Oseas 8
8
Israel kidika dutni yakat bukna karang dawan dauh yakat bukna kidika yulni
1“Man trummapit kidika puhta,
sihm, makau kilwi maintalwa,#8.1 Simh, makau kilwi maintalwa: kaput ulna kidika yamni ki. Hibru kau laih yulwi yakalnuh kapat. kapat
Papang tawanni minit yakat.
Kat yang prakimis kat yayamwa dadana
dawak sumalnayang niningyakat yaklalauna.
2Kaput kauna, yang akat sarahwīna aiwi:
‘¡Man kidika amangmaladi, Israel Papangni man!’#8.2 ¡Man...Israel Papangni man!: kaput ulna kidika yamni ki. Hibru kau laih yulwi Papangki, amangma ladi, Israel.
3Kauna Israel laih di yamni kidika ruhmwi dana,
kidika bahang, waihnila balna kidik uiwi aiwarang ki.
4“Yang akat yadakawas dawi king balna ahana,
dawak tunan muihni balna bik ahana yang talasyang kat.
Witingna lalahnina, golnina balna kidika duduna
dawan dauh balna wayani yamnin,
kaput yamwi witingna alas kaldaukakalna.
5¡Kulnin daukalwi, turuh wayani yakat mamat yultaman kidika manna Samaria muihni balna!#1 Re 12:28-32.
Yang kulnik daukalna kidika laih witing niningyakat ki.
¿Ampus tahawarang yang maisihni dis kalahna atnin
6Israel balna kidika?#8.6 Israel balna kidika: kaput ulna kidika yamni ki. Hibru kau laih yulwi kat Israel kaupak.
¡Samaria kau turuh wayani sakkidika Papang-awas ki!
Muih yaklauwi yamna bahang bahwi dis dawarang ki.
7Witingna wing dadahna bahang,
bahang wing bauwa minik babahwarang;#Pro 22:8; Gal 6:7.
yamak dis karang di minik bahnin,
dawak plawar minik bik yayakwas karang,
witingna yayakwarang kat,
muih ūk manah kakasna karang.
8¡Israel laih kaldapamki!
Sau ūk muihni balna kidika kaltalwi di as minit dis kapat.
9Asiria nining yakat kiuna bahang,
sihm asangpas biriniku kapat.
¡Efraín laih minitdis kalanin dini diana
witing yaksinh talwa muihni balna kidika bakanna atnin!
10Kaunah prisant diawarang karang bik nisan balna yakat,
yang lawik kalating ruhna karang,
ma as kat king balna dawak tunan muihni balna
kalalahwa kidika diswarang.#8.10 Kaunah prisant...diswarang: kaput ulna kidika yamni ki. Hibru kau laih amangladaski.
11“Ais yamwi Efraín kidika
sakripais busnin pāni kidika manas yamwih,
kidika laih witing nining yakat dutni yamnin dini manah ki.
12Witing dini manas ulnayang,
yang sumalnayang balna kidika,
witing nining yakat laih di as taldas dini kapat dai.
13Witingna laih sakripais kidika dukih diawi,
bahang bubuswi
kaunah yang Papangyang laih isinglak awaski, witingna yakat:
isningna pakna awaki witingna dutni yayamna dai kidika,
dawakat wah diana awaki, dutni yayamna kidika yulni
wattik aiting kat Egipto yakat uiwarang.
14Israel kidika ū nunuhni yamwi,
kauna witing kalyamna muihni kidika yakat laih dinitkahna.
Judá kidika tawan nunuhni pararasni manas yamwi,
kauna yang lawik kalating kat kuh kau busna karang
uni nunuhni balna kidika.”#Am 2:5.
Currently Selected:
Oseas 8: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
