Jueces 13
13
Sansón batahna
1Kaunah Israel kidika watwi Dawan minikpa yakat dutni yamna, dawak Dawan yaklauwi filisteo balna tingnina dinit yakat kurih 40 praisni āna dai.
2Zora yakat Dan sulani balna pasyakat al as likdai ayangni laih Manoa. Witing yalni kidika sip walabis duwasdai ban kaput. 3Kaunah mani as Dawan innisal yaklauwi witing yakat kiwi aput kalyulna: “Man sip walabis as bik yaktas danaman, kaunah waradika laih muih karuk dama, dawak kaput laih muihbin as yakma. 4Kaunah man wain diwinih, dawak dinin ūk balna parasni balna kidika bik, kaput bik kasnin maisihni kulna balna kidika bik kasnin-awas ki, 5walabis al as duma ki, dawak basni bik daknam awaski, kat kidika muihnibin kidika laih Papang dini yakna nazareo#Nm 6:1-5. kapat karangki batahndawas tanitkauh, bahang witing yaklauwi Israel balna laihwi yakna karang filisteo balna tingnina kaupak.”
6Yal dai kidika kiwi alni yakat kalyulna: “Papang kaupak al as kaina sakyang dai pāni yakat, bahang kulnik abahlna, Dawan innisal kapat dai. Kalyultik dakasyang dai witing kidika wais pa, dawak witing bik yayulwi dakawasdai. 7Yayulna kidika laih muihbin as duma ki yatna dai, dawak bik warakaupak wain dawak dinin parasna balna kidika dinin awaski yatna, di kasnin maisihni kulna balna kidika bik kasnin awas, kat muihbin kidika laih Papang dini kulna karang bahang nazareo kapat, batahndawas tanit kau dawak dauna kat bik.”
8Kaput dawak Manoa Dawan kau aput kalyulwi minit yulna: “Dawan, kalma dinit yak buktik yultayang, kidika alni watta sihtah yangna akat, yangna ais yamnikna kidika yanayulna atnin, muihbin batahnwarang kidika ais yamtanakipa.”
9Manoa yulna kidika Papang dakana, dawak innisal kidika sihwak watwi kiuna yal kidika asangpas yak sakkat. Manoa laih kidika pāni yakat sak-awas dai bahang, 10yal dai kidika kiri kiwi kalyulna:
—¡Dakah, muhnilau kau muih al as talna yang dai kidika watwi yang yakat kalahna!
11Manoa dai kidika yaklauwi muih al sak dai yakat uina, al dai kidika aput kalyulna:
—¿Man yah tanit kau yalki karak yulbauna man dai kidika?
Insal biri nangnitlana:
—Agha, yang dai.
12Manoa biri yulwa dai:
—Man yana yulna man kidika kapat kalahna, ¿muihbin kidika amput muhtanaki yah? ¿Muihbin kidika amput yamtanaki yah?
13Dawan innisal biri nangnitlana:
—Man yalma kau kalyulna yang dai kaput yamwang: 14wain dinin awaski, dawak wain minik kaupak wasni satni balna yamna kidika bik dinin awaski, kaput bik di maisihni kulna balna kidika kasnin awaski. Yang kalyulki balna kidika manah yamwarang.
15-16Manoa, witing kidika alni laih Dawan innisal kidika amanglawas awi, aput kalyulna:
—Plisma palni, man yangna karak watta kuts bin as lahtik matanaki kidika kastah.
Kaunah Dawan innisal kidika yaklau nangnitnalana:
—Yang watki karang bik, sip man kasnam dini kidika yang kastas awaki ki. Kaunah sipki kuts bin kidika Dawan yakat sakripais karauni kauna busta kalana atnam.
17Bahang Manoa yaklau insal yakat kalyulna:
—Man ayangma mahn bik maiyultah, man lawa maiyulnaman dini kidika kaput kalahwakat ting mana atnikna.
18Kaunah insal kidika yaklau nangnitlana:
—¿Ais yulni man dukih mawih yang ayangki amanglana atnam? Kidika laih malni dini as amangladaski.
19Manoa laih kuts bin kidika dawak plawar minik satni balna kidika duwi, kipala as minityakat ilwi Dawan yakat sakripais karauni kauna buswi kalanadai. Bahang Dawan laih taldas dini as yamnadai Manoa dawi yalni kidika niningna yakat: 20kuh kidika sakripais busnin pāni yakaupak dahlwi kilna kat, Manoa dawi yalni karak tatalna dai Dawan innisal kidika kuh dahlwa papusmunah kisang yakat kil'kaiwakat. Bahang witingna laih abukwi tunanina kidika sau kat susukna dai. 21Manoa witing amanglana dai kidika alni laih Dawan innisal dai kidika, bahang watwi witing muhni yakat dawak yalni muhni yakat bik kalahwas danadai; 22dawak yalni yakat kalyulna:
—Rahm palni mayang laih daudarang ki, kat Papang yakat talnamayang bahang.
23Kaunah yal kidika yaklau nangnitlana:
—Dawan yaklau mayang yakat mai-inin kulna katlaih, sakripais karauni kauna dawak minitdis kalanin dini kalanamayang kidika duwas kitdai, dawak bik maidawakat adika dini balna taldaskitdai. Adika dini balna bik maiyulwas kitdai.
24Yal kidika mani kiwi kana mani kat, muihbin albin as duna dai, dawak ayangni laih Sansón paknadai.#Hib 11:32. Muih al bin kidika laih barakwadai dawak Dawan yaklau blis kalyamwadai. 25Dawak ma as kat Sansón kidika Dan ūni labanni yakat sakkat, Zora dawi Estaol karak walsah yakat, Dawan spiritni kidika witing yakat kalkalahwadai.
Currently Selected:
Jueces 13: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
