Isaías 36
36
Senaquerib kiwi kāna kalbaunin
(2 Re 18:13-37; 2 Cr 32:1-19)
1Ezequías king kāna kurih salap minitkau arungka laihna kurihni yakat, Asiria kingni Senaquerib yaklauwi Judá sauni kau kalbaunin pāni pararasni balna dai kidika bitik yakat kiwi kāwi kalbauna, dawi laihwi duna. 2Laquis kaupak tunan muihni yakwi sihna Jerusalén kingni Ezequías yakat talna atnin, kalbauyang balna mahni karak, dawak witingna uiwi wawatna was laihwa pāni ma tani niningkauh yakat, ta as asna susuhwa pāni kau kiwa tāni yakat. 3Kidika yakat Hilcías walanibis Eliaquim witing king uni yakat tunan dai maintalna atnin, bahang kidika yakat kiwi kalpapakna; kaput bik yul balna kalahwak ulwa muihni Sebna, dawak Asaf walanibis Joah kidika, kaput bik king yaihnit kau ulyang sakdai kidika bik. 4Asiria muihni kalbauyang tunan dai kidika yulna:
—Ezequías yakat kalyultanauh, adika king nuhni Asiria kingni yul sihna adika: ‘¿Ais kidika yakat kulta man kidika di as bik mayamwas karang kapat kultaman? 5¿Yul yaksasihn balna kidika sihm kapapat kultamanh amput dawak parasni karak war kalbaunin kidika? ¿Ais yakat kulta nikingkauh lawinin kultaman? 6Talayang Egipto yaklauwi ilp mawarang yakat kultaman. Yamni ki, egipto laih sihm suku sahna tupuini kapat ki,#2 Re 18:21; Ez 29:6-7. taihdarang kat matingki yakat maidakwi. Fero, Egipto kingni laih kaput ki, muih bitik witing yakat rahm kalkukulwa balna yakat. 7Dawak man yayulma kat: Yangna laih Papangkina Dawan yakat rahm kultayangna, ¿Ezequías yaklauwi makatyulnin pāni dawak sakripais busnin pāni balna dai kidika yakmukna awasyah, kidika Papangni pāni balna dai kidika dawak Jerusalén muihni balna, kaput bik Judá muihni balna yakat bik diyulna dai makatyulnin pāni aslah duna atnin? 8Yang dakiwan, Asiria kingni karak pramis as yamtah: yang aras tausin bu maki, kilnin muihni balna kidika walta yakma kat. 9Man laih sip-awas palni man, Asiria ahalni kalbauyang sip-awas balna kidika bik sip diyamtang kikiras karang ki, ¿tahatamahn, Egipto kaupak aras kilyang balna dawak aras bik duna atnam? 10Baisa kidika minit yakat, ¿man kultaman, yang adika sauni kat aiwik nining yakat kalbautik daukalpamki kultamanh Dawan yakat kalyultik dakasyang tanit kauh? ¡Witing yaklauwi yāpakna niningyakat kalbautik daukalpamnik!’
11Eliaquim, Sebna dawak Joa witingna yaklauwi nangnitlalana Asirio tunan muihni yakat:
—Kalma dinit yakat bukdi yuldi, arameo yulni kau yulyanabautanauh, kat yangna amanglatayangna. Manna hibru yulni kau yulyanababauwinih, kat daklana makau kilna bangkidika bitik dakakawi.
12Kaunah Asirio tunan muihni kidika yulna:
—Manna damanawan yakat bik awaski, dawak manna yakat bik manayulnin yanasihwaski Asiria kingni adika yulni. Kaunah daklana makau kilna bangyakat diyulnin yanasihna, kat witingna bik sihm manna kapat silp bamana kastanama, dawak usutamana kidika bik ditanama.
13Kaput dawak Asirio tunan muihni kaina dai kidika yaklauwi parasni hibru yulni kau yulna:
—Yamni dakanauh, Asiria kingni nuhni kidika yaklauwi manayulwa kidika: 14‘Datanangkat Ezequías yaklauwi alas manayulnin awaski; witing sip manalaihwi yakwas karang’ 15Ezequías witing kulnamna laihnin kulwarang kat manayulwarang aput Dawan yakat rahm kultanauh: ‘Rahm palni laih Dawan yaklauwi mailaihwi yakwarang, witing dawakat adika tawanni nuhni Asiria kingni tingni yakat bukwas karang’, 16yulni dakakawinih. Asiria kingni yasihna manna yakat manayulna atnin, kulnin aslah lani duna atnin witing karak, bahang data buktanauh, kaput laih manna bitik wainmana yamak minik balna yakwa kidika kastanama, dawak animana damni bik, kaput bik laih manna silp wasmana kau ditanama. 17Usnit kat pa as yamni pamana apāt kat manaduwi kiwarang, sau as plawar minik manas, dawak wain bik manas pāni kat, kaput laih plawar busna manas karang, dawak wain wasni bik manas karang 18Ezequías yaklauwi, Dawan mailaihwi yakwarang manatarang kat, datanang kat alas manayulnin awas ki. ¿Sau ūk muihni balna daninawan kidika yaklauwi dilaihwi yakna dai katpah, Asiria kingni tingni kaupak? 19¿Hamat dawak Arfad witingna daninawan balna kidika angkat bangyah? ¿Sefarvaim daniwan balna kidika angkat bangyah? ¿Samaria kidika Asiria parasni kidika kaupak dakwi yaknin sipdai katpah? 20¿Kidika dawan balna bitik pasyakat, angdika sipdaih tawanni muihni balna kidika laihwi yakna atnin Asiria kingni tingni kaupak? ¿Manna amput dawak kaput kultamana, Dawan Jerusalén kidika laihwi yakwarang?
21Witingna ap dadana dai, di as bik yuyulwas dai, kat king kidika yaklauwi diyulna dai di as bik yulnin-awas. 22Eliaquim king uni maintalyang dai kidika kulnin bukna, Sebna yul balna ulyang dai kidika, kaput bik laih Joa witing king yaihnit yakat ulyang sakdai kidika bik, witingna praknina bibisna, dawak king Ezequías yakat uina kalyulna atnin Asiria tanituna yulna kidika.
Currently Selected:
Isaías 36: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
