Isaías 30
30
Egipto yak ilp wawalwa muihni balna niningna yakat
1Dawan aput yulwi:
“¡Alakaih, walaninabis muih dudutni balna kidika,
witingna alas kalahwi di balna yamnin kukulwa kidika, yang akat yakulwas dawi,
dawak wark balna yamnin ridi kalalahwa kidika kaunah yang lawik sinsni yakat di as bik kalatasyang,
tanka laih dutnina minit yakat baisa dutni ududuhwi!
2Sirihni palni Egipto yakat uiwi,
kaunah yang akat yayulwi dakakawas ki;
ilp wawalwi fero tingni dinit yakat,
kaput bik laih Egipto yaklauwi sanni diawa yakat kawi yakmamaldi.#Is 31:1-3; Jr 2:18,36.
3Kaunah fero yaklauwi nanitna dakwarang kidika laih dauh alas kalna karang,
dawak Egipto kau sanni yakat yakmamaldana dai kidika laih witing sau yakat bubukna karang.
4Manna muih yakta sihnamana karang bik,
Zoán dawak Hanes tawanni nunuhni kat,
5kidika tawanni nuhni ilp dis kidika yaklauwi dauh,
alas manayulna karang, di as bik ilp manawas karang,
nawatkauh laih kulnamana dai kidika bitik laih dauh kalna karang, dutni manah.”
6Prapit, witing yulni balna yulna dai kidika, Néguev kau didauh balna bangkidika yulni:
Sau pīsni as yamadangni manah bahngna kidika,
layan ihyang balna manah pa duduwa kidika,
bil dawak waula lawani duyang balna manah kidika,
witingna golnina balna kidika biriku dawak kiamil minit yakat ilwi duwi uiwi Egipto yakat,
tawan as di sip-awas yakat,
7parasni bik dis, ilp as yamnin sip-awas kidika.
Kidika bahang witing ayangni aput ānayang:
“Di nuhni anyang as ihwi kaunah di as bik yamwas ki”.
8Waralaih aiwa, tat yakat ultah,
yakat ulpaktah,
tanit kau ma balna kaiwarang kidika dini,
witnis as ban kaput pakatnin.
9Adika tawanni laih kulnin dutni ki dawak barangni bik awaski,
Dawan sumalwa balna kidika dakakih bik awaski.
10Di talyang balna yakat diyuyulwi, “Manna baisa amana tatalwinih”,
dawak prapit balna yakat diyuyulwi: “Di rahm kidika talwi maiyuyulwinih;
yul yudutni kau maiyultanauh; dukih mayawa kidika dakyayakwinih.
11Tapas kaupak lāwanauh,
ta barangni kaupak data lāwanauh,
matakit yakat Israel Papangni maisihni dis kidika ahawinih.”
12Kidika bahang, Israel Papangni maisihni dis kidika yulwi:
“Manna adika isningpaknin dukih manawas ki,
parasni yamnin dawak dutni kidika yakauh
manna laihtamana;
13kidika bahang manna laih dutni kidika manalaihna karang.
Sihm daklana kat sahna duwa kapat mana,
maising-aidas kat bukwa kapat;
14sihm sau kau di yamna kat bahwa kapat awanama,
bahwa kidika pīsni dibin as bik dis kidika,
kuh tuturni kuhrwi yaknin,
awaskat was butwi yaknin bik pa kuhrna paskaupak.”
15Dawan, Israel Papangni holi kidika aput yulwi:
“Nawatta aiwanauh, ismangnalak wattanauh, kaput laih manalaihwi yakna karang.
Isninglak atnin dawak rahm kulnin yakat sakkarang parasni kidika.”
Kaunah manna dukih manawas dai,
16kidika bahang yulnamana: “Dikah, tanit yamni ki aras kau mailwi mairarang kat.”
Yamni ki kaput iranamna ki.
Dawak bik yuyulna: “Kar parasni kikira balna yakat mailwarang.”
Kaput, bahang parasni kikira balna kidika manauhuiwarang.#Is 31:1.
