmak wanilang yamna karang.
Muih as bik, tinglau, asangpas dini balna bik,
sip awaskarang kidika pāni yakat atnin,
kat bitik laih kidika kaupak kikirarang bahang.”
Israel balna nawatwi aina
4Papang yulwi: “Kidika mani balna yakat Israel muihni balna dawak Judá muihni balna bik kaidīnah aiwi yawawalwarang, yang Papangnina yang akat. 5Sayan tani angkut kiwa kidika yulwi dakakawarang, dawak kidika yakut uiwi yuyulwarang: ‘Papang yakat mawi, dawak aslah kalpakdi pramis ban kaput atnin as yamdanang, madikitkahwas ban atnin.’
6“Yang tawanki kidika laih sīp ta didisna#Ez 34:5-6; Zac 10:2; Mt 9:36; Mk 6:34. kapat dai, maintalyang muihni kidika yamni maintalwas damukwak asangpas yakat uina ta didisna kapat. Asang ūk kaupak asang ūk kat uina witingna panina daklana kidika dinitna kahna dai. 7Waihnila balna karak kalpapakwak iwi kaswi yuyulna: ‘Mayang dutni yamdaski, kat witingna laih Papang niningkauh dutni yayamna bahang, witingna sihrninasihr diawa dai, dawak muihnina bararak balna tahaninna as duduwadai kidika yakat.’
8“¡Iranauh Babilon yakat,#Is 48:20; Jr 51:6,45; Rib 18:4. Caldeo balna saunina yakat!
¡Sihm tinglau balna taninatuna duwi kalahwi kiwa kapat alahwa yawanauh!
9Kaput laih yang lawik yamtingkat,
tingpal niningkauh muihni balna pararasni kidika yaklauwi Babilon niningyakat kalbabauwarang.
Dawakat dakyakwi kawi duduwarang.
Kidika balna laih war kalbauwi lan balna ki,
sininabang ruruhmwa kidika as bik laih ruhmlalawas ki.
10Caldeo balna dinina kidika dakyayakwarang;
dibuhng danin kat.
Yang Papangyang kat yultayang.
Babilon bukna
11“Manna, Caldeo muihni balna tawanki dini dunamana,
¡alasna dutanauh!
¡Turuh yal sirau kapat sihrsihr minit yakat suttanauh!
¡Aras kapat suttanauh!
12Kaunah manna saumana dawak batanh danamana tawanni nuhni kidika laih asalni kalahna karang.
Nisan balna bitik dinitnayak karang,
kauhmak wanilang buhlakna kapat karang.
13Kulnik daukalwakat muihni balna kidika bitik dis yamki,
dawak kauhmak wanilang yamki.
Muih yakut bayayakwarang bitik muihsak dadauwarang wah duna kidika tatalwarang kat.
14“¡Las ruhmyang balna, pamana dutanauh,
Babilon yakat awaihdakta dutanauh!
¡Simabang kidika bitik witing niningyakat ruhmtanauh,
kat yang nikingkauh dutni yamna dawak Papang niningkauh bik!
15¡Pa bitik yak war yulni sarahtanauh!
¡Babilon sip-awas kalwarang!
¡Makau kilwi talwa pāni balna kidika bubukna,
dawak daklana balna dai kidika bik bubukna!
¡Adika kuduh biritik kalyamtayang:
birita kalyamtanauh witingyakat!
¡Witing yamna kaput birita kalyamtanauh!
16Babilon yakat muih as bik dadawinih di dahwi minit yaknin kidika.
War kidika kaiwak talwi
pa ūk muihni balna dai kidika watwi panina yakat uiwarang,
bahang kidika laih yamaduwi kiri uiwarang.#Is 13:14.
Israel nawatwi kaina
17“Israel laih, sīp diswak, layan balna uiwi uiwa kapat ki. Tatuna laih Asiria king kasna; usnitkat Babilon kingni Nebokatnesar kasna, wakalni balna bitik bahna. 18Kidika bahang yang, Papang paraski nuhni dutayang, Israel Papangni, yultayang: Babilon kingni dawak muihni balna kidika bitik wah diaki, sihm Asiria kau kalyamnayang kapat. 19Yamtingkat Israel kidika watwi sauni yakat kiuna karang, sihm sīp kapat Carmelo yakat sihrsihr manas duna karang, Basán yakat, dawak Efraín, Galaad asangnipas yakat bik. 20Yang Papangyang kat yultayang: Kidika mani, Israel dawak Judá karak witingna dutni as bik diskarang, kat yang lawik dutnina dating diswarang bahang, sangninaka dianayang balna yakat.
Babilon yakat minit bayakna
21“¡Merataim#50.21 Merataim dawak Pecod: Hibru kau ulna kidika laih Babilon pani ayangni balna kidika kaput ulna, kidika tannika duna atnin watbu niningyakat yaklauna dawak wah kalanin pani. sauni nining yakat kalbautanauh
dawak Pecod muihni balna yakat bik!
¡Uita yawanauh dawakat bitik imuktanauh!
¡Yang yultayang kidika bitik yamtanauh!
Yang Papangyang kat manapaktayang.”
22Sauni yakat kalbauwi daukalpamwak parasni yulwa kidika dakanaki.
23¡Babilon, sau bitik amarni,#Jr 51:20-23. bahwi disdana!
¡Nisan balna kidika muihsak dadauwi
Babilon niningyakat kalahna kidika yulni!
24Babilon man alas malaihnin kidika anaman dai,
dawak ismang aitas kidika yakat buknaman.
Kaput bahang yakat malaihwatna,
kat Papang niningkauh lawanaman bahang.
