Isaías 38
38
Ezequías sikninis kaupak kalyamna
(2 Re 20:1-11; 2 Cr 32:24-26)
1Kidika mani balna yakat Ezequías siknis laihwak kalsuhdana, dawak prapit Isaías, Amoz walanibis kidika kiwi kaltalwi kalyulna:
—Dawan yulwi: ‘Man wanaihma, walamabis balna yakat las yulni kidika diyulta, kat dauma ki. Mayamwas karang ki.’
2Ezequías witing daklana nining yakat muhni wirlawi aput minit yulna Dawan yakat:
3“Yang kalma dinit yakat buktik yultayang Dawan, ismangkatma amput man yakat barangni warkma yamnayang dai kidika, dawak kulnik bitik laih man dukih mawa yakat yamnayang dai.” Dawak tapalhni palni kaidana dai.
4Dawan yaklauwi Isaías yakat pakna 5kiwi kalyulna atnin Ezequías yakat: “Dawan, muihmabarak Devid Papangni aput yulwi: ‘Mamatyulnaman kidika dakanayang, dawak mamakwas bik talnayang. Baisa sangmaka kidika kurih 15 mana awaki. 6Mana dawak Jerusalén bik manalaihtik yakki ki Asiria kingni kaupak. Yang tanit dakna awaki adika tawanni nuhni.’ ”
21Isaías yaklauwi pakna dai, ani damni minik kidika kau laihwi yudutni yamwi dawi king muihni siknis laihna yakat kahna atnin, dawak kaput yayamwak king witing yamni kalahna. 22Kaput dawak, Ezequías yaklauwi Isaías yakat kalyulwi dakana:
—¿Ais sainni kau yang amanglakiyah Dawan ūni yakat yawinik sip kalna kidika?#38.22 S.d. 21-22 kidika laih 2 Re 20:7-8 kaupak akat lana.
7Isaías yaklauwi nangnitlana:
—Adika sainni Dawan yaklauwi mawarang, witing pranimis kat yamwarang kidika man yakat: 8Acaz watsni kidika yamtingkat ma sanni duwa kidika, kilitna salap nawatwarang, uman yaklakna kidika kaupak.
Kaput laih grado salap yaklakna dai kidika nawatwi kilna dai.
9Judá kingni Ezequías, witing sikninis kaupak kalyamna usnitkat, adika salnimo ulna dai:
10Yang kulnayang dai:
Yang sangkika kau ma yamni balna dai yakat yawinik dai;
daunin kingni lani yakat yawinik yayulwi
yang maki sutni balna watwa kidika yakat.
11Yang kulnayang: Adika sauni akat baisa Papang talas awaki,
kaput bik adika sauni akat muih balna bangkidika asbik wattik talas awaki.
12Payahnik pāni kidika dis kalna, nikingyayakna,
sihm sīp maintalyang balna ūnina labanni kapat.
Yang sangkika kidika asna yamyang asnina yamwi dukiwi dakyakwa kapat dai.
Pukta madah yayamtang dalani wauhtayang dai.
13Pukta bitik yakat dalawak sarahtayang,
sihm layan as wakalki balna kidika kaswi bahwa kapat.
Pukta madah yayamtang dalani wauhtayang.
14Ap dalani wauhtayang kidika yultayang,
sihm mamah rarah balna kapat,
dawak aidayang buhtuku balna kapat.
Yang mikpa kidika ibis yakat talna manah kalsuhlakna.
¡Dawan yataihna ki, bahang yang paki yakat man yulta!
15¿Kaunah ais sip awakiyah yang yulnik,
witing yamna kidika?
Makauh bitik yang kaupak kiuna,
yang solki tapalhni wauhwa kidika yulni.
16Kidika balna yakat, Dawan yaklauwi nanitna dakwa kidika, witingna laih sangka karang,
dawak witingna bitik karak yang kalpaktik sangka awaki.#38.16 ¿Kauna ais sip awakiyah yang yulnik...sangka awaki: kaput wirlana kidika yamni kapat ki. Hibru kau laih amangladas ki.
Muihki yamni kidika man yanaman, dawak watta sangkika yanaman.
17Talah, tapalhni atnin dai kaunah, waradika laih kulnik aslah ki.
Man apaknaman#38.17 Man apaknaman: sara kau ulna kidika kaput yulwi. Hibru kau laih dalani talnaman. yang sangkika kidika,
daunin pāni kudungni tuhni kaupak,
kat dutni yamnayang balna kidika bitik datang disna bahang.
18Sau-ū kau bangkidika laih sip man ayangma nuhni yayamwas ki,
dauna balna kidika laih sip man alasmana yayamwas ki,
kaput bik laih pa kudungni tuhni yakat kāwi uiwa balna kidika,
witingna tahanin as bik dis ki man barangni man kidika yakat#Sal 88:10-12.
19Sangka balna kamanah sipki ayangma nuhni yamnin,
warmani yang yamtayang kapat.
Papang balna kidika walaninabis yakat yuldibabauwi
man barangniman kidika yulni.
20Dawan laih akat sakki yalaihwi yaknin.
Mayang pasnin dini kidika pasdi unbaudanang Dawan ūni yakat,
mayang masangkika kau ma mayana bitik yakat.#38.20 60 kau ulna yakat talah.
Currently Selected:
Isaías 38: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