17Muih tausin kikirarang, muih al aslah yaklauwi yamwakat,
manna bitik iranama, muih singka yaklauwi manayamwakat,
bahang kaput laih bulah kaltanama,
sihm asang tuna kau pan aslah sak kapat
kidika awaskat, asang ubulni kau sain as dulalauwa kapat.
Pramis yamna tawan yakat minikun talnin
18Kaunah Dawan laih tahawi, manna yakat mamaknakun manatalnin; witing laih dukih kalawi manna yakat dalani lani duwa kidika namangna kāna atnin, kat Dawan laih Papang as barangni bahang. ¡Yamni palni ki angdika muihni witing yakat di bitik tahawa kidika!
19Sayan tawanni, Jerusalén yakat yalahwa kidika: baisa aidas awama. Dawan man yakat mamakun matalwarang sarahta ilp yultang madakawi, madakawarang kat mahka nangmatlawarang. 20Dawan dalani wauhnin kidika kasnam kapat mawarang, dawak makulnik bukwa wasni kidika mawarang bik, witing kidika, sumalmayang, bahang baisa yakmaldas karangki; man silp mamakpa kau talma. 21Wadahma yakauh bik, kidika awaskat tingmapal yakauh bik alahwa yawama kat, dangmat yakat mayulwarang aput: “Ta laih akūt ki, bahang akauh yawah.” 22Di dutni kapat talma, lalah kau di yamna balna kidika, kaput bik dawan dauh wayani gol kau yamna kidika bik. Dukihmawas karang, bubuh kapat talma. 23Dawan yaklauwi was mawarang, sau kau di minik balna dahtaman kidika, sau kidika yaklauwi plawar minik mahni mana karang. Kidika mani, tumaruh balna kasninna kidika manas palni karang. 24Turuh pan muryang balna, biriku balna wark kalalahwa kidika, kasninna tanit yamni kidika kakasna karang. 25Īnin mani kidika kaiwi kawarang, dawak kalbaunin uni pararasni balna kidika bubukwakat, was murna karang asang balna yakat, dawak ubulni binina yakat bik. 26Dawan yaklauwi, witing tawanni di kalina kidika laihwi sitwi kalawarang. Kaput dawak waiku kidika ma kapat yaringni duwarang, dawak ma yaringni kidika yaringni tiaskaubu minit yakat yaringni karang.
Asiria yakat wah kalana
27Talnauh, Dawan witing muihni palni kaiwi naikau;
kulnin daukalna kidika dahlwasakki wayauni karak,
kungnimak balna kidika annin manah banghna,
tuni kidika laih kuhpau kapat ki,
28wingnita puhwa kidika laih was parasni
dinimak yakat murwa kapat ki;
witing kaiwi muih balna dininamak yakat pan ilwi sitna,
dawak dutni yakat wirlamuknin,
kaput bik laih muih balna tininapas yakat aras kau ahawa dini kidika āna karang,
diyamwak pini disna atnin.
29Manna namangna yakat nawatnikauh laih unbaunin kidika sakkarang,
sihm pukta yakat alasna dunin yamni as kapat,
ismangna kidika alasna karang,
sihm bara puhwak dakawi lapakwa kapat
Dawan asangni yakat kiwi,
Israel yakmalda pāni.
30Dawan witing king dinit kidika yulwak dakadi
dawak parasni nuhni kidika bik manikingkawarang,
annin yamadangni kau yamwakat,
kuh dahlwa yakat, was lauwi alwana lapwa yakat bik.
31Dawan dinit kidika yulwak dakawi,
dawak wahni kidika duwi Asiria kidika muihsak dauwarang,
32Dawan yaklauwi wah kalawang kidika minityak,
drom balna bik bauna karang.
Dawan yaklauwi kalbaunin yamadangni as yamna karang.
33Ma mahni dawi Asiria dini ridi yamna sak kidika,
dawak kingni dini bik,
dalani wauhnin pāni panuhni dawak tuhni,
kuh mahni puna kat dahlwa sakki.
Dawan wingnita puhwa kat dahlwarang,
sihm sulhpa murwatus kapat.
Currently Selected:
Isaías 30: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
