Oseas 5
5
1“Sumalyang balna adika dakanauh;
Israel tawanni, yamni dakanauh;
manna namangna yakat lā kidika yamna karang,
kat Mizpa yakat mana laihnin dini kidika āna ki,
dawak Tabor asangni tuna yakat bik laihnin dini kidika āna ki,
2Sitim sauni langni yakat pa kurna as sakki;
kidika bahang wah manaki ki.
3Yang Efraín kidika kaltalyang;
Israel kidika amangnilatas yang laih awaski.
Efraín bik yal dutni karak payahna;
Israel bik sani kalkahna.”
4Tawan dutni yamwa yulni kidika laih sip dawak Papang yakat kiwas ki.
Yal karak payahnin kidika uba minitna bayakna bahang,
Papang yakat amangnilalawas ki.
5Israel ayangni nuhni dai kidika, witing niningyakat yulwa sakki,
Efraín witing alas dutni yamna yakat kalni pakwak bukwi,
¡dawak, witingna karak Judá bik bukna karang!
6Witing sīpni balna dawak,
tuniruh yayal balna karak kiwarang Papang yakat walwi,
kaunah witing sip yakwas karang,
kat Papang laih uman witing kaupak naikau kalahwi kiuna bahang.
7Papang yakat barangni awas dai,
witingna walabis duduwa kidika laih Papang ūk ki.
Witingna dutni yayamna kidika yulni
waiku as pasyakat witingna saunina kidika disna karang.
Israel dawak Judá karak wah duduna
8¡Gabaa yakat war kalbaunin tuniruh tamni kidika puhtanauh,
dawak Ramá yakat laih trumpit kidika puhtanauh!
¡Usta sahmuhtanauh Bet-avén#5.8 S.d. 4:15 yakat talah. yakat bik!
¡Benjamín yakat laih diyamtanangkat kiri yaklalauwang!#5.8 ¡Benjamín...yaklalauwang!: grik kau laih kaput yulna, kauna Hibru kau laih yulwi Benjamín, man usmat yakat.
9Yang Israel sulani balna yakat#5.9 Sulani balna yakat: satuk wirlanin laih: sulani balna niningna yakat. isningna paktayang
di kalahwarang balna kidika:
Efraín laih daukalna karang wah kaiwarang mani yakat.
10Papang yulwi:
“Judá tunan muihni balna kidika,
sihm muih as balna kidika kapat ki,
saunina kidika kauh nuhni dakwi duduwi.#Dt 19:14; 27:17; Pro 22:28.
¡Kaunah kulnik daukalnin kidika
witingna yakat nuhni palni kiuna karang!
11Efraín kidika tikini kaltaihna ki,
witing rahmni balna bitik laih diski,
kat witing dawan dauh balna yakat usnitna uiwa bahang.
12Yang laih witing nining yakat di banibil kaswa kapat awaki
dawak Judá tawanni nining yakat laih pan banibil kapat awaki.
13“Efraín sikninis kidika talwarang,
dawak Judá witing muihni yakat dakna yaka bik talwarang,
Efraín kidika Asiria yakat kiwi ilp yulwarang king nuhni yakat,#2 Re 15:19; 16:7.
kauna witing sip-awas karang sikninis kidika kaupak yamni kalyamna atnin,
muihni kau dakna balna kidika bik sip yamni kalawas karang.
14Layan amput di laihwa kaput,
yang lawik laihna awaki Efraín dawak Judá karak;
yang lawik laihtik bahna awaki, dawak usnit yakat yawana awaki,
yang lawik tingni kaupak dakyakki,
dawak muih as bik sip-awas karang laihwi yakna atnin.
15“Usnit kat yang paki yakat yawaki,
witingna dutnina kidika amangla dadawak,
kaput bik yang akat aiwi yawawalwang dadawak.
¡Witingna kakaida kidika yulni aiwi yawawalwarang!”
Currently Selected:
Oseas 5: SUMU
Highlight
Copy
Compare
Share
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
