Isaías 25
25
Papang ayangni nuhni yamnin
1Dawan, man laih yang Papangki man;
yang ayangma nuhni dawak yamni yamtayang,
kat man warkma balna kidika yamni yamna man
barangni dawak bik yamni, sara mani balna dai kaupak.
2Dawak tawan nunuhni balna dai kidika kipala manah yamna man,
dawak tawan nunuhni pararasni balna dai kidika daukalna man;
waihmala balna ūnina nunuhni dai kidika daukalna man,
bahang sip watwi laihwi yayamwas karang.
3Kidika bahang tawan as parasni kidik yaklauwi ayangma nuhni yamwi,
tawan as muihni dudutni balna kidika yamamaduduwi.
4Kat man laih muih minikunni yakmaldinin pāni as man,
kaput bik dukih kalawak kulnin bukwa muihni yakat nanitdakyang man,
wing parasni wauhwak yakmaldinin pāni as,
madaihni kat yakmaldinin pāni as.
Muih dudutni wingninata pupuhwa kidika laih wasma#25.4 Wasma: kaput ulna kidika yamni kapat ki. Hibru kau laih daklana (pared). wing bauwa kapat ki,
5kidika awaskat sau buhni minityak madaihwa kapat.
Man waihmala balna sinsnina diswa kidika minitna bayaktaman
sihm madaihni kat mukus yakat kalatang ma sanni duaiwa kapat.
Man lawa paktaman muih ahal dudutni kidika ap danin.
6Sayan asangni yakat, Dawan parasni nuhni bitik duwa kidika
nisan balna bitik ridi yamwarang
kasnin dini auhni, dawak wain tanit parasni
di kasnin dawak wain bik tanit yamni kidika.
7Adika asangni akat Dawan yaklauwi laihwi biswarang
asna baini as tawan balna muhnina yak mukwa dai kidika,
kaput bik asna as sau muihni balna yakat dimukwadai kidika.
8Dawan yaklauwi daunin kidika dispamna karang ban kaput atnin,#1 Kor 15:54.
muih bitik miniknawas uswi buhna karang#Rib 7:17; 21:4.
dawakat sau bitik yakat kalawak disna karang
witing tawanni yakat sarahni tatalwa kidika.
Dawan yaklauwi yulwi.
9Kidika mani yulna karang:
“Adika laih mayang Mapapangki,
witing yak rahm kuldi kat mailaihwi yakna bahang.
Alasna dudanang witing mailaihwi yakna.”
10Papang tingni kau Sayan asangni kidika nanit dakna karang,
kaunah Moab#Is 15:1—16:14; Jr 48:1-47; Ez 25:8-11; Am 2:1-3; Sof 2:8-11. yakat laih kalni kau atakna karang,
sihm bubuh atatakwa kapat.
11Moab tingni kidika yuna karang
sihm was waihyang tingni dulauwi waihwa kapat,
kaunah tingni dulauwa bitik yakat
baisa kaldu'kakiwarang witing manah kapat kaldakawa lāni kidika.
12Dawan yaklauwi yamwakat
daklana balna kidika bubukna karang;
tuklakna karang,
kaput laih sau yak bukna karang.
Currently Selected:
Isaías 25: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