25Papang yaklauwi kalbaunin dini balna puna sakdai kidika apahna,
dawakat kulnin daukalwak kalbauwa dini balna kidika yakna,
kat Papang parasni nuhni bitik duwa kidika
wark yamnin as duwi
Caldeo ninisan yakat.
26¡Pa bitik kaupak alahwa kalbautanauh!
¡Di minik putamana ūni apahtanauh!
¡Muih kidika uduhta itanauh!
¡Muih as bik sangnika dunin awaski!
27¡Kalbauyang balna kidika bitik itanauh,
inin pāni yakat sihtanauh!
¡Alakaih witingna!
¡Manina kiwi kana, wah dunin awarni!
28(Muih balna Babilon kaupak kiri yaklawi uiwa kidika Sayan yakat witingna yuyulwi amput Papang yaklauwi Babilon yakat minit kalana kidika, witing makat yulnin uni yakat dutni yamna yulni.)
29“¡Las ruhmyang balna bitik yultanang aiwi Babilon niningyak kalbabauwi!
¡Tawan nuhni yaihnit awaih yakat pama dutanauh muih as bik kiri yaklanin awas yulni!
¡Minit lauta kalatanauh witing ampus dunin kidika yakat!#Sal 28:4; 137:8; Rib 18:6.
¡Witingyakat kalyamtanauh witing amput yamna dai kaput!
Kat yang nikingkauh tapani dadasni dai bahang,
Papang niningkauh, Israel Papangni maisihni dis niningyakat bik.
30Kidika bahang witing wawahnima balna dauwi tapas yakat bubukna karang,
dawak kalbauyang muihni balna bitik sihm mani yakat dadauwarang.
Yang Papangyang kat yultayang.”
31Papang parasni nuhni bitik duwa kidika yulwi:
“Nisan tapani dadasni, man namangkauh yang;
māma kaiwi kana, wah dunam awarni.
32Nisan tapani dadasni, kalma bauta bukma,
dawak muih as bik madulauwas karang.
Tawanma nunuhni balna kidika bitik kuh kau buski,
kuhni pau kidika yaihnit awaih balna bitik busna karang.”
33Papang parasni nuhni bitik duwa kidika yulwi: “Israel tawanni dawak Judá tawanni balna kidika taihnin lani yakat ki. Waihnila balna yaklau laihwi silak ahana dawak kidika kaupak uluhnin yuyulwas ki. 34Kaunah laihwi yakyang kidika laih parasni ki, dawak witing ayangni laih Papang parasni nuhni bitik duyang. Witing adika lani yamwarang; kulnin aslah lani duaiwarang dawak yamadangni lani bik duaina karang Babilon muihni balna niningna yakat.”
35Papang yulwi:
“¡War yamnin Babilon dawak muihni balna niningna yakat bik!
¡Tanituna muihni balna yakat dawak sins lani nuhni duyang balna niningnayakat bik!
36¡Sukniyah balna yak bik war yamnin: tunanina dutni kalwarang!
37¡Kalbauyang balna niningna yakat war yamnin: yamaduduwak diyukwarang!
¡War yamnin aninaras balna dawak kārnina balna yak bik!
¡War yamnin lalah minit kalbauyang balna niningna yakat:
yayal kapat kakalwarang!
¡War yamnin ritsnina niningyakat: mamalna karang!
38¡War yamnin was murwa balna yakat: bitik buhlakna karang!
Kat Babilon laih dawan dauh wayakaka balna manah ki,
kidika bahang kulnin lani bik dis kalna.
39“Kidika bahang, Babilon yakat, kuruh balna ūnina duduna karang, dawak kauhmak wanilang sunilu balna bik,#Rib 18:2. dawak kidika yakat uhu nunuh ūnina duduna karang. Wat as bik, kurih balna mahni kaiwi bayakwarang yakat muih uiwi pa duduwas karang. 40Sodoma dawak Gomorra kapat kalna karang dawak yaihnitkau tawan nunuhni balna#Gn 19:24-25. daukalmukna dai kapat. Muih as bik kidika yakat kiwi yalahwas karang, kidika yakut bayaknin bik bayayakwas karang.#Is 13:20-22. Yang Papang yang kat yultayang.
41“Tingpal niningkauh, pa naikaupak,
nisan as parasni nuhni dawak king manas bik
ridi kalalahwi aina atnin.
42Witingna las dawak langsa bik duduwi kalbaunin dini;
muih dudutni ki, dawak minikun talnin lani kidika witingna diski,
witingna sararahwa kidika laih sihm kuma lalamwak parasni yulwa kapat ki,
dawak aras kikilwi.
Witingna kalbaunin ridi ki Babilon nining yakat kalbaunin.
43Babilon kingni, adika yulni dakawi yamaduwi kalitikwas ki,
dawak witing dalani wauhwi sihm muih yal muihbin duwarang kapat.#Jr 6:22-23.
44“Yang sirihni aiwaki sihm layan Jordán damasni kau kalahwi sihrsihr batatani yakat kiwa kapat, dawak kidika yakat diyamtingkat Babilon kidika kirarang, dawak kidika yakat angdik muihni yang waltik yakki kidika kabamint kana karang. ¿Wais sipyah yang apat atnin? ¿Wais sipyah nikingkauh yaklaunin? ¿Angdika sīpni maintalyang muihni muhki yakat yaklaunin sipyah? 45Dakah yang yamnik ridi alahwanayang kidika, yang Papang, Babilon niningkauh; wark as yamnik ridi alahwanayang Caldeo balna niningna yakat: Sīp dibinina kidika bik duwi uina karang, dawak sihrsihr balna kidika bik daukalna karang. 46Babilon bukwarang kidika laih parasni yulna karang, sau bik isihna karang, dawak sarahwarang kidika nisan balna ūk bik dakakana karang.”#Jr 49:18-21.
Currently Selected:
Jeremías 50: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
