Isaías 40
40
Dawan yaklauwi Jerusalén yakat walaniāwi
1Manna Papangmana kidika yulwi:
“Walaniātanauh, walaniātanauh tawanki kidika;
2dalani kaltalinah Jerusalén yakat yulkalbautanauh,
dawak kalyultanauh warauni lani kidika dahn kalna,
dutni yamna balna dai kidika bitik minitlauna,
yang tingni kaupak
wah watbu duna dutni yamna balna dai kidika yulni.”
3Muih dinit as sarahwi:
“Kauhmak wanilang yakat,
Papang tāni kidika barangni yamtanauh,
Papang tāni barangni as yamtanauh sau as dutni kidika yakat.#Mt 3:3; Mk 1:3; Jn 1:23.
4Was wakarhni balna bitik langni yamtanauh,
dawak asang balna kidika bitik,
dawak pa wakarhni balna asangpas balna kidika bik langni salaini yamtanauh.
5Kaput laih Dawan alasnina nuhni kidika lāih yakna karang,
dawak muih balna bitik tatalna karang.#Lc 3:4-6.
Dawan witing kaput yulna.”
6Muih dinit as aput yulwi: “Sarahta”,
dawak yang yultik dakayang: “¿Ais yultik sarahkiyah?”
“Muih bitik kidika dibasta kapat ki,
¡dipulu as asangpas kau kapat ki!
7Dibasta kidika kusulawi, dawak dipulu kidika bik,
Dawan wingnita kidika witingna minitna munah bayakwakat.
Di rahm kidika laih muih balna kidika dibasta kapat ki.
8Dibasta kidika kusulawi dawak dipulu kidika bik,
kaunah Papang yulni kidika laih ban kaput ki.”#Jm 1:10-11; 1 Pi 1:24-25.
9Sayan ilwah asang maluih as kat,
parasni sarahta yulta,
yul yamni as yulna atnin.
Yamadutas yulta, Jerusalén,
dawak Judá tawanni nunuhni balna yakat yulta:
“¡Akat manna Papangmana sakki!”
10Dawan kaiwi parasni nuhni kau,
witing taihwi tingni parasni kau.
Tawanni kidika duaiwi laihwi yakna usnit kat.#Is 62:11.
11Sīp maintalyang#Ez 34; Lc 15:5; Jn 10:11. kapat kaiwi;
sīp binina kidika tingnikau laihwi dulauwi
pasni yakat āwi dukiwi,
dawak binina yayakna balna kidika laih yamni maintalwi.
Israel Papangni witing nuhni kidika
12¿Wais kidika kuma nuhni sakkidika tingni kau kulwi talna yah,
kidika awaskat tingni bikis kau ibis panuhni kidika kulwi talnayah?
¿Wais kulwi talnayah sau yahamni balna bitik,
kidika awaskat paun āwi talnayah asang balna kidika?#Job 38:4-11; Pro 8:29.
13¿Wais yaklauwi Dawan yakat barangni kalyaknayah,
kidika awaskat sumalnayah?#Rom 11:34; 1 Kor 2:16.
14¿Wais yaklauwi la sumalnayah, dawak di amanglanayah?
¿Wais yaklauwi sumalna kat la barangni kat yamwih?
¿Sins lani kidika wais yaklauwi sumalnayah?
¿Sins lani tuhni kidika wais yaklauwi sumalnayah?
15Witing niningyakat muih balna bitik kidika was tahna as kapat ki,
dawak bik sau yahamni minikbin as paun yakat āna sakkapat ki;
dawak kuma paskau muih balna kidika laih kauhmak minik as kapat ki.
16Líbano pāni bitik yakat, didauh balna mahni awaski,
sakripais busna atnin,
dawak kuh binin bik mahni awaski.
17Sau muihni balna bitik kidika witing muhni tāni yakat di as diski;
witing nining yakat kidika balna laih minitna as bik diski.
18¿Manna wais karak sipyah Papang kidika libitna atnamna?
¿Wayani kidika ampat yamtanamayah?
19Kipala kau, kidika awaskat pan kau muih wayani yamyang kidika yamwak,
gol kau di yamyang kidika yaklauwi minit yakat gol manah kahwi lāwi,
dawak bik lalah kau sīnni bik yamwi.#Ap.w 17:29.
20Pan kau muih wayani yamwa kidika,
witing pan yamni kat walwi dutlanin-awas yulni,
kaput laih tingkau di yamwi lan
kidika yakat yulwak āwi kalawi buknin-awas yulni.#Is 41:6-7; 44:9-20; Jr 10:1-16.
21¿Manna amanglatasmana dai katpah?
¿Yuyulwak dakasmanadaih?
¿Tatuna kaupak manna manayuyulwakat dakasmanadaih?
¿Sau yamna kaupak manna amanglatasmanah?
22Papang laih witing yalahwa pāni kidika duwi sau minitkau ibis kudungni kidika minit yakat,
dawak witing muih balna kidika talwi dimuih sisin kapat.
Dawak ibis kidika rina ki asna kapat,
dawak rina ki sihm ū labanni minit yakat asna riwa kapat.
23Muih ahal nunuhni kidika witing yaklauwi dauh yamwi,
dawakat sau tunan muihni balna kidika yamwak pini didiswi.
24Pan binina batatani wisam dahna kat waralaihtak riknibin laihna kapat ki sau yakat. Papang yaklauwi witingna minitna yakat wingnita puhwarang kat kusulawarang ki, dawak wing bauwarang kat di unitak kapat dulauwi dukiwarang.
25Papang maisihni dis kidika yulwi dakawi:
“¿Manna wais karak yalibittanamayah?
¿Wais kidika sipyah yang apat atnin?”
26Mamaknapa ibis yakat dulauta talnauh:
¿Wais yamnayah kidika dini balna bitik?
Sahwi yakwa kidika as as, dawak bitik yakat ayangnina kat kat pakwi yulwa kidika. Witing parasni kidika nuhni palni ki kidika bahang as bik laih dis-awaski dini balna kidika.
27Israel, Jacob tawanni,
¿ais dutni daka yultamanh?
¿Ais yamta yultamanh:
“Dawan amanglawaski mayang wauhda adika;
Papang yang akat yakulwas ki”?
28¿Amanglatasman katpah? ¿Dakasmahn?
Dawan, Papang ban kaput kidika,
sau yamna kidika,
witing laih kalsuhwaski;
dawak sinsni kidika sarandis ki.
29Kalsuhlakna yakat witing yaklauwi parasni kalawi, dawak parasni dis yakat witing yakluwi parasni kalawi.
30Wawahma bik sipki di suhnin, muih tanit pararasni bik bubukna ki,
31kaunah Dawan yakat rahm kukulwa#Sal 25:3; 33:20-21; Is 49:23. balna kidika laih, parasnina kidika watwi wisamni duduwa kidika ban karang, dawak bahlwi yaklaunin sipkarang yakalnuh#Sal 103:5. kapat, kirinin sipki dawak lapaknin sipki kalsuhwas.
Currently Selected:
Isaías 40: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
