Isaías 26
26
Minit bayakna unnibaunin
1Kidika mani adika laniwana unbauna karang, Judá sauni yakat:
“Tawan nuhni dawak parasni as dudi;
mahawi malanin,
Dawan yaklauwi nanitdaklana balna kidika dulauna, kaput bik parasni yamna.
2Dūr apahtanauh,
muih dutni yayamwas barangni balna kidika kāna atnin.#Sal 118:19-20.
3Dawan, man lawa apaktaman kulnin lani aslah duwa kidika,
dawak bik barangni kidika, kat man yakat kukulwa bahang.
4Dawan yakat nining kaput kukulwi,
kat witing kidika laih yakmaldinin pāni as ban kaput bahang.
5Witingna manah kapat kaldakakawa kidika, yamwakat bubukwi,
dawak tawan as witing manah kapat kaldakawa kidika dinit yakat lakpamwi,
dawak sau kat tuklakwi,
6muih balna kulninna sau kau dawak miniknakunni balna
kalnina kau atakna atnin yulni.”
7Muih dutni yayamwas balna tanina kidika laih barangni;
Dawan, man lawa tanina kidika langni yamtaman.
8Mayang bik yamni kaldakadi,
man lāma balna yaklauwi ta manikingkawa kidika yakat, Dawan.
Mayang makulnik dukih kalawa kidika laih man yakat makulnin dini.
9Yang kulnik bitik wingkita puhtayang man yak, pukta balna yakat;
yang paraski bitik kau man yakat mawaltayang.
Man sau lāni yamtang kat,
muih balna kidika la barangni kidika lan kakalwarang.
10Muih dudutni balna kidika miniknakun talaman karang bik,
witingna barangni atnin kidika lan kakalwas karang ki;
witingna laih dutni balna ki muih yayamni balna saunina yakat,
dawak bik Dawan nuhni kidika kukulwas ki.
11Papang, wah kidika ridi yamnaman,
kaunah witingna amanglakih diawas ki;
man tawanma yakat dalani talaman kidika amanglalawarang kat,
niningna kakarana karang ki.
¡Yamni karang, man kulnam daukalna kuhni kidika yaklauwi dibuswi disyamwarang kat!#Hib 10:27.
12Dawan, man lawa yamni balna kidika mayataman;
di rahm kidika,
man kuduh yamtaman mawarkki balna kidika.
13Mayang Mapapangki Dawan,
dawak ūk balna kidika laih mayang matakituna balna dai,
kaunah man yakat manah mataldi Dawan kapat.
14Kidika balna laih uman dadauna,
watwi sangka kakalwas karang ki;
kidika laih wayani manah ki, watwi yaklalauwas karang ki;
kat man lawa wah dianaman bahang dawak bik daukalta dismukna man bahang,
kulninna lani balna bitik laih dahn yamnaman.
15Dawan man lawa yamtang kat tawan muihni balna kidika mahni kalna;
man lawa yamtang mahni kalna ayangma nuhni yamna atnin yulni,
dawak sau kiwi watwa balna kidika bitik man yamnaman.
16Dawan, makulnik bukwakat man yakat mawaldi,
yulma yudutni karak barangni yanayamtaman mani kat.#26.16 Dawan, makulnik...mani kat: kaput wirlana kidika yamni kapat ki. Satuk wirlana kidika laih: Papang wah mayataman kidika yakat, ap yuldi mamikit yuldi. Hibru kau laih amangladas ki.
17Man muhma tani yakat bangmayang dai, Dawan,
sihm muih yal as muih karuk kat
muihbin dunin mani kaiwak dalawak pihrwi sarahwa kapat.
18Dunayangna, muihbin dunin dalani kidika dakanayangna,
dawak muihbin dunayangna, kaunah wing manah dai.
Adika sauni akat laihwi yaknin lani kidika duaitas yangna,
dawak muih as bik batahnwas karang ki adika sauni akat yalahna atnin.
19Kaunah man kau dadauna balna kidika laih watwi yaklalauwarang ki,
witingna muihnina nuhni kidika watwi yaklauna karang ki.
Sau kau kama balna kidika sahmumuhna karang ki,
dawak alasna duwi sararahwarang.
Kat man lawa yaringma kidika sihtaman sihm was buiwa kapat,
dawak dauna balna kidika sau kaupak watwi batanh dadawarang.#Ez 37.
20Yang tawanki yawah,
uma yakat awa dūrma puttah.
Apis maldah, Dawan kulnin daukalna kidika bayakwarang kat.
21Kat Dawan kidika uni kaupak kalahwarang ki
dutni yayamna yulni wah diana atnin,
sau muihni balna yakat,
dawak sau adika baisa muih ihina balna kidika malwas karang ki,
kaunah nawatkauh laih dutni yayamna kidika dawak talna karang ki.
Currently Selected:
Isaías 26: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
