Oseas 9
9
Israel niningyakat wah kaiwa kidika Oseas yaklauwi yulna
1Alasna kalahwinih Israel,
alasna kalahwi sutwinih, tawan ūk balna yayamwa kapat,
kat man laih lā bahnaman,
Papangma ruhmta danaman yulni.
Di minik balna unitak sakwi yayakwa pāni yakat
la bahtaman minit kidika yakta dukih mawi.
2Israel muihni balna kidika di minik dawak wain bik diskarang;
wainni wisam kidika mahni awaskarang.
3Efraín kidika nawatwi Egipto yakat kiwarang,
dawak Asiria sauni yakat kasnin dini awas kidika kaswarang.
Papang sau yakat baisa yalahwas karang,
4baisa wain didiwas karang Papang ayangni kau,
dawak yakat bik baisa sakripais bubuswas karang.
Witingna plawar busna kakaswarang kidika laih
dalani wauhnin as kapat karang,
dawak wais kaswarang kat muihni kidika maisihni kalna karang.
Kidika planiwar busna kakaswarang
kauna Papang uni yakat laih duwi uiwas karang.
5¿Alasna mani yakat manna dis yamtanamayah,
Papang lasnina yamni mani yakat?
6Witingna kikirana, bahwidis dawarang kidika yulni,
bahang Egipto yaklauwi diduwarang,
dawak Menfis yakat dinununa karang.
Witingna lalahnina kidika ortiga manah bahngna karang,
dawak ūnina lababanni papakna dai yakat wakal manah ukusna karang.
7¡Wah dunin mani kidika uman kiwikana!#Lc 21:22.
¡Lauwi dianin mani kidika uman kiwikana!
¡Israel balna amanglalana karang umani ui'kakana kidika!
Manna yultaman: “Prapit laih tapani dadasni ki.
Muih as papang spiritni kalana kidika laih sinsni disna.”
Yuyulwi, kat witingna kidika di dutni manah dibahngna bahang,
dutni talnin kidika nuhni duduwi.
8Papang pranipit kidika witing yaklauwi āna
mayakat kilwi talwa atnin#Is 21:6,11; Jr 6:17; Ez 3:16-21; 33:1-9. Efraín yakat,
kauna manna lawa tanipas yakat kal laihnin dini kidika laknamana;
¡Papang uni kidika bik dutni manatalwi!#9.8 Papang pranipit kidika...dutni manatalwi: kaput ulna kidika yamni ki. Hibru kau laih amangladaski.
9Bitik palni daukalna,
Gabaa#Jue 19:1-30. mani balna dai kapat.
Kauna dutni yayamna kidika Papang laih dinitkahwas karang,
dawak wah diana karang dutni yayamna kidika yulni.
Israel dutni yamna kidika yulni dutni wauhwarang
10Papang yulwi:
“Israel kidika kalpakna yang kat alasna alahwanayang dai.
Yuldarang kat kauhmak wanilang kau wain minik yakda kapat.
Manna muihmana bararak balna dai kidika laih
yang mikpa yakat ani minik damni kapat dai.
Kauna Baal-peor#Nm 25:1-5. yakat uina kat dawan dauh balna yakat wiryaklalana dai,
dawak dutni palni kakalna dai,
sihm dawan dauh kapat.
11Efraín nuhni kalna kidika uhubin kapat yaklauwi kiuna karang.
Muihbinina kidika baisa batanh dadawas karang,
muih yal muihkaruk kidika bik diskarang,
dawak baisa muih duduwas karang ki.
12Dawak kaput bik ban walaninabis mumuhwarang,
kat, yang lawik didakyakna awaki, as bik datas awaki.
¡Alakaih kidika muihni balna kaupak damuktik naikau alahwaki mani yakat!
13Efraín yakat kaltalayang,
amput witing walanibis balna yakat diyamwa kidika,
sihm di iyang alni tingni yakat tinglau as bukwa kapat yamwi:
walanibis kidika yakwi diawi ina atnin.”#9.13 Efraín yakat kaltalayang...diawi ina atnin: kaput ulna kidika yamni ki. Hibru kau laih amangladaski.
14¡Kalatah Papang, kalanam dini kidika!
¡Diatah baninapas yakat muih duwas atnin kidika,
dawak taniwas dis atnin kidika bik!
Papang kulnin daukalna Efraín niningyakat
15Papang yulwi:
“Gilgal yakat di dutni manah yayamna,#Os 4:15; 12:11; Am 5:5.
dawak kidika kaupak dutni yayamna kidika yulni ūki kaupak yakmukki;
baisa bik dalani ditalas awaki,
kat tanituna balna bitik laih kulninna dutni bahang.
16Efraín kidika muihni yakat dakna ki;
sihm pan as rikni dutlana kapat ki,
dawak minik bik yakwas kapat.
Walanibis duwarang bik yang lawik yamting dauwarang ki.”
17Adika tawanni yang Papang ki yulni dakakih kalawas dana;
kidika bahang Papangki yaklauwi ruhmwi dawang ki,
dawak muih balna pasyakat pini pa dis tulu tulu karang.#Dt 28:64-65.
Currently Selected:
Oseas 9: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
