Isaías 17
17
Prapit yulni Damasco niningyakat yulna
1Prapit yulni Damasco niningyakat yulna:#Jr 49:23-27; Am 1:3-5; Zac 9:1.
Damasco tawan nuhni kidika tawan-awas kalwarang;
di daukalwi uhna kapat manah kalwarang.
2Ruhmwi dana karang ban kaput atnin yakat,#17.2 Ruhmwi dana karang ban kaput atnin yakat: sara mani balna kau ulna kidika kaput ki. Hibru kau laih yulwi Aroer tawanni nunuhni balna.
sihrsihr manah kalna karang;
bahang kidika yakat tinglau balna kidika sihrsihr kakaswarang isningnalak.
3Efraín yulni Israel witing manah kapat kaldakawa kidika,
witing tawan parasni as dis kalwarang;
Damasco bik sihm kaput kalwarang, Siria kau watna balna kidika,
king kāwa pāni kidika dis kalna karang.
Dawan parasni nuhni duwa kidika yaklauwi kaput yulwi.
Israel yakat wah kalana
4Kidika mani Samaria, Jacob witing manah kaldakawa dai kidika,
parasni witna karang,
barakna dai kidika disna karang pini.
5Sihm di minik bahyang#17.5 Minik bahyang: kaput kidika yamni ulna kapat ki. Hibru kau laih yulwi di minik balna. plawar minik bahwa kapat kalna karang,
witing tingni kau plawar minik balna laihwi bahwa kidika,
kidika awaskat Refaim sauni langni kau
plawar minik babahwa kapat,
6sutni balna kidika manah dinitnakahwak damumukna kapat;
kidika awaskat olib panan yakat isisihwak minik balna kidika
bu kidika awaskat bāslah tingnisut yakat watwa kapat karang,
dawak panan balna bitik yakat kukulwak minik singka manah kalahwa kapat karang.
Adika laih Israel Papangni Dawan yaklauwi yulwi.
7Kidika mani,
muih al minikpa kidika kalyamna muihni yakat dulauwarang,
Israel Papangni maisihni dis yakat.
8Watwi walapni busnin pāni yakat talwas karang,
dawak muih al tingni kau di yamna balna yakat bik.
Kaput bik laih pan sarani maisihni dis balna yakat bik talwas karang,
dawak daninawan kau walapni bubuswa pāni balna yakat bik.
9Kidika mani
man tawanma parasni balna kidika bitik laih ruhmwi dana karang,
sihm heveo dawak amorreo balna tawannina#17.9 Heveo dawak amorreo balna tawannina: sara mani ulna yakat kaput ulna. Hibru kau laih yulwi asangpas dawak pan tingni balna. ruhmwi dadana kapat,
Israel balna yakat yamaninaduduwi.
Kaput laih pāni balna kidika kauhmak wanilang kalna dai,
10kat Papang malaihwi yakna kidika datang damatkahna bahang,
ismangkattasman dai witing kidika yakat yakmaldinin as rahm tanit yamni kidika.
Dipulu walalapni yayamni balna kidika dahtaman,
kaput bik laih pan balna kidika dahtaman dawan as amangnilatasman kidika ayangni nuhni yamta,
11dawak panan balna kidika madah yakat yamni maintalaman,
dawak yamtangkat ma as payahwak mahka minik yakna atnin.
Kaunah yamahni kaiwak, kidika yamahni laih sinika as bik dis kidika,
minik balna kidika bitik laih daukakalna karang.
12¡Dakanauh tawan mahni di parasni atwa kidika,
sihm kuma parasni yulwa kapat!
Kidika parasni yulwa kidika laih sau muihni balna kaupak kaiwi,
sihm was parasni murwak yulwa kapat.
13Kaunah Papang yaklauwi dibilwak kalahwi
kikiri naikau,
sihm dibasta kusulana kat wing dulauwi dukiwa kapat.
14Ma ulahu yakat taldakat yamadangni ki,
kaunah payahlawas kat uman di as bik diski.
Madiki mamalwa muihni balna kidika kapat kalalahwi,
dawak dutni maidaukakalwa balna bik sihm kapat kalalahwi.
Currently Selected:
Isaías 17: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
