Jueces 14
14
Sansón marid kalahna kidika
1Ma askat Sansón yaklauwi kiuna dai Timnat pāni yakat bahang filistea yal as talna, 2dawakat papangni balna yakat kiwi diyulna dai:
—Plismana, filistea yal as Timna yakat talnayang kidika dunik kultayang, bahang laki yamtanauh.
3Kaunah papangni balna yaklau kalyuyulna:
—¿Ais yamta filisteo muihni balna pasyakat yawa yal walnamyah, Papang kukulwas muihni balna kidika?#14.3 Papang kukulwas muihni balna kidika: Y.y. Papang sainni dis balna. ¿Mawanaihki pasyakat, dawakat Israel pasyakat yayal diskatpah?
Sansón yaklau nangnitlana:
—Kidika sirau laihtak dukih yawi, bahang kidika yang yalki yanamna yamni kultayang.
4Papangni balna amanglalawas dai Dawan yaklauwi di balna bitik kaput yamwa kidika, bahang filisteo balna niningna yakat kalbaunin wawalwadai, kat filisteo balna yaklauwi Israel muihni balna niningna yakat di tataihwa bahang. 5Kaput laih Sansón papangni balna karak Timnat yakat uina dai. Sansón witing tawan wainni yamak yakat kiwi karak, layan wahma as nining yakat kalahna dai. 6Dawan spiritni Sansón yakat kallaihna dai, dawakat lakat laihwi bahna sihm kuts bin as kapat; kaunah papangni balna yakat diyulwas dai di kalahna kidik. 7Usnit kat sirau dukih kalawa yakarak kiwi yulbabauna dai.
8Ma as as bayakwak usnit kat, Sansón watwi kiuna dai yal sirau kidika mahka duna atnin, bahang kiwi ta piriwa yakat kawi kiuna, layan dauna kidika talna atnin, bahang layan dauna muihni yakat amak ū duduna dai. 9Amak uni kidika tingni kau kuhrwi yakwi kaswinah kiuna dai. Papangni balna yakat kiwi kuihwi amak kidika diawak didina dai kauna diyulwas dai layan dauna muihni kaupak yakna kidika.
10Sansón papangni, yal sirau yakat kiwi talna dai; dawakat Sansón alasna as yamna kidika mani balna wawahma balna manah alasna yayamwa dai kaput. 11Kaunah filisteo balna laih yamaniduduwadai bahang,#14.11 Yamaniduduwadai bahang: grik kau ulna kidika laih kaput yulwi. Hibru kau laih tatalna mani kat. kaltalyang balna 30 duwi uina dai, witing karak kalpakwi bang atnin. 12Sansón yaklauwi ahal 30 balna yakat diyulna:
—Manna yakat yul malni as manayulki. Bahang ma tiaskaubu alasna karang pasyakat adika yulni malni kidika yakta yayultanama bahang kaput laih suruhmnin asnina linin kat as as manaki, dawak alasna yakat kanin asnina bik kana as as manaki. 13Kaunah yayultas awanama kat, manna lawa linin asnina suruhmnin as as yatanama, dawak alasna kau kanin asnina bik as as yatanama, manna bitik kau.
Dawakat witingna biriwi nangnitlalana:
—Bahang yul malni kidika yanayulta. Yangna dakana ki.
14Yul malni dai kidika Sansón yaklauwi aput yulna:
“Kaswadai kidika kaupak kasnin dini as kalahna;
dawak parasni dai kidika kaupak damni kalahna.”
Ma bās bayakwak usnit kat, yul malni kidika walwi yayakwas dai; 15kaput bahang ma arungka yakat#14.15 Ma arungka yakat: grik kau ulna kidika laih kaput yulwi. Hibru kau laih ma tiaskaubu yakat. Sansón yalni yakat kalyuyulna:
—Alma yakat tanidutang yul malni yulna kidika lāih yakwi yulwak yanayultah, kaput awas karangkat, kuh kau mabusdarang, papangma dawak wanaihma balna bitik. ¡Manna yanayultanang aiwanayangna kidika laih dikina dakyaknin manah yamnamana kapat ki!
16Yal dai kidika alni yakat kiwi kaidi aput kalyulna:
—¡Dalani yatalasman! ¡Maisihni yatalaman! Wanaihki balna yakat yul malni as diyulnaman, kaunah yang akat laih lāih yakta yayultas man.
Dawak Sansón biriwi kalyulna:
—Papangki nanangki yakat bik diyultas yang, bahang man laih mahlaih sip mayultasyang.
17Kaunah yal kidika alni yaihnit yakat kiwi kaidana dai ma tiaskaubu alasna duduna yakat, dawakat wat wat kalyulwak ma tiaskaubu kiwi kuihma mani yakat yul malni dai kidika lāih yakwi kalyulna. Kaput dawak wanaihma balna yakat kiwi diyulna dai. 18Ma tiaskaubu yakat, baisa ma kidika kakiwas kat, filisteo balna uiwi kalyuyulna Sansón yakat:
“Amak damni kaput ūk diski,
dawak layan parasni kapat ūk diski.”
Sansón biriwi nangnitnalana:
“Tukiruh yal bin yakarak wark yamnamana bahang,
yulki malni kidika lāih yaknamana.”
19Kidika usnit kat Dawan spiritni Sansón yakat kallaihna dai; dawakat Ascalón pāni yakat kiwi ahal 30 iwi asnina balna kau duwi, uiwi diana dai yul malni lāih yakwi yuyulna balna yakat. Usnit kat kulnin daukalwi papangni ūni yakat kiwi kana dai, 20dawakat Sansón yalni dai kidika Sansón karak kaltalyang as kat, yakat kalalana dai.
Currently Selected:
Jueces 14: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998