Isaías 37
37
Dawan yaklauwi Judá kidika laihwi yakwi
(2 Re 19:1-37; 2 Cr 32:20-23)
1King Ezequías, adika yulni dakana kat prakni iswi bisna, dawak asna utuhni kat kāna, dalani wauhwa kidika yulni, usnit kat Dawan ūni yakat kiuna. 2Kaput dawak sihna Eliaquim king uni maintalyang dai kidika, Sebna yul balna kalahwak ulyang muihni, dawak sumalyang nunuhni tanit muih bararak balna karak, asna utuhni kāwi uina dalani wawauhwa yulni, prapit Amoz walanibis Isaías yakat talna atnin, 3dawak king yulni balna kidika kalyulna atnin: “Warmani dalani as dudi, wah dawak sau yakat bukna as, sihm muih yal as muih bin duwarang kat parasni dis dana kapat. 4Yamni karang man Papangma Dawan dakana dai kat, Asiria kingni yaklauwi tunan muihni yaklauwi sihwak kaiwi yulna kidika, Papang sangka yakat usna kidika, yamni karang Papangma Dawan witing silp dakana kidika wah diawarang kat. Mamatyultah baisa watna bang adika yulnina.”
5King Ezequías dini yamyang balna dai kidika Isaías yakat talna uina, 6Isaías yaklauwi diyulna kingnina yakat uiwi kalyulna atnin aput: “Dawan yulwi: ‘Yamaduduwinih, yang niking kauh yul balna yuyulna kidika, Asiria kingni warauni balna yaklauwi 7Talah, yang lawik yul as kalsihtingkat dakawi nawatwi sauni yakat kiuna karang, dawak yamtingkat witing sauni yakat ihina karang.’ ”
8Asirio tunan muihni dai kidika dakana, Asiria kingni dai kidika Laquis tawanni nuhni kaupak kalahwi kiuna. Kaput laih Jerusalén kaupak kalahwi kiuna dawak Asiria kingni dai kidika Libna nining yakat kalbauwasakkat kiwi kalpakna. 9Kidika yakat dakana, Etiopía kingni Tirhaca kidika witing nining yakat kalahwi kiuna kalbauna atnin. Watwi muih sihna Judá kingni Ezequías yakat kalyulna atnin: 10“Mana Papangma witing yakat rahm kalkultaman kidika mayulwi Jerusalén kidika yang paraski dinit yakat bukwas karang ki; kaunah datang alas mayulnin awas ki witing kidika. 11Man dakanaman, Asiria kingni balna yayamna kidika sau ūk balna niningna yakat daukalnin kukulna kidika. ¿Mana lawama kultamanh? 12¿Dawan balna kidika yaklauwi laihwi yayakna dai katpah muihkina bararak balna yaklauwi tawan ūk balna yakat daukakalna dai kidika: Gozán tawanni, Harán, Resef dawak Bet-edén kau yalalahwa muihni balna Telasar kau yalalahwa dai yakat? 13¿Hamat, Arfad, Sefarvaim, Hena dawak Iva kingni balna dai kidika angkat bangyah?”
14Muih wauhtaya duwi aina dai kidika duna Ezequías, dawak yulwi talna. Usnit kat makatyulnin ūni yakat kiuna dawak, wauhnitaya dai kidika Dawan muhni yakat rina, 15witing aput minit yulna: 16“Dawan parasma nuhni dutaman kidika, Israel Papangni, querubines minitna yakat yalahnam pāni dutaman kidika, man manah Papangman sau kingni balna bitik minitna yakat; man yamnaman ibis dawak sau kidika. 17Dawan yamni yadakah. Mamakpa sahmuhdata talah Dawan. Dakah Senaquerib adika yulni balna yasihna kidika, yulni balna kidika laih man namangyakat manah ki, Papang sangka man kidika. 18Rahmki, Dawan, Asiria kingni balna yaklauwi sau muihni balna bitik iwi dis yayamna dawak saunina bik daukakalna, 19dawak daninawan balna bik kuhkau bubusna, kat rahm kidika laih Papang balna-awas dai bahang, kidika balna laih pan dawak kipala kau witingna laihwi yayamna dai bahang. Kidika bahang daukakalna dai. 20Waradika laih Mapapangki Dawan, mailaihta yakta kidika parasni kaupak, kaput laih sau kingni balna bitik amanglalana karang man manah Dawan, Papang aslah man kidika.”
