Isaías 39
39
Babilonia kaupak muih sihna balna kidika Ezequías karak kalpapakwi
(2 Re 20:12-19; 2 Cr 32:27-31)
1Kidika mani balna yakat, Babilon kingni Merodac-baladán, witing kidika laih Baladán walanibis, bahang yuyulwak dakana, Ezequías siknis dai kaunah kalyamna watwi, bahang muih sihna, kidika laih wauhtaya dawak prisantni balna kidika dukiwi kalana atnin. 2Muih balna kidika uiwi kakawak Ezequías alasna kalahna, dawak witing golni balna, lalahni balna, di walapni balna, disala tanit yayamni balna, dawak kalbaunin dini balna apakwa pāni bitik niningna kana, kidika paskau di balna bangkidika bitik niningna kāna. Witing king kāwa kau di balna bangkidika as bik laih niningnakawas awasdai. 3Kaput laih prapit Isaías, witing kiwi king Ezequías yakat kalyulwi dakana:
—¿Kidika ahalni balna angkaupak ainayah dawak ais mayuyulwih?
Ezequías yaklauwi nangnitlana:
—Sau as naikaupak aina; Babilonia kaupak aina.
4Isaías kalyulwi dakana:
—¿Man ūma yakat ais tatalwadah?
Ezequías nangnitlana:
—Di bangkidika bitik tatalna. Di ātayang pāni kau di balna bangkidika as bik niningnakatasyang awasdai.
5Kaput dawak Isaías yaklauwi Ezequías yakat kalyulna:
—Dawan parasni nuhni duwa yulni balna kidika dakah: 6‘Mani balna kaiwarang, man ūma paskau di balna bangkidika, dawak muihma bararak balna di ududuhna dai kidika warmani kat, duwi uina karang Babilonia yakat. di asbik akat watwas karang. 7Man walamabis balna palni bik laihwi duwi uina karang Babilonia yakat, dawak sumanina minik yakwi dawi warau duduna karang king ūni yakat.’#2 Re 24:10-16; 2 Cr 36:10; Dn 1:1-7.
8Ezequías kulna dai, witing sangnika kidika kulnin aslah lani duwarang, bahang Isaías yakat nangnitlana:
—Dawan kaupak adika yulni duainaman kidika laih yamni ki.
Currently Selected:
Isaías 39: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
