Isaías 29
29
1¡Alakaih Ariel, Ariel,#29.1 Ariel: muih ayang as kapatki, adika yulni laih Jerusalén yakat kalyulwi. Ez 43:15,16 yakat yulwa kidika laih sakripais bubuswa pāni kau kuh tuturni bangdai kidika yulwi.
tawan nuhni as yakat Devid kiwi kana dai kidika!
Kurih as as manna alasna satni balna yamtanauh,
2dawak yang lawik Ariel kidika kalyamtingkat kulnin rikwarang,
dawak sarahwi kaidinin kidika sakkarang.
Tawan nuhni kidika laih yang diki karang, sihm Ariel kapat.#29.2 Ariel kapat: satuk wirlanin kat: sakripais bubuswa pāni kau kuh tuturni.
3Kalbauyang muihni balna dutayang kidika sihtingkat ma-awaih dadakwarang,
yaihmat awaih kidika bitik yakat daklana parasni as daklatik awaihlaki,
dawak kalbaunin pāni balna kidika ridi yamki, namang yakat kalbauna atnin.
4Dinit yakat buknaman karang, dawak saukat bukma;
man damat kidika laih sihm muih isningmuih dinit kapat karang;
yulbautang damat sumni karang.
5-6Kaunah di sirihni
Dawan parasni nuhni duwa kidika yaklauwi waihmala balna yakat wah diana karang
alwana parasni yulwa kidika kau, sau isihna karang, dawak yulni bik parasni palni yulna karang,
wing parasni bik wauhna karang, kaput bik kuh bik parasni dahlwi buswi daukalna karang.
Man waihmala mahni palni kidika wanan manah kalna karang,
kaput bik muih mahni palni mauhuiwa balna dai kidika dibasta kusuni kapat murwi dukiuna karang.
7Kidika muih mahni sip kuldi yakdas kidika,
witingna Ariel niningyakat kalbabauwa kidika,
dawak muih taihyang muihni balna kidika,
witingna amana tatalwa kapat karang pukta yakat.
8Sihm muih yuhdauna kat amana kau
di kaswasak kaldakawa kapat karang,
kaunah sahmuhwak yuh kidika kapat karang;
kaput bik laih was dikih kalawa muihni as amana kau
diwa kapat kaldakawi
kaunah diwas kapat karang, dinit suru bitik buhlana.
Bahang kaput laih dikalahna karang tawan mahni balna bitik
witingna Sayan nining kauh kalbabauwa balna kidika.
9¡Manna di amanglatas, di sip-awas mana kidika ban awanauh!
¡Mamaknapa dis kidika ban kaput awanauh, di as bik talas!
¡Ban nanahtanauh, wasak dina kapat,
wasak ditasmana karang bik!
10Dawan yaklauwi manna mamatna yakat
makauh parasni as sihna.
Prapit balna kidika laih tawan minikpa,
kaunah Dawan yaklauwi miniknapa yakat asna sitna.#Rom 11:8.
11Amana talnin satni balna bitik kidika manna namangna yakat
wauhtaya kau ulwi tamp taihwi dawi tulna kapat ki.
Muih as yaklauwi kalawarang yulwi talwi lan muihni yakat,
“Adika yulta talah” kaltarang kat,
witing yaklauwi nangnitlawarang:
“Yang sip-awasyang, kat tamp taihna bahang.”
12Dawak yulwi talnin sip-awas yakat kalawi
kalyulwarang: “Adika yulta talah” kaltarang kat,
biriwi nangnitlawarang: “Yang yultik talnik lan awasyang.”
13Dawan yaklauwi yayulna:
“Adika tawanni laih yulni kau warkki yamwi,
dawak tinpas kau ayangki nuhni yamwi,
kaunah witing isning laih yangkaupak naikau ki,#Mt 15:8-9; Mk 7:6-7.
dawak prias yamwa kidika bik muih yaklauwi kulnin lani walwi yakna,
dawak kulnin yakat laihwi duwi lan kalna.
14Kidika bahang, adika tawanni balna yakat,
witingna di tatalwas dini kidika kau niningnakating kat,
tatalwarang.
Sins duyang balna sinsnina kidika disnakarang.”#1 Kor 1:19.
15¡Alakaih, kidika muihni balna Dawan kaupak yakmalda balna kidika,
witingna warknina kidika malnikau yamwi,
dawak puksani yakat dutni yayamwi
aput yuyulwa kidika:
“Muih as bik maitalwaski. Dawak muih as bik amanglawas ki”!
16¡Di kidika amput daukakalwi!
Wasmak bibilni kidika
sihm wark kalahwa muihni kapat katpah.
Yamna dini balna kidika yaklauwi, yamyang muihni yakat kalyulwarang katpah:
“Man yayamtasman”,
dawak sau bibilni kau di yamna balna kidika pīsni dibin as bik yaklauwi yulwas karangki:
“Man amanglatasman di yamtasakman kidika.”#Is 45:9; Jr 18:1-6; Rom 9:20-21.
Israel yakat pramis yamna laihwi yakna atnin
17Ma balna mahni awaskat,
asangpas balna kidika di dahni pāni kalna karang
dawak di dahnin pāni dai kidika asangpas#Is 32:15. kapat kalna karang.
18Kidika mani, tappuk balna kidika muih as wauhtaya yulwi talwarang kat dakakawarang,
dawak miniknapa dis balna kidika sip karang di talnin,
puksani dis, witingna kaupak dilaihwi yakna karang puksani kidika.
19Muih kulnin minikunni balna kidika watwi alasna duduna karang Dawan yakat,
dawak baisa miniknakunni balna kidika bik
Israel Papangni yakat alasna duduna karang.
20Tapadadas kidika bitik dahn kalna karang,
kulninna dudutni dadasni balna kidika bitik disna karang,
dawak dutni yamnin manah kukulwa balna kidika bik,
21muih ihina atwi ūk balna yakat yulnina yakyang balna kidika,
dawak wihta yakat bik laihnin dini kal-ahawa kidika,
dawak alas yulwi muih dutni yamwas dai kidika yakat la kat yayamwas kidika balna bitik.
22Kidika bahang Israel Papangni Dawan kidika,
witing yaklauwi Abraham laihwi yakna kidika yulwi:
“Warmani kaupak tanit yakat, Jacob asalni dakawas karang,
muhni bik pauni kalwas karang,
23kat sulanina balna tatalwarang
yang tawan yakat di yamnayang balna kidika,
bahang amanglalawarang maisihni disyang kidika dawak yamakiduduwarang
Israel Papangni yang akat.
24Witingna sip amanglalawas balna dai kidika amanglalawarang, dawak sins nuhni duduna karang,
dawak ap yuyulwa balna dai kidika sumalwa kidika dakawi lan kakalna karang.”
Currently Selected:
Isaías 29: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
