Isaías 27
27
Israel laihwi yakna
1Kidika mani Dawan wah diawarang,
isniparah yamadangni, nuhni dawak parasni nuhni,
waula, bil nuhni#Job 3:8; 41:1; Sal 74:14; 104:26. balna bangkidika yakat,
dawak īna karang kuma paskau waula lawani duwa kidika bik.
2Kidika mani Dawan yulwarang:
“Wain yamak yamni kidika yakat unbautanauh.
3Yang Dawan yang, bahang, yang lawik maintalayang
dawak was utuhtayang.
Pukta madah maintalayang,
dutni as bik kallaihwak wauhnin awas yulni.
4Witing karak kulnik daukaltasyang.
Wakalni dawak dibasta bik duwa katlaih,
kalahwi war diyamna karang
dawak bitik palni busmukna karang.
5Yang lawik nanitdaknik kidika dukih kalawakat,
kulnin aslah lani kidika yang karak yamwang,
agha, yamwang yang karak kulnin aslah lani kidika.”
6Tanit yakat, Jacob tawanni kidika rikni duwarang ki,
Israel kidika udungwi kalahwarang dawak puluni bik duna karang,
dawak sau bitik yakat witing minik balna kidika bahngna karang.
7Papang, Israel yakat wah kalawas ki,
kaltaihyang muihni balna yakat wah diawa kapat,
Israel kidika yakat bik iwaski,
iyang muihni balna yakat īna kapat.
8Papang yaklauwi witing tawanni yakat wah kalana,
witingna panina kaupak kangwi yakna kidika,
kangwi yakna wing yamadangni kau puhwi,
sihm ma kilwa kaupak wingni kapat.
9Kaunah Jacob dutni yamna kidika laih dawak diswarang,
kidika kulnin kau dutni yamna balna bitik laih uswi yakna karang:
dawak dauh balna panina maisihni dis kidika bitik
laih wan manah yamna karang sihm kal kinipala tikwa kapat,
bahang kaput laih pan sarani balna maisihni dis kulwa balna dai kidika dis kalna karang,
kaput bik laih daniwan balna kau walapni buswa pāni balna dai kidika bik.
10Tawan nuhni parasni dai kidika bahwi uhna,
sihm ū as dapapamna kapat,
dawak kauhmak wanilang kau muih as bik dis kapat.
Pa as turuh balna dibasta kakaswa pāni kapat,
witingna di kaswi dawi kalangwi wingninata pupuhwa kapat.
11Pan tingni balna kidika buhlawak bahwi;
dawak yayal balna kidika anawi duwi uiwi kuh bibiwi.
Tawan as kulnin sirihni awaski.
Kaput bahang kalyamna muihni kidika yaklauwi minikun
minikun kaltalwas karangki.
12Kidika mani Dawan wark yamna karang
Éufrates kaupak egipto wasni kat,
muih as plawar minik balna unitak sakwi yakwa kapat;
kaunah manna laih Israel balna muihmana kat kat manalaihwi duna karang.
13Kidika mani trumpit nuhni kidika puhna karang,#Mt 24:31; 1 Ts 4:16.
asiria kau pini didisna balna dai kidika,
dawak sihm kaput bik Egipto yakat yakwi duwi kiuna balna dai kidika,
aiwi Dawan ayangni nuhni yayamna karang,
asang maisihni dis Jerusalén yakat.
Currently Selected:
Isaías 27: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