21Kaput laih Isaías yul sihna Ezequías yakat kalyulna atnin: “Adika Dawan yulwi, Israel Papangni kidika: ‘Senaquerib, Asiria kingni yamwa kidika yulni mamatyulnaman kidika dakanayang.’ ”
22Adika yulni balna Dawan yulna, Asiria kingni yulni:
“Sayan tawanni nuhni kidika yal siraubin kapat
namangkari, Senaquerib.
Jerusalén kidika sarahni yulwi tunan labahn labahn mawi,
man mahka data yawangkat.
23¿Wais nining yakat usnamahn?
¿Wais nining yakat yulma parasni yulta
dawak mamakpa bik parasni kaltalnamahn?
¡Israel Papangni maisihni dis nining yakat!
24Man yaihmat kau wark kalahwa bang kidika kau Dawan yakat usnaman.
Yulnaman:
‘Kar mahni dutayang kidika kau asang tuna balna yakat ilwanayang,
Líbano tuna kau maluihni yakat ilwanayang.
Suhunni tanit nanaini kidika daknayang,
dawak awasni tanit yaksasihn balna kidika.
Asangni tuna tanit maluihni yakat ilwanayang,
asangnipas balna kidika dipulu dahna pāni kapat kidika.
25Talasyang sauni yakat
kuhrting was kalahwak dinayang,
yang kalkipas ataktayang kidika kau
Egipto wasni balna bik buhlakna atakting kat.’
26¿Kaunah man amanglatasman dai yang Dawan yang kidika,
wais yaklauwi yamnayah adika dini balna bitik?
Sara mani kau yamnin kulna sakdai,
bahang waralaih yamna;
kidika bahang man tawan nunuhni pararasni balna kidika daukaltaman,
bahta uduhtaman.
27Muihni balna kidika, parasnina dis,
yamaduduwi dawak asalni bik kukulwi,
sihm asangpas kau dibasta sangni kapat ki,
dawak ū tuna kau dibasta ukuswa kapat ki,
bahang kidika balna laih makilwa niningkaupak wing kaiwa kidika yaklauwi busna ki.
28Man kalitiktaman kidika bitik matalayang
dawak yamtaman balna kidika bitik;
amanglatayang nikingkauh kulnam daukalnaman kidika.
29Kulnam daukalna kidika dawak kulnam dutni kidika bik amanglatayang bahang,
nangmatak yakat di tuyulni as āwitki ki,
dawak tampas yakat aras ahawa dini kidika āki ki,
dawak mayamting kat aiwanaman tāni munah nawatta yawama.”
30Kaput laih Isaías yaklauwi Ezequías yakat kalyulna:
“Adika laih sainni as karang di balna kalahwarang kidika:
adika kurihni dawak kurih ūk yakat bik di kastanama ki,
plawar minik witing silp kalahwa kidika,
kaunah kurih bās laihwa yakat laih dahta yaktanama ki,
wain yamak bik yamtanama ki dawak kidika minik kalahwak kastanama ki.
31Judá kau dauwas yaklalawarang balna kidika laih dibasta pan kapat karang ki:
rikni laihwarang dawak minik bik yakwarang ki,
32buas laih Jerusalén yakat wawatwarang ki;
Sayan asangni yakat dauwas yaklalana balna kidika bangkarang ki.
Adika laih Dawan parasni nuhni duwa kidika witing dalani lani daihni duwa kidika kau yamna karang ki.
33“Asiria kingni yulni, Dawan aput yulwi:
‘Jerusalén yakat kawas karang ki,
sibang as bik ruhmwas karang ki,
nanit daknin kau duwi kiwi kalbauwas karang ki,
dawak yaihnit yakat sau uhwi du'kilkiwas karang.
34Kaina tāni munah nawatwi kiwarang ki;
adika tawanni nuhni akat kawas karang ki.
Yang, Dawan yang kat yultayang.
35Adika tawanni nuhni yang tanit dakki ki,
dawak laihtik yakki ki,
warauki Devid yakat kultayang yulni,
dawak yang alas muihni akat bik.’ ”
36Dawan innisal Asirio balna ūnina labanni yakat kiwi muih 185,000 īna dai; payahlawak bitik laih dadauna dai. 37Kaput laih Asiria kingni Senaquerib witing mahka yaklauwi Nínive yakat kiuna dai. 38Ma as kat, witing daniwan Nisroc kau minit yulwa ūni yakat kiuna minityulwa sakkat, witing walanibis Adramelec dawak Sarezer witingna uiwi ihina, usnit kat Ararat sauni yakat kiri uina. Kidika kaupak walanibis Esarhadón kidika king kāna witing pāni yakat.
Currently Selected:
Isaías 37: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
