Jueces 12
12
Efraín sulani balna dawak Jefté
1Efraín sulani ahal kidika bitik kaluduhwi Jordán wasni kidika dakyaklawi, Zafón nining yakat uiwi Jefté yakat kalyuyulna:
—¿Amput dawak amonita balna niningna yakat kalbauna yawaman kat, yangna akat bik isingna paktang yawas yangna dai? ¡Warmani ūma pasyakat mahasakdi ūma bitik mabusdarang!
2Jefté aput diyulna:
—Yang wanaihki balna dawi amonita balna karang kalbibilna dawakat manna yakat manayultingkat aiwa ilpkina awasdanamana. 3Yang talingkat aiwasdanamana bahang yang alas sangkika kidika daunin yaknayang, dawakat kalbaunayang, dawakat Dawan yaklauwi yāwakat minit bayaknayang. ¿Ais yulni manna aiwanamanah yang karak kalbaunin?
4Jefté yaklauwi Galaad alni bitik uduhwi duwi Efraín sulani balna niningna yakat kalbauwi minit bayakna. Efraín muihni balna yuyulna Galaad muihni balna Efraín dawi Manasés kidika balna walsah kau yalalahwa dai kidika muihni balna laih Efraín pāni kidika ruhmwi dadana kapat diyuyulna dai. 5Galaad muihni balna yaklauwi Jordán wasni tingni Efraín sulani balna duduwa dai kidika bitik didakyayakna dai, dawak Efraín muihni balna kiri awaihwi bayakdang atwi diyuyulwakat, biriwi diyulwi dakakawadai witingna kidika Efraín muihni balna pa, bahang yuyulwadai dikah, 6di papakwa dai yulnin “Shibolet” bahang witingna “Sibolet” atwarang kat, kat Efraín muihni balna kidika yulni sipawas dai yulnin, kaput laihwi pāni yakat ihiwa dai, Jordán wasni tingni kung yakat. Kidika mani balna yakat Efraín sulani balna dadauna dai ahal manah tausin 42.
7Jefté laih kurih tiaskauas Israel balna taninatuna kana dai. Dauna manikat, witing tawanni Galaad#12.7 Witing tawanni Galaad: ulna umani yakat laih yul bu kidika kaput yulwi. Hibru kau laih Galaad tawanni nunuhni balna yakat. yakat nununa dai.
Israel tanituna balna ūk bas kidika
8Jefté kaupak Israel balna taninatuna ūk kana kidika laih Ibzán, Betlehem kaupak dai. 9Witing walabis ahal 30 duna dai, dawakat yayal bik 30 duna dai, bahang bitik laih pa ūk kaupak muihni balna karak kalduduna dai. Ibzán kurih tiaskaubu Israel balna taninatuna kana, 10dawak dauwak Betlehem sauni yak nununa.
11Kidika kaupak usnit kat Elón, Zabulón sulani Israel balna taninatuna kana kurih salap; 12dauwakat Ajalón sauni yakat nununa, witing sulani balna saunina yakat.
13Witing kaupak usnit yakat, Abdón, Hilel walanibis, Piratón kaupak dai, bahang Israel balna taninatuna kana 14kurih tiaskaubās. Abdón walabis ahal 40 duna dai, dawak mani balna laih 30 witingna balna bitik muyul as as kikilwa dai. 15Dauna manikat, Piratón pāni yakat nununadai, Benjamín sauni yakat pakkidika, Amalec#12.15 Amalec: hibru kau laih kaput yulwi. Kaunah Amalec sauni kidika laih wadah niningyakauh watwi, Sinaí sauni dakna kaupak tingpal niningkauh yakat. Akat laih grik kau ulna kidika aput duwi Selem, 1 Sam 9:4 kau Saalim kalahwa kidika kapat ki. asangni balna yakat.
Currently Selected:
Jueces 12: SUMU
Highlight
Share
Compare
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
